ထဝါဲ၊ အံက်တဝ်ပါ ၁၃
ပ္ဍဲရးတနၚ်သဳ ပွိုၚ်ဍုၚ်ထဝါဲ ဒၞာဲဒေသဂြိပ်ဗၟံက် ပ္ဍဲကွာန်ထဳခဳဂှ် ဒပ်ကဝ်မယှေန်ပၞာန်ဗၟာ ကြဳဖျေံဗုမ် ပွိုၚ်ၜါတ္ၚဲတုဲ သ္ၚိဌာန် ကောန်ညးဍုၚ်ကွာန် ဟွံအောန်နူကဵု ၇၀ မ ဒးလီုလာ်အာလဝ်နွံ ညးရီုဗၚ်ပရေၚ်ဂြိပ်ဒဴပၞာန်တံ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုအံက်တဝ်ပါ ၈ ကဵု ၁၀ ဂှ် ပေါဲဗတိုက်ဟၟဲမွဲသာ် ပွိုၚ်ဍုၚ်ထဝါဲ ဒၞာဲဒေသဂြိပ်ဗၟံက် ပ္ဍဲကွာန်ထဳခဳဂှ် နကဵုၜၚ်ကျာပၞာန်ဗၟာ Jet Fighter Y12၊ FTC-2000G ဖျေံကြဳထောံလဝ်ဗုမ် ၄၀ မပြၚ် မဒှ်ရ။
ဒပ်ကဝ်မယှေန်ပၞာန်ဗၟာဝွံ ပ္ဍဲအံက်တဝ်ပါ ၈ အခိၚ်နူဂယးကဵု တ္ၚဲစေၚ်ဂှ် ဗုမ် ၄၀ မပြၚ် ကြဳဖျေံဏာ အပ္ဍဲကွာန်ထဳခဳတုဲ အံက်တဝ်ပါ ၁၀ အခိၚ်နူဂယးပၠန် နကဵုၜၚ်ကျာဗတိုက် ထပ်ကြဳဖျေံဗုမ် ၜါအလန် သၟးဟွံက ပန်စုတ်ဏာသေနာတ်စက်တံကီုရောၚ် ညးဒေသတံ သ္ဂးရ။
ပ္ဍဲကဵုပရေၚ်ကြဳဖျေံဗုမ်ကွာန်ထဳခဳဏံ ညးဒေသ ၃၅၀ ပြၚ်တံဂှ်လေဝ် ဒးဂြိပ်ဒဴလုပ်အာ လပါ်တိသေံကဵု ဒၞာဲဂြိပ်ဒဵု ကရပ်ဗ္ဒာဲဗ္ဒာဲတံဂှ်ရောၚ် KNU ခရိုၚ်ဗိက်-ထဝါဲ ပတိတ်လဝ်လိက်လလောၚ်တြးရ။
တုဲပၠန် ညးဒေသထဳခဳဗွဲမဂၠိုၚ်တံပၠန်လဝ် စနူကဵုအခိၚ်ပေါဲဗတိုက် သီဗ္ဒိုပ်ထဳခဳဒှ်လဝ်တေံဂှ်ရ ဒးဂြိပ်ပါဲအောပ်မံၚ် ပယျဵုဒၞာဲတိသေံကဵု ဒၞာဲဂြိပ်ဒဵုကရပ်ဗ္ဒာဲဗ္ဒာဲတံဂှ်တုဲ ပြဟ်ဟ်ဏံ ဟိုတ်နူ ဒပ်ကဝ်မယှေန်ပၞာန်ဗၟာ ထပ်ကြဳဖျေံဗုမ်ပၠန်ဂှ် ညးတံ ဟွံဂံၚ်ကလေၚ်စဴကွာန် ဒှ်မံၚ်ရောၚ် ဂွံတီရ။
ဒပ်ကဝ်မယှေန်ပၞာန်ဗၟာတံဂှ် ပ္ဍဲကဵုပွိုၚ်ဍုၚ် ရးတနၚ်သဳဗွဲမဂၠိုၚ် အခိၚ်ကြပ်ကဵုမံၚ်ကဵုပေါဲရုဲမာဲဟဍၚ် ပ္ဍဲကဵုဒၞာဲတိဍာ် ဒပ်ကောန်ဍုၚ်အရၚ်ရပ်လွဟ်တံကဵု ဂကောံဇြဟတ်ပၠန်ဂတးတံ ထိၚ်ချုက်လဝ်တံဂှ် နကဵုၜၚ်ကျာ ကၠုၚ်ဖျေံကြဳမံၚ်ဗုမ်အဆက်က် ကၠောန်ကၠုၚ်မံၚ်ဟွံက သီုကဵုကရောၚ်ပၞာန် ထပက်တုဲ ချဳဒရာၚ်ကၠုၚ်မံၚ် နွံရ။
ပရိုၚ်-သြၚ်လောန်တိုၚ်မ်
Photo – CJ