မတ်မလီု ၊ အံက်တဝ်ပါ ၁၃
အပ္ဍဲကဵုဍုၚ်ဗမာ ပၞောဝ်ကဵုသၟတ် ၇ တၠမ္ဂး မွဲတၠဂှ် ပရေၚ်ဂီုကၠီုဟၟဲ ဒးဒှ်မံၚ်ဒွိၚ်ဒွာဲ ဒးဖေက်မံၚ်လၟိုန်ရောၚ် ပ္ဍဲကဵုတ္ၚဲ ပရေၚ်ထတ်ယုက် စိုတ်ဂၠးကဝ် အံက်တဝ်ပါ ၁၀ အစဳဇန် ကုလသမဂ္ဂဖောအ်ဗြဳ UNDP ဂှ် လလောၚ်တြးလဝ်ရ။
သၟတ်တံ ပရေၚ်ဂီုကၠီုဟၟဲ ဒဖေက်မံၚ်လၟိုန် ဂွံဒှ်မံၚ်သာ်ဏံဟီုဂှ် ဟိုတ်နူဒပ်မယှေန်ပၞာန်တံ ပကောံကံက်မံၚ်ကောန်ပၞာန်တၟိ နနဲအဓ္ဓမကီု ဒးဒုၚ်ဘပဠမံၚ်ကဵု ဘဲအန္တရာဲလမျီုနာနာသာ်၊ ပရေၚ်ဂဥုဲၜူမာဲပြးဇးမံၚ် ပေၚ်ကၠောံသၟးဟွံက ပွမဂွိၚ်ဂွာဲဖေက်မံၚ် တံဂှ် ပရေၚ်ထတ်ယုက်စိုတ်သၟတ်တံ ဒးလီုလာ်အာနွံမံၚ် သ္ဂးရ။
တုဲပၠန် နူကဵုအပ္ဍဲဍုၚ် လၟိဟ်မၞိဟ်ကရပ် ၂ ပြကောတိကိုတ်ဘာ်တံဂှ် သွက်ပရေၚ်ဂီုကၠီုပူဂဵု ဒးဂွိၚ်ဖက်မံၚ်နွံတုဲ မၞိဟ် ၆ ပြကောတိကိုတ်တံ ပၠန်လေဝ် သွက်ဂွံတိတ်မ္ၚးအခိၚ်ဗတမ်တံဂှ် ပရေၚ်ဂီုကၠီုဟၟဲ ဒးဒုၚ်စသိုၚ်မံၚ်ရောၚ် ပ္ဍဲလိက်ဒုၚ်စဳရေၚ် UNDP ထမံက်လဝ်ရ။
အတိုၚ်လၟိဟ် UNDP လလောၚ်တြးလဝ်ဏံ အောန်မံၚ်ဏီရောၚ် ဒးဒုၚ်စသိုၚ်မံၚ်တုဲ သၟတ်တံဂှ် ဘဲဒဏ်ပၞာန်အပ္ဍဲဍုၚ်ကီု ဘဲဒဏ် ပရေၚ်ဂဥုဲၜူမာဲတံဟွံက ဟိုတ်နူဘဲဒဏ် ဍုၚ်လီုလာ်စာ်ထောၚ်မံၚ် နာနာသာ်တံဂှ် ပရေၚ်ဂီုကၠီုစိုတ်ဟၟဲ ဒှ်မံၚ်ရောၚ် သၟတ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“UNDP သ္ၚဳဂၠိပ်လဝ် အောန်မံၚ်ကွေံကွေံဏီ ဒးဒုၚ်စသိုၚ်၊ ပ္ဍဲကဵုသၟတ် ၇ တၠတှ်ေ ၆ တၠဂှ် ဆေၚ်စပ်ကဵုပရေၚ်ထတ်ယုက်စိုတ်ဟီုတှ်ေ ဒးဒုၚ်စမံၚ်သိုၚ် ပရေၚ်ဂီုကၠီုစိုတ်ဟၟဲပုဟ်။ ဒၞာဲလဵုအာမံၚ်ၚ် သၟတ်တံ အဓိကဒှ်မံၚ်ယဲစိုတ်ကဵု ဘဲဒဏ်ပၞာန်အပ္ဍဲဍုၚ်၊ တုဲပၠန် ဘဲဒဏ်ပရေၚ်ဂဥုဲၜူမာဲပၠန်။ ဗီုဍုၚ်မွဲ လီုလာ်စာ်ထောၚ်မံၚ် နာနာသာ်ပၠန် ဒဏ်စိုတ်တံဏံ ကၠုၚ်ဍိုက်လဝ်သၟတ်တံ။ စိုတ်သၟတ်တံ ပရေၚ်ဂီုကၠီုဟၟဲပုဟ်။ ဒှ်မံၚ်ဒဏ်စိုတ် သီုဖအိုတ်ရ” သာ်ဝွံ သ္ဂးရ။
တုဲပၠန် သၟတ်တံဝွံ အခိၚ်ဒပ်ပၞာန်သီအဝဵုတုဲ ဗွဲကြဴဏံ စိုတ်ပရေၚ်ဂီုကၠီု ဟၟဲတုဲ ဂွံလဝ်ဘဲဒဏ်စိုတ်သၟးဟွံက စပ်ကဵု အခေါၚ်ပရေၚ်အာကၠုၚ် ဗွဲမသၠးပွး၊ အခေါၚ်လမျီုတန်တဴဂွံဂျိုၚ် ဗွဲမသၠးပွးကီု သီုကဵုပရေၚ်ဂွံဂၠာဲ စ ပရေၚ်ဗုၚ်ဂၞဴလေဝ် ဟွံဂီုကၠီုရဂှ် ညးဆက်ဟီုရ။
နကဵုသၟတ်မွဲမွဲ ပရေၚ်ဂီုကၠီုဟၟဲတုဲ စိုတ်ဖေက်ဒှ်မံၚ်လၟိုန်သာ်ဏံဂှ် ဒၞာဲကွာန်ရး၊ ပ္ဍဲဒေသပဋိပက္ခတံသၟးဟွံက ဗီုဍုၚ်လ္ဂုၚ် ပ္ဍဲဍုၚ်ဇၞော်တံကီု ပ္ဍဲကဵုတွဵုရးကရေၚ်ဍာဲကဵုကချေၚ်တံလေဝ် ပရေၚ်ဂီုကၠီုဟၟဲကၠုၚ်ကီု UNDP သ္ဂးလဝ်ရ။
ပရေၚ်ဂီုကၠီုဟၟဲ သၟတ်ဒးဒုၚ်စသိုၚ်မံၚ်တံဝွံ အခိၚ်ကၠာဟွံသီအဝဵု သၞာံ ၂၀၂၁ ဏီဂှ် အပ္ဍဲ ၁၀၀% မ္ဂး ၁၈% ဟေၚ် နွံကီုလေဝ် လၟုဟ်ပြဟ်ဟ်ဏံ ပွဳပွူ ၄၀% သၠုၚ်တိုန်ကၠုၚ်ဂှ်ရ ဂၠိုၚ်တိုန်ၜါအဆရဂှ် ချူထ္မံက်လဝ် ပ္ဍဲလိက်လလောၚ်တြးဂှ်ရ။
မွဲလပါ်ပၠန် သၟတ်ပ္ဍဲဒေသဗွဲမဂၠိုၚ်တံဂှ် အခိၚ်သီအဝဵုတုဲ ဗွဲကြဴဏံ ကမၠောန်ကၟိတ်အောန်စှ်ေကၠုၚ်မံၚ်တုဲ၊ ဒးဆဵုဂဗကဵု ပရေၚ်စသုၚ် မံၚ်စံၚ်၊ ဒးဒုၚ်ပကောံဏာကောန်ပၞာန်တၟိ နနဲအဓ္ဓမဟွံက နကဵု အခက်အခုဲ ဝါတ်ဂါတ်နာနာ ဒးမံၚ်စံၚ်တန်တဴကၠုၚ်လဝ် မဒှ်ရ။
ပရိုၚ်-သြၚ်လောန်တိုၚ်မ်
Photo – Simsa Kasa Multimedia