ဂျဳနဳဗာ၊ အံက်တဝ်ပါ ၁၈
ဟိုတ်နူတၠဒါန်အဆံၚ်လှုၚ်တံ ယှအ်ဖျေံထောံသြန်ဂအုံဇၞော်ဇၞော်တုဲ မၞိဟ်ၜိုတ် ၁၄ ပြကောတိကိုဋ်တံ အန္တရာဲပရေၚ်အေၚ်ကၠောဝ် ဗျဵုတဟၚ် ဇၞော်ကဵုဇြဟတ် ဒှ်ကၠုၚ်မာန်ရောၚ် ကိုန်အစဳဇန်ဇွောံမဂၠးကဝ် ကုလသမဂ္ဂ WFP ကဵုဏာသတိရ။
အတိုၚ်လၟေၚ် ပ္ဍဲကုလသမဂ္ဂ WFP ဂွံကၠုင်လဝ်သြန်ဂအုံ ဂၠိုၚ်အိုတ်ဂှ် သွက်သၞာံဏံ ယအ်စှ်ေအာ ၄၀% တုဲ သြန်ပရေၚ်ဘဏ္ဍာညးတံ ယှအ်ဖျေံလဝ် ဒဵုကဵုဒဝ်ဠာ ၆ ဒဿမ ၄ ဗဳလဳယာန်တေံရ။
နကဵုသြန်ဂအုံဂၠိုၚ်အိုတ် အမေရိကာန် ဆက်စုတ်ကဵုမံၚ်ကီုလေဝ် လက်ထက်အလဵုအသဳသမ္မတ ဒဝ်နေဝ်ထရ နကဵုပရေၚ်ယှအ်ဖျေံသြန်ဂအုံဍုၚ်မ္ၚးဂမၠိုၚ် မွဲသ္ကုတ်သ္ကူဂှ် ယှအ်ဖျေံလဝ်သြန်ဒါန်ညးတံ ဒဵုကဵု ဒဝ်ဠာကရပ် ၃ ဗဳလဳယာန်ရ။
ဍုၚ်အဓိကတၞဟ်ဟ်တံလေဝ် ပရေၚ်စုတ်သြန်ဒါန် ယှအ်ဖျေံလဝ်ကီုရ။
ဟိုတ်နူပရေၚ်ယှအ်ဖျေံအရီုဗၚ် ဇၞောံမဂှ် မၞိဟ် ၁၃ ဒဿမ ၇ ပြကောတိကိုဋ် နူကဵုဍုၚ် အာဖဂါန်နေတ်သတာန်၊ ကၟိန်ဍုၚ်ဂေါန်ဂို၊ ဟေတဳ၊ သိုမာလဳယာ၊ သူဒါန်သၠုၚ်ကျာ ကေုာံ သူဒါန်တံ နူကဵုဆဵုဂဗမံၚ် ပြဿနာအေၚ်ကၠောဝ်တံဂှ် စိုပ်အာအကာဲအရာ ကာမံက်တိုန်မာန်ရောၚ် ပ္ဍဲကဵုလိက်ဒုၚ်စဳရေၚ် WFP ချူလဝ်ရ။
နကဵုသၞောတ်ဗ္ၜတ်ဍုၚ်ဂၠးကဝ် ၜတ်ကၞာတ်လဝ်ပွမအေၚ်ကၠောဝ်တံ နွံမံၚ်အဆံၚ် ၅ အဆံၚ်တုဲ အဆံၚ်ကာမံက်တိုန် ဘိုအ်ဂွံလလောၚ် စိုပ်အာအကာဲအရာဘဲအေၚ်ကၠောဝ်ဟီုဂှ် သှ်ေဆမွဲအဆံၚ်ဟေၚ်ရောၚ်။
အခိၚ်လုပ်စိုပ်ကၠုၚ် ရာသဳပယျာံမုဟ်ကျာမ္ဂး ပ္ဍဲအာဖဂါန်နေတ်သတာန် သွက်ညးနွံပၟိက်တံ ဇွောံမစိုပ်အာမံၚ် သၟဝ် ၁၀% ရ နွံမံၚ်ဏီ အေဂျေၚ်သဳဇွောံမဂၠးကဝ် ဟီုရ။
ပ္ဍဲသူဒါန် ကေုာံ ပေါဲပၞာန်ဂါဇာပွိုၚ်ၜါသၞာံ စိုပ်မံၚ်ဘဲအေၚ်ကၠောဝ်တံယျ ဒးလလောၚ်တြးလဝ်နွံ ဒှ်မံၚ်ရောၚ် WFP ဟီုရ။
ဍုၚ်အာယှပလံၚ်ဗစိုပ်မံၚ်ကဵု ဇွောံမအဆံၚ်လှုၚ် ပ္ဍဲကဵုအေန်ဒိုနဳယှာ၊ ပါကေတ်သတာန်ကဵု ဘဂႅလာဒက်ရှ် တံကီုလေဝ် ဒးဆဵုဂဗမံၚ်ကဵု အခက်အခုဲ ပြဿနာ ပွမဗျဵုတဟၚ်အေၚ်ကၠောဝ်၊ ပွမအာဟာရပိုတ်တံရ။
ဍုၚ်ပလံၚ်ဗစိုပ်မံၚ်ဇွောမဂၠိုၚ်အိုတ် ဗီုကဵုဍုၚ်အေန္ဒိယဂှ် ရဲအာဟာရ ဍိုန်လျနွံမံၚ် ၜိုတ် ၁၇၂ ပြကောဋိကိုတ်ကီုရ။
အကြာကောန်ၚာ်ဍုၚ်အေန္ဒိယတံဂှ် ပရေၚ်ဍိုန်လျအာဟာရ ပ္ဍဲဂၠးကဝ် ဂၠိုၚ်အိုတ် မဒှ်ရ။
ပ္ဍဲဂၠးကဝ် ဍုၚ်ပလံၚ်သ္ၚုဂၠိုၚ်အိုတ် ဍုၚ်သေံဂှ်လေဝ် မၞိဟ်ၜိုတ် ၆ ပြကောဋိကိုတ် အေၚ်ကၠောဝ်မံၚ်ကီုရ။
ဍုၚ်ပလံၚ်ပတိတ်မံၚ်ဇွောံမတံဂှ် ပလံၚ်ဗစိုပ်ဍုၚ်မ္ၚးမ္ဂး ဂွံပရဲဂၠိုၚ်မံၚ်ကီု ဟိုတ်နူကဵုလဝ်ဖျုန်ကဵု သွက်ဂွံသွံကဵုဗွဝ်ဖျာ ဍုၚ်မ္ၚးတံတုဲ အပ္ဍဲဍုၚ်ဇကု ၚုဟ်မးညးဂမၠိုၚ် ဂွံရာန်စမာန်တံဂှ် ဒုၚ်လျိုၚ်သွံကဵုဟွံမာန် ဒှ်မံၚ်ရ။
ဟိုတ်ဂှ်တုဲ ပရေၚ်ထံက်ပၚ်အပ္ဍဲဍုၚ် ဟွံရုံဂပ်ဒှ်ကၠုၚ် ဟိုတ်နူအနှေန်ၚုဟ်မးသၠုၚ်တိုန်တုဲ ပရေၚ်ကၠောန်ပတိတ်ဇွောံတၟိတၟိတံဂှ် သွက်ညးဂမၠိုၚ် ရာန်စဟွံမာန် ဒှ်ကၠုၚ်မံၚ်ရ။
Ref:CAN