ဗာတဳကာန်သဳတဳ၊ အံက်တဝ်ပါ ၂၁
ပ္ဍဲကဵုဍုၚ်ဗာတဳကာန်သဳတဳ ကၠောန်ပေါဲရာဒၞာမိက်ညးဍုၚ်ကွာန် အံက်တဝ်ပါ ၁၉ ဂှ် အလုံဂၠးကဝ်မွဲကီု သီုကဵုဍုၚ်ဗမာ သွက်ဂွံကေတ်ပရေၚ်ၜိုဟ်လလမ်အိုတ်ညိဂှ် ဂဥုပ်အစာတၠဇၞော်ပုက် လဳယော ၁၄ ဟီုမြော်ဏာဂလာန်ရ။
စနူသၞာံ ၂၀၂၁ နူကဵုဂိတုမေ ပၞာန်အပ္ဍဲဍုၚ်က္တဵုဒှ်ဗွဲမသ္ကာတ်မြဟ် ပရိုၚ်နူကဵုဍုၚ်ဗမာ ဒဒှ်ရစိုတ်ဟွံခိုဟ်တဴမလောန်ရဂှ် ဂဥုပ်အစာတၠဇၞော်ပုက် ဟီုမြော်ဏာဂလာန်တုဲ ညံၚ်ဂွံဒေါအ်အာပှော်ညးသ္ကံ အာတ်မိက်ဏာရ။
ပရေၚ်ရပ်လွဟ်ဗတိုက်မံၚ်ညးဍုၚ်ကွာန်တံကဵု ဒၞာဲစမြိုၚ်မၞိဟ်ဒၟံၚ်တံကီု ဟိုတ်နူပရေၚ်ကြဳဗုမ်တံဂှ် ဒှ်ပွမအောန်အိုတ်တုဲ လ္တူရဲဒးဒုၚ်မံၚ်ဘဲပကီုပရာတ်ဏံ ညးမဒးဆဵုမံၚ်တံအိုဿီုတံ ရာဒၞာမိက်ဏာရ သာ်ဝွံ ဂဥုပ်အစာတၠဇၞော်ပုက် လဳယော ၁၄ ဟီုမြော်ဏာဂလာန်ရ။
ပရေၚ်ဒေါအ်ပန်ပှော် ဗွဲမစိုပ်တရဴပြဟ်ဟ် ညံၚ်ဂွံကၠောန်သ္ပအာ နူကဵုအပ္ဍဲကောန်တၟံ သၟိက်မိက်ဂွံထပ် အာတ်ပါန်ဂလာန်ကေုာံ နူကဵုပရေၚ်သဳကၠဳ တၠုၚ်လအာသဘဴလပါ်ခိုဟ်တံ နူဂှ်မွဲအဆံၚ် ညံၚ်ဂွံကေတ်အာပရေၚ်ၜိုဟ်လလမ်ဂှ် ဗတိုက်ဖအောဝ်ဏာ ဂဥုပ်အစာတၠဇၞော်ပုက် ဟီုမြော်လဝ်ဂလာန်ရ။
တုဲပၠန် နူကဵုဂဥုပ်အစာတၠဇၞော်ပုက် ဒၞာဲတိဍာ်သ္ပလဝ်ကၞောတ်အထောတ်အဲပရဲကီု ပေါဲပၞာန်ယူခရုၚ်ဟွံက ဟိုတ်နူပေါဲပၞာန်ဂမၠိုၚ်တုဲ ညးဒးလဝ်ဘဲဝပ်အိုဿီုနာနာ နူကဵုဒေသတၞဟ်ဟ်တံကီုလေဝ် ရာဒၞာမိက်ကဵုဏာရ။
ညံၚ်သ္ဂောံကလိဂွံ ပရေၚ်ၜိုဟ်လလမ်ဍာ်ဇမၠိၚ် တန်ကြန်ဗိုန်ညောန်အာမာန် သွက်က္ဍိုပ်သ္ကိုပ်ဂစာန်လွဳမံၚ်တံ ဂမြၚ်ဥာဏ်ပညာ ကဵု ဇဲဝဳရိယတံကီု ကျာ်ထာဝရ ညံၚ်ဂွံဇိုန်ဏှၚ်ကဵုမာန် ဂဥုပ်အစာတၠဇၞော်ပုက် ရာဒၞာမိက်ဏာကီုရ။
ကၠာဂဥုပ်အစာတၠဇၞော်ပုက် လဳယော ၁၄ ဏံ ဂဥုပ်အစာတၠဇၞော်ပုက် ဖရၚ်သေတ်ကီုလေဝ် သွက်အရာပရေၚ်ၜိုဟ်လလမ်ဍုၚ်ဗမာ ကေၚ်ရာဒၞာမိက်လဝ်ကီုတုဲ ဒဝ်အံၚ်သာန်သုကျဳ ဒးဒုၚ်ရပ်လဝ်ပ္ဍဲတဲ ကံၚ်သဳပၞာန်ဂှ် ကဵုအခေါၚ်ကၠုၚ်စ္ၜုဲစ္ၜော် ပ္ဍဲဗာတဳကာန်သဳတဳရောၚ် ကေၚ်ဟီုမြော်လဝ်ဂလာန်နွံရ။
Ref: Vaticannews