ကံမ၊ နိုဝမ်ပါ ၈
ပ္ဍဲရးမဂွေ ပွိုၚ်ဍုၚ်ကံမ ဒပ်စဵုဒၞာဒေသတံ လုပ်ဗတိုက် ဒၞာဲဗ္ဒိုပ်ဗၠာဲသၟိၚ် ယေနတာကဵု ရုၚ်စက်ကၠောန်လွဟ်မကမ် ကပစ ၁၂ ပ္ဍဲနဝ်ဝမ်ပါ ၆ ရဂှ် ညးတာလျိုၚ်လလောၚ်ပရိုၚ် တမ်ဒပ် ၄ ခရိုၚ်သရက် ကိုမျာတ်ကို ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဗ္ဒိုပ်ဗၠာဲသၟိၚ်ယေနတာ နွံမံၚ်သ္ကုတ်ဂၠံၚ် သရက်-ကံမ ညံၚ်ဂွံသီဂွံသီုဖအိုတ် ဗတိုက်လဝ်ကီုလေဝ် ဗာန်ကာ နွံမံၚ် ၆ မဂှ် သီဂွံလဝ် ၄ မဓဝ် သ္ဂးရ။
ပေါဲဗတိုက် ဗ္ဒိုပ်ဗၠာဲသၟိၚ်ယေနတာဂှ် ရဲလပါ်ကဝ်မယှေန်ပၞာန် ကောန်သ္ဂံၚ် ၇ တၠချိုတ်တုဲ ရဲဒပ်စဵုဒၞာတံဂှ် ၂ တၠ ဒးပြဟ်လလုဲအာ မဒှ်ရ။
တုဲပၠန် အခိၚ်ဗတိုက်မံၚ် ဗ္ဒိုပ်ဗၠာဲသၟိၚ်ယေနတာဂှ်တှ်ေ သီုပန်ဟပၠုပ် ဏာ မကမ်သၠောဝ်ယှိုတ် ၁၂၂ မဳလဳမဳတာ ၅ မ ဇရေၚ်ရုၚ်ကပစ ၁၂ ဂှ် ဟတိုဟ်အာ ၄ မ ပ္ဍဲကဵုဒၞာဲဟဝိုင်ရုၚ် ကပစ ၁၂ ကီု သ္ဂးရ။
ပ္ဍဲပေါဲဗတိုက်ဏံ နူကဵုကပစ ၁၂ ဟိုတ်နူပန်ဏာလွဟ်ဇၞော်ကြာန်န်ဂှ် သၟတ်ဗြဴညးဒေသ ကွာန်ညံၚ်ပေန်တာ ပွိုၚ်ဍုၚ်သရက်မွဲတၠ ဒးမကမ်လွဟ်တုဲ ဂွံအာဝပ်ဇၞော်ကဵုဇြဟတ်ရ။
“လ္ပသုၚ်စောဲသ္ကုတ်ဂၠံၚ် သရက်-ကံမညိ ပိုဲလလောၚ်လဝ်ပရိုၚ်နွံမံၚ်။ ဒဵုအခိၚ်လၟုဟ် အကာဲအရာပရေၚ်ပၞာန် တေၚ်မံၚ်ဖိုဟ်ဏောၚ်” သာ်ဝွံ ညးတာလျိုၚ်လလောၚ်ပရိုၚ် ကိုမျာတ်ကို ဟီုကဵုဌာန်ပရိုၚ် သြၚ်လောန်တိုၚ်မ်ရ။
မွဲလပါ်ပၠန် ပၞာန်ကၠုၚ်ရီု ဗ္ဒိုပ်ဗၠာဲသၟိၚ်ယေနတာ နူကဵုဒပ် ကပစ ၁၂ ကဵု ဒပ်ကဝ်မယှေန်ပၞာန် နွံလ္တူဍုၚ်ကံမတံ ဟိုတ်နူပန်စုတ်လွဟ်ဇၞော် ပ္ဍဲကွာန်ပဇေန်နိက် ကဵု ကွာန်တၟအ်ဖအုံဂှ် ညးဗြဴပိတၠဒးဝပ် ပ္ဍဲဏံမွဲတၠဂှ်ဒးဂွိၚ်မံၚ်ကဵု အန္တရာဲလမျီုနွံရ။
အခိၚ်ပေါဲဗတိုက်ဒှ်မံၚ်ဂှ် နူကဵုဒပ်ပၞာန်ကျာ ကဝ်မယှေန်ပၞာန် ပန်ကဵုဂျက်ဖိုက်တာတုဲ မကမ်ဖတုံဟတိုဟ်အာ ပ္ဍဲကဵုကရပ်ကွာန် ဇြုၚ်ကုၚ်ကဵု တေတ်ၚုက်တထံၚ်ဂှ် ဒဒန်ညးဂမၠိုၚ်စကာမံၚ် လီုလာ်အာမွဲမ ဂွံတီရ။
လောန်ကၠုၚ်ဂိတုအေဗရဴ ၂၅ ဂှ် တမ်ဒပ် ၄ ခရိုၚ်သရက် ကၠုၚ်ကေၚ်သီလဝ် ဗ္ဒိုပ်ဗၠာဲသၟိၚ်ယေနတာ မွဲဝါကီုတုဲ ရပ်ဂွံဂၠုဲပၞာန် ဒပ်ဗၠာဲသၟိၚ် ကဆံၚ်အကြာပ်ဇၞော်မွဲတၠ သီဂွံဏာသီုကဵုလွဟ်မကမ် ဂမၠိုၚ်ရ။
ပရိုၚ်-သြၚ်လောန်တိုၚ်မ်
Photo – သရက်ခရိုင် အမှတ် ၄ တပ်ရင်း