ဝါလေန်တန်၊ နိုဝမ်ပါ ၈
ပ္ဍဲကဵုဍုၚ်ဗမာ ဒဳဇြမ်ပါ ၂၈ ဏံ သ္ကိုပ်ပၞာန်တံ စဳဇန်လဝ် စကၠောန်အာပေါဲရုဲမာဲ ၂၀၂၅-၂၆ ဂှ် တးပါဲဏာရ နူကဵု စၠတ်ထဝ်နယူဇြဳလာန် လလောၚ်တြးလဝ် ပ္ဍဲနဝ်ဝမ်ပါ ၅ ဂှ်တှ်ေ ပေါဲရုဲမာဲနွံကဵုသၠးပွဓရ်ယာ ဟွံသေၚ်မ္ဂး သွက်ဂွံပတေဟ်စဂွံဒှ်ဟွံမာန် ဟီုလဝ်ရ။
တၠအဝဵုပၞာန်ဗမာ စဳဇန်လဝ်ပေါဲရုဲမာဲဂှ် ဗွဲမညဳသၟဟ် နူကဵုစၠတ်ထဝ်တးပါဲလဝ်ရောၚ် ပ္ဍဲကဵုမဳဒဳယာပရေၚ်မၞိဟ် အမာတ်စၠတ်ထဝ် ဗော်လေဗါ ဖဳလ်တွဳလ်ဖိုဒ် ချူလဝ် ပ္ဍဲကဵုနဝ်ဝမ်ပါ ၅ ရ။
ပရေၚ်ပါ်ပါဲပေါဲရုဲမာဲဂှ် နဒဒှ်အမှုရာဇဝတ် ခုတ်စၟတ်ခၞံဗ္ဒျ်ကေတ်လဝ် ဥပဒေပရေၚ်ဍဵုဍိုက်တံတုဲ ပ္ဍဲကဵုတၞးမာဲတံမ္ဂး ဗော်ဒစဵုဒစးဂမၠိုၚ် ပါလုပ်မာန်ဟွံသေၚ်ပုဟ် ညးတေံ ဟီုလဝ်ကဵု စၠတ်ထဝ် နယူဇြဳလာန်ရ။
ဗွဲကြဴပရေၚ်သီအဝဵု ၂၀၂၁ စပ်ကဵုပရေၚ်ပွမဒစဵုဒစးတံတုဲ ညးဒးဒုၚ်ရပ်လဝ် အောန်အိုတ် ၃၀၀၀၀ နွံမံၚ်ရောၚ် ဂကောံရီုဗၚ်ထံက်ပၚ် ကောန်ထံၚ်ပရေၚ်ဍုၚ်ကွာန်တံ ထမံက်ပတိတ်လဝ်ရ။
ဆက်စပ်ကဵုပရေၚ်ဍုၚ်ကွာန်ဂှ် ရပ်လဝ်မၞိဟ် ၂၂၆၀၀ နွံမံၚ်ဏီတုဲ အပ္ဍဲမၞိဟ်တံဏံ ၁၁၃၀၀ ဂှ် ဖျေံလဝ်ဒဏ်ထံၚ်တုဲအာဂှ်လေဝ် ဂကောံဏံ ထမံက်ပတိတ်လဝ်နွံရ။
လၟေၚ်တရဴ အမာတ်စၠတ်ထဝ် နူကဵုဗော်ဟွံတုပ်သၟဟ် ၃ တၠတံ ဒက်လဝ်ဂကောံဂှ် ပ္ဍဲကဵုဂိတုသိပ်တမ်ပါ ကၠုၚ်စိုပ်လ္ၚတ်လဝ်ပယျဵုသေံ-ဗမာပွိုၚ် ၉ တ္ၚဲ ဂၠိုက်ဂၠာဲဂွံတၚ်နၚ်ဍာံပြတုဲဒှ်အာတုဲ တၚ်သ္ဂုတ်သွာတ်စၠတ်ထဝ် နယူဇြဳလာန် မံက်တိတ်ကၠုၚ် မဒှ်ရ။
အမာတ်နယူဇြဳလာန်တံ အာလ္ၚတ်လဝ် ဟိုတ်နူပရေၚ်သီအဝဵု ၂၀၂၁ တုဲ ဗီုပြၚ်အကာဲအရာ ပရေၚ်ဗ္စာရဏာမၞိဟ်တံက္တဵုဒှ်မံၚ်ကဵု ပြဿနာပရေၚ်ဍုၚ်ကွာန်တံ မဒှ်ရ။
အမာတ်နယူဇြဳလာန်တံ အာဆဵုဂဗသဳကၠဳလဝ်ကဵု ဂကောံမှာဇန်နာနာတံ၊ ဂကောံရီုဗၚ်ဗ္စာရဏာပရေၚ်မၞိဟ်တံ၊ မဳဒဳယာဗၠးၜးတံ၊ ညးစၞးဂကောံအလဵုအသဳညဳသၟဟ်ကောန်ဂကူတံ ပ္ဍဲကဵုဒေသပယျဵုသေံ-ဗမာ မဒှ်ရ။
နူကဵုပေါဲရုဲမာဲမွဲအဆံၚ် သ္ကိုပ်ပၞာန်တံ သွက်သ္ဂောံဂွံပရေၚ်ထံက်ဂလာန်ဂၠးကဝ် ဂစာန်မံၚ် ညံၚ်ဂွံဒှ်ဗဗွဲလုပ်သၞောဝ်ဂှ် နကဵုစၠတ်ထဝ် နယူဇြဳလာန် ဒးဘိုၚ်ဒတူလိုင်အာ လပါ်ညးဍုၚ်ကွာန်ဗမာတံရောၚ် အမာတ်စၠတ်ထဝ် ဗော်လေဗါ ဖဳလ်တွဳလ်ဖိုဒ် ဟီုလဝ်ရ။
ပေါဲရုဲမာဲဍာံဍာံ ဒှ်ကၠုၚ်မာန်ဟွံသေၚ်တုဲ သၞောတ်တၠအဝဵုပၞာန် ညံၚ်ဂွံဒှ်လုပ်ဗဗွဲသၞောဝ် ပေါဲရုဲမာဲဏံ ရန်တၟံလဝ်မဒှ်ရောၚ် ညးဆက်ဟီုထပေၚ်လဝ်ရ။
ပရေၚ်ညးဍုၚ်ကွာန်ဗမာတံ သတ္တိနွံဂှ် နကဵုဇကု ထံက်ဂလာန်အာတုဲ ပရေၚ်ရုန်ဂစာန် သွက်ဒဳမဝ်ကရေသဳဂှ် ဒးဆက်ကဵုအာရီုဗၚ်ရောၚ် အမာတ်စၠတ်ထဝ် ဖဳလ်ဟီုလဝ် မဒှ်ရ။
Ref:DVB