ကြုၚ်ဒဵု၊ နိုဝမ်ပါ ၈
နူကမၠောန်ကျာဖျ ကောန်ဍုၚ်မ္ၚးတံ ဂြိပ်ပါဲဒဴကၠုၚ်မ္ဂး လ္ပဒုၚ်လဝ်တဲညိ ဗော်သွးကောန်ဂကူကရေၚ် KNU ပွိုၚ်ဍုၚ်ကြုၚ်ဒဵု ပတိတ်အမိၚ်ကာမံက်တိုန် ပ္ဍဲကဵုအံက်တဝ်ပါ ၅ ဂှ်ရ။
သ္ပပဓါန်ကဵု ဇြဟတ်ဒပ်ပၞာန်တုဲ သွက်ကမၠောန် ဂကောံကဝ်မယှေန်ပၞာန်ဍေံတံ ညံၚ်ဂွံဒှ်အာ ဗဗွဲသၞောဝ်မာန် စကာသုၚ်စောဲမံၚ် ပရေၚ်ပကီုပရာပ်နဲကဲစုၚ်စုၚ် ပ္ဍဲကဵုပွိုၚ်ဍုၚ်ကြုၚ်ဒဵုဂှ် နူကဵု KNU တံ ဒုၚ်ဒဝ်တဝ်စၞေဟ်တုဲ သွက်ဂွံစဵုဒၞာမၚ်မွဲအာ ညးဍုၚ်ကွာန်တံမာန် ဂစာန်လွဳပရောမံၚ်ရောၚ် လလောၚ်တြးလဝ်ရ။
အကာဲအရာပရေၚ်ပၞာန် ကြံၚ်မ္ၚဵုက္တဵုဒှ်မံၚ်ပ္ဍဲကာလလၟုဟ်ဏံမ္ဂး ပရေၚ်ဖံက်ပကဝ်အခေါင်အရာမၞိဟ်နာနာသာ် ရဲကဝ်မယှေန်ပၞာန် ကၠောန်မံၚ်တုဲ ပ္ဍဲကဵုပွိုၚ်ဍုၚ် KNU ကြုၚ်ဒဵုဏံ ဒးဆဵုဂဗမံၚ်ကဵု တၚ်ကော်ဆောပရေၚ်နာနာသာ်တံဂှ် ဒးရပ်စပ်သောၚ်ကလးမံၚ်ရောၚ် ပ္ဍဲလိက်လလောၚ်သ္ဂးလဝ်ရ။
တုဲပၠန် ပ္ဍဲကဵုဒေသပယျဵု ဒပ်ပၞာန်ဗမာ ကၠောန်လဝ်ကမၠောန် လီဠာန်သြန်အန်လိုင်တံဂှ် ထ္ၜးလဝ်ဗီုပြၚ် ညံၚ်ရဴဗတိုက်သရိုဟ်မံၚ်ဂးတုဲ ကောန်ဍုၚ်မ္ၚးဂြိပ်ဒဴကၠုၚ်လဝ် နူကဵုဒၞာဲကမၠောန်ဏံမ္ဂး ပြံၚ်ပဆုဲကဵုဒၞာဲ ဗီုပြၚ်နာနာသာ်လေဝ် နွံမံၚ်ရောၚ်သ္ဂးရ။
ဟိုတ်ဂှ်တုဲ ညးဍုၚ်ကွာန် ပွိုၚ်ဍုၚ်ကြုၚ်ဒဵုတံဂှ် အခိၚ်ဗ္တံ စနူ ၈ နာဍဳ ဒဵုကဵုနူဂယး ၆ နာဍဳ ညံၚ်ဟွံအာတရဴကီု ကောန်ဍုၚ်မ္ၚး ဂြိပ်ပါဲဒဴကၠုၚ် နူကမၠောန်လီဠာန်သြန်အန်လိုင်တံဂှ်လေဝ် ပြံၚ်ပဆုဲကဵုဒၞာဲဝါဲကီု ဒုၚ်လဝ်တဲကီု ညိလ္ပကၠောန်ညိဂှ် လလောၚ်တြးလဝ်ရ။
ပ္ဍဲကဵုပွိုၚ်ဍုၚ်ကြုၚ်ဒဵု လ္တူပရေၚ်ကြေပ်ဂြတ်ပရေၚ်ဍုၚ်ကွာန်ဒှ်မံၚ်ကီု သီုကဵုအကာဲအရာ တိဍာ်ဟွံညိၚ်ဝပ်မံၚ်ဂှ် ကေတ်အခေါင်ခိုဟ်တုဲ ယြဴပရေၚ်ဝေၚ်ဇျှၚ်လံၚ်သြန် ဝိုၚ်ဝေၚ်လဵုမှ ညံၚ်ဟွံဂွံကၠောန် ပတိတ်လဝ်အမိၚ်ရ။
ပရေၚ်ဖံက်ပကဝ်အခေါင်အရာမၞိဟ် ဒပ်ကဝ်မယှေန်ပၞာန် ဗီုပြၚ် နာနာသာ် ကၠောန်မံၚ်လ္တူညးဍုၚ်ကွာန်တံဂှ် နကဵုသတိဝိရိယ ဇကုဇကု သွက်ဂွံစဵုဒၞာမၚ်မွဲအာကေတ်တ်မာန် ပ္ဍဲကဵုသ္ၚိဒၞာဲမံၚ်တံ ရန်တၟံကဵုပရေၚ်ဂီုကၠီု ဗၠးဘဲဝပ်တုဲ ဥမၚ်အောပ်ဗုမ်တံ ဇၟာပ်ပ်သ္ၚိ ညံၚ်ဂွံကၠောန်စွံလဝ် KNU ပွိုၚ်ဍုၚ်ကြုၚ်ဒဵု ပတိတ်လဝ်အမိၚ်ရ။
အမိၚ်စေဝ်ပၞောန်ဒေသန္တရ KNU ပွိုၚ်ဍုၚ်ကြုၚ်ဒဵု ပတိတ်လဝ်ဏံ ယဝ်ရဟွံဒဂေတ်ဗက်မ္ဂး နကဵုဥပဒေ KNU ဒးဒုၚ်ကေတ်အရေဝ်ရောၚ် ပ္ဍဲလိက်လလောၚ်တြးဂှ် ချူလဝ်ရ။
ကမၠောန်လီဠာန်သြန်အန်လိုၚ်ကျာဖျ KK Park နွံမံၚ်သၠုၚ်ကျာ ဗြဝတဳ ပယျဵုသေံဂှ် စနူကဵု လဒေါဝ်ဂိတုအံက်တဝ်ပါ တုဲကၠုၚ်ဏံ ဒပ်ကဝ်မယှေန်ပၞာန်ကဵု ဒပ်မၚ်ပယျဵုကရေၚ် BGF တံပံၚ်တောဲတုဲ ကၠောန်ထ္ၜးစလဝ် ဗီုပြၚ်ဗတိုက်သရိုဟ်ဂှ် ကောန်ဍုၚ်မ္ၚးဗွဲမဂၠိုၚ် ဂြိပ်ပါဲတိတ်အာ နူကဵုဒၞာဲကမၠောန်ဏံ စိုပ်အာလပါ်တိသေံကီု လပါ်အပ္ဍဲဍုၚ်ဗမာကီု ပြံၚ်ဆုဲအာဒၞာဲတံနွံရ။
ပရိုၚ်-သြၚ်လောန်တိုၚ်မ်
Photo – Social Media