တနင်သဳ၊ နိုဝမ်ပါ ၁၃
ပ္ဍဲရးတနၚ်သဳ ပွိုၚ်ဍုၚ်တနၚ်သဳ ဍုၚ်မဝ်တံၚ် စနူနဝ်ဝမ်ပါ ၁၂ အခိၚ်နူဂယးဂှ် ဒှ်ပေါဲဗတိုက်တုဲ ညးဒေသအလုံဍုၚ်မွဲ ဒးဂြိပ်ပါဲတိတ်အာသီုဖအိုတ်ရဂှ် ညးတာလျိုၚ် KNU မဟာဒပ် ၄ တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူကဵု အခိၚ်နူဂယးဂှ် ဇြဟတ်ဒပ်ပၞာန်ဗမာ ၜိုတ် ၁၀၀ နွံမံၚ် ကရပ်ဍုၚ် ကေုာံ ဒပ် KNLA ပံၚ်တောဲလဝ်တံ ပေါဲဗတိုက်ဒှ်တုဲ ညးနွံမံၚ်အပ္ဍဲဍုၚ်သီုဖအိုတ်တံ ဒးဂြိပ်ပါဲအာလပါ်တိတ်သေံတေံ သ္ဂးရ။
နူကၠာပေါဲဗတိုက်ဟွံဂွံဒှ် ခြာၜါတ္ၚဲဂှ်တှ်ေ နူကဵုဒပ်ပၞာန်ဗမာ ဖျေံလဝ်ဒပ်ဍုၚ်မဝ်တံၚ် ပန်ထပၠုပ်ဖျေံလွဟ်ဇၞော် အပ္ဍဲဍုၚ်ဂှ် ညးဒေသတံဒးဂြိပ်ပါဲအာအိုတ်တုဲ ပ္ဍဲနဝ်ဝမ်ပါ ၁၂ ပေါဲဗတိုက် ထပ်ဒှ်ပၠန်ဂှ်ရ ညးဍုၚ်ကွာန် သှ်ေဇးမံၚ်သီုဖအိုတ် ဒးဂြိပ်ပါဲတိတ်အာရဂှ် ညးတာလျိုၚ် KNU မဟာဒပ် ၄ မွဲတၠ ဟီုရ။
ဟိုတ်နူဒှ်ပေါဲဗတိုက် ပန်မံၚ်လွဟ်ဇၞော်တံဂှ်ရ ညးဒေသမံၚ်တဝ် ၁၀၀၀ ပြၚ်တံ ဂြိပ်အာလပါ်တိသေံ ဒၞာဲသၞေဟ်ကၚ်ဂိက် ဒါန်သဳခေါန်ဂှ်လေဝ် နူလပါ်သေံဟွံကဵုအခေါၚ်လုပ်တုဲ မၞိဟ်တံမာတ်ဆိုအ်မံၚ် ကရပ်ဂိက်သၞေဟ်ကၚ် မဒှ်ရ။
အခိၚ်နူဂယးၜိုတ် ၉ နာဍဳဂှ် ၜၚ်ကျာပၞာန်ကဝ်မယှေန်ပၞာန် ၂ မ ကြဳဖျေံဗုမ်အပ္ဍဲဍုၚ်မဝ်တံၚ်ဂှ် အကာဲအရာပရေၚ်လီုလာ်တံ ဗီုလဵုနွံဂှ် ဟွံဂွံတီဏီ သ္ဂးရ။
ပ္ဍဲပေါဲဗတိုက် မွဲလပါ်ကဵုမွဲလပါ် ပန်မံၚ်လွဟ်ဇၞော် ဟတးဟတန်ကီု ထောံဖျေံမံၚ် ဗုမ်ဒရုၚ် ပေါဲဗတိုက်ဒှ်မံၚ်သ္ကာတ်မြဟ်တုဲ အကာဲအရာဒးဝပ်ချိုတ်ဂျိုၚ်တံ ဟွံဂွံတီဏီရ။
စနူကဵုနဝ်ဝမ်ပါ ၁၀ ဂှ် ဒးပါဲမံၚ်ပၞာန်ကီု လပါ်သေံလေဝ် ဟွံကဵုအခေါၚ်လုပ်တိဍာ်ညးတံတုဲ ညးဒေသဍုၚ်မဝ်တံၚ်တံ ဒးကောံမံၚ်ဒၟံၚ် ကရပ်ဗ္ဒာဲဂိက်သၞေဟ်ကၚ်ဂှ်တှ်ေ နွံမံၚ်ပၟိက်ကဵု စၞစဇွောံမနာနာ၊ ယာတ်စဵုဒၞာ၊ ဍာ်ပလးဂှ် ဂွံတီရ။
ဒပ်ပံၚ်တောဲ KNU တံ မာတ်ဆိုအ်ဗိုၚ်လဝ် ဍုၚ်မဝ်တံၚ် ၜိုတ်ပွိုၚ် ၃ ဂိတုနွံကၠုၚ်တုဲ ကရောၚ်ပၞာန်တိုန်ကၠုၚ်ဍုၚ်မဝ်တံၚ် သွက်ဂွံရီုဗၚ်ဂှ်လေဝ် ဒပ်ပံၚ်တောဲ KNLA တံ မာတ်ဆိုအ်လဝ် ပ္ဍဲကဵုကရပ်ကွာန် သိင်ခေါန်တုဲ ဆက်တိုန်ဟွံမာန်ဒှ်မံၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – CJ