တယိတ်ချံၚ်၊ နိုဝမ်ပါ ၁၃
ရးတနၚ်သဳ ပ္ဍဲကဵုပွိုၚ်ဍုၚ်တယိတ်ချံၚ် ကရောၚ်ပၞာန် ဒပ်ကဝ်မယှေန်ပၞာန် ထပက်လုပ်ကၠုၚ်ဂှ်ရ ညးဒေသဟွံအောန်နူကဵု ၁၀ ကွာန် ဒးဂြိပ်ပါဲဒဴဘဲပၞာန်တုဲ နွံမံၚ်ပၟိက်ကဵု အရီုဗၚ်စၞစဇွောံမ နာနာရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
လောန်ကၠုၚ်နူကဵု ဂိတုနိုဝမ်ပါ ၈ တေံဂှ် ဒပ်ပၞာန်ဗမာ နူကဵုလ္တူဍုၚ် တယိတ်ချံၚ် ဇြဟတ်လၟိဟ်ကဵုကၠံတံဝွံ နူကဵုဗ္ဒိုပ်ဝေန်ဝ မွဲအဆံၚ် ထပက်ကရောၚ်ပၞာန် လုပ်အာလပါ်ကွာန်မၞုံမံၚ် ပွိုၚ်ဍုၚ်တယိတ်ချံၚ် သ္ကုတ်သၟဝ်တံ မဒှ်ရ။
အတိုၚ်ညးဒေသတံဟီုလဴမ္ဂး ဟိုတ်နူကရောၚ်ပၞာန် ဒပ်ကဝ်မယှေန်ပၞာန် ထပက်လုပ်ကၠုၚ် ပ္ဍဲကဵုပွိုၚ်ဍုၚ်တယိတ်ချံၚ် သ္ကုတ်သၟဝ်ဂှ်ရ ညးဒေသ ကွာန်မေန်ဒါတ်၊ တေန်ကျွောန်၊ ဝါရေတ်၊ ကမြိုၚ်၊ ရငဲ၊ ခမံက်စာၚ်၊ ကုန်သၟိၚ်ပြေၚ်၊ ကနက်သဳရိ ၜိုတ် ၁၀ ကွာန် လၟိဟ်မၞိဟ်ကဵုလ္ၚီတံ ဒၞာဲဗၠးဘဲဒဏ်မာန်ဂှ် ဂြိပ်ပါဲအာအိုတ်ရ။
ပြဟ်ဟ်ဏံ ညးဒေသတံ ဒးဂြိပ်ပါဲမံၚ်ဘဲပၞာန်တံ ပွိုၚ်ပိတ္ၚဲလောန်ၜက်အာလဝ်ကီု လပါ်ကွာန်ကတောဲတေံလေဝ် ကၟာတ်လဝ် ဂၠံၚ်ကွဳစက်ကီုတုဲ ကွဳစက်ကပေါတ်တံ ဂၠံၚ်မာတ်အာဂှ်ရ အခိၚ်ပါဲဒဴဘဲပၞာန်ဏံ စၞစဇွောံမလေဝ်ညိညဟေၚ် ပါကၠုၚ်ကီုလေဝ် ဗီုပြေပြံၚ် ဒးပါ်ပရအ်စလဝ်မွဲစွံရဂှ် ညးဗြဴပါဲဘဲပၞာန်မွဲတၠ ဟီုလဝ်ကဵု ဌာန်ပရိုၚ်သြၚ်လောန်တိုၚ်မ်ရ။
မွဲလပါ်ဂှ်ပၠန် ရဲဒဴပၞာန်တံ ဒးဂြိပ်ပါဲကၠုၚ် ခရေက်ခရေက်ဂှ်ရ နွံမံၚ်ပၟိက်ကဵု စၞစသုၚ်ဇွောံမတုဲ မၞိဟ်ဒးတိက်မံၚ်ဒကဲဂၠံၚ်၊ သၟဝ်တမ်ဆုကဵု ပ္ဍဲကဵုဘာလကျာ်တံ နွံရ။
တုဲကၠုၚ်နိုဝမ်ပါ ၉ တေံဂှ်လေဝ် ပ္ဍဲကဵုပွိုၚ်ဍုၚ်တယိတ်ချံၚ် သ္ကုတ်သၟဝ်ဂှ် ဒပ်ကဝ်မယှေန်ပၞာန် အဃောထပက်ကၠုၚ် ကရောၚ်ပၞာန် ဒှ်ပေါဲဗတိုက်ကဵုဒပ်ပၠန်ဂတးတံတုဲ ကွာန်နွံလ္တူဂၠံၚ် ကွဳစက် ဗိက်-ထဝါဲ ပ္ဍဲကဵုကွာန်ဆက်ဆံၚ်ဂှ် သ္ၚိ ၄၂ မ၊ ပ္ဍဲကဵုကွာန် တုၚ်ကုန်ဂှ် သ္ၚိ ၃ မ ဒပ်ကဝ်မယှေန်ပၞာန် စံၚ်ပလီုလဝ်ရ။
ရးတနၚ်သဳဝွံ ပ္ဍဲကဵုဂိတုအံက်တဝ်ပါဂှ် ပေါဲဗတိုက် အကြာဒပ် ကဝ်မယှေန်ပၞာန်ကဵု ဂကောံဇြဟတ်ပၠန်ဂတးတံသၟးဟွံက ဟိုတ်နူ ဒရုၚ်ကဵု လွဟ်ဇၞော်ကဝ်မယှေန်ပၞာန်တံ ပန်မံၚ်ဂှ်တုဲ ညးဒေသ ၈၀၀၀၀ ပြၚ် ဒးဂြိပ်ပါဲလဝ်နွံ အတိုၚ်လိက်ဒုၚ်စဳရေၚ် ဂကောံသုတေသန FE5 Thanintharyi ဂွံတီလဝ်ရ။
ပရိုၚ်-သြၚ်လောန်တိုၚ်မ်
Photo CJ