မတ်မလီု ၊ နိုဝမ်ပါ ၁၃
ပ္ဍဲကဵုတွဵုရးမန် ကဝ်မယှေန်ပၞာန် သွက်ဂွံကၠောန်ပေါဲရုဲမာဲ အခိၚ်ညောန်ကြပ်ကၠုၚ်မံၚ်ကီုလေဝ် သွက်ယိုက်ဂၠေၚ်ဝန်ပၞာန် ညံၚ်ဂွံ ပကောံကဵုကောန်ပၞာန်တၟိတံဂှ် သ္ကိုပ်အုပ်ဓုပ်တံ ဒးဒုၚ်ကဵုဇြဟတ်ဟရိုဟ် အဆက်က်ရောၚ် သ္ကိုပ်ပရေၚ်အုပ်ဓုပ် ဟွံမိက်ထမံက်ယၟုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အလုံဍုၚ်မွဲ ပေါဲဗတိုက်ဒှ်မံၚ်ဇၟာပ်ဒၞာဲတုဲ ကဝ်မယှေန်ပၞာန် နွံမံၚ်ပၟိက် ကဵုကောန်ပၞာန်တၟိ ဗွဲမဂၠိုၚ်ကီု သွက်ပေါဲရုဲမာဲဍေံတံလေဝ် ဒးထပ်ကေတ်မံၚ် ဇြဟတ်ဂီုကၠီုနွံမံၚ်ကီုတုဲ သွက်သ္ဂောံဂွံ ကောန်ပၞာန်တၟိ ယိုက်ဝန်ပၞာန်တံဂှ် သ္ကိုပ်အုပ်ဓုပ်တံ ဒးဒုၚ်ကဵုမံၚ်ဇြဟတ်ဟရိုဟ် မဒှ်ရ။
အခိၚ်ကၠာတေံ သွက်ဂွံအာတန်ဗတောန်ယိုက်ဝန်ပၞာန်ဂှ် ထပက်အဇာလိၚ်ကေတ်မၞိဟ်ဂွံကီုလေဝ် ဗွဲကြဴဏံ တိုန်ဘာကွတ်ပၞာန် စှ်ေဘာတန်ဗတောန်တုဲဗက်ဟွံဂတာပ် မွဲအလန်ဓဝ်ပလံၚ်ဗစိုပ်ဏာမုက်ပၞာန်ဂှ်ရ ချိုတ်ဂၠိုၚ်အာတုဲ သွက်ဂွံထပက်ပၠုပ် မၞိဟ်အဇာတံ ဂၠာဲဝါတ်ဂါတ်အာရ။
သ္ကိုပ်ပရေၚ်အုပ်ဓုပ် ဟွံမိက်ထမံက်ယၟုမွဲတၠဂှ်တှ်ေ အခိၚ်ကြပ်မံၚ်ကဵုပေါဲရုဲမာဲကီုလေဝ် သွက်ဂွံတိုန်ဘာပၞာန် ညံၚ်ဂွံ ဂၠာဲပကောံမၞိဟ်တၟိဂှ် ဘပဠ ရပ်ဓရတ်မံၚ်လေဝ်နွံမံၚ်ရောၚ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“လၟုဟ်ဗီုလဵုဒှ်မံၚ်ရောဟီုတှ်ေ သွက်ဂွံတိုန်ဘာပၞာန် ယိုက်ဝန်ပၞာန် မၞိဟ်တၟိ ညံၚ်သ္ဂောံဂွံ ဒးဂၠာဲကဵုဏောၚ်။ အတိုၚ်ဗီုတြေံတေံ ခုတ်လဝ်လၟိဟ်မၞိဟ်ဂှ် ညံၚ်ဂွံပေၚ်။ ပဵုအာလေဝ်ဂွံ။ ဟွံဂွံမၞိဟ်တၟိဟွံဂွံညံၚ်ဟွံဂွံဒှ် ဒးဂၠာဲကဵုတွဵုရောၚ်။ ဟွံဂွံတှ်ေ ဒးဒုၚ်ကေတ်အရေဝ်ဏောၚ် မုဏောၚ်။ အခိၚ်ကၠာတေံ ဗက်ဂၠာဲလိၚ်ကေတ်မၞိဟ်ဂွံ။ လၟုဟ်ညးလဵုမွဲမှ ဟွံမိက်ဂွံကၠောန်ရတှ်ေ ဗီုလဵုဂွံဗက်ဂၠာဲကဵုရော ဟွံတီ” သာ်ဝွံ သ္ဂးရ။
တုဲပၠန် သွက်ဂွံဂၠာဲမၞိဟ်တၟိ ကဝ်မယှေန်ပၞာန် ကဵုမံၚ်ဇြဟတ်ဟရိုဟ်တုဲ သ္ကိုပ်ပရေၚ်အုပ်ဓုပ်ကွာန်/အရာပ်လ္ၚဵု ဗက်ရပ်သၟတ်တံ နနဲအဓ္ဓမကီု၊ ပလံၚ်လိက်ရုၚ်ကော်ကီု၊ ကဵုဂၠံက်ကေတ်မာဲတံ ကၠောန်မံၚ်နွံဂှ် ညးဆက်ဟီုရ။
သွက်ဂွံယိုက်ဝန်ပၞာန်ဂှ် စနူကဵုရဲဒဳကွဳလိုန်ဓါတ်ကေဝ်လ်ရဳတံဂှ် သ္ကိုပ်ပရေၚ်အုပ်ဓုပ်တံ ကဵုသြန်စန်ဒက်မံၚ်ဂှ်ကီု ပကောံကေတ် အတေၚ်အဓ္ဓမဂှ်တုဲ သၟတ်ဗွဲမဂၠိုၚ်ဒးဂြိပ်ပါဲဒဴအာလေဝ်နွံရဂှ် ညးဒေသမွဲတၠဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“လပါ်သ္ကုတ်ဏံ ရဲလိၚ်ဒဳကွဳလိုန်ဓါတ်တံလေဝ် ကဵုသြန်တုဲစန်ဒက်မံၚ်၊ ဆၜိုတ်ဒးအာပရေၚ်ဂီုကၠီုသၟးရဏောၚ် ဟီုမံၚ်နွံ။ ပရေၚ်ဍေံတံ ဂၠာဲပကောံကောန်ပၞာန်တၟိဟီုဂှ် တက်ပကဝ်ထောံ ဘဝသၟတ် ကောန်ဍုၚ်ပိုဲတံရ။ ပကောံကေတ်အတေၚ်အဓ္ဓမတုဲ သၟတ်လ္ၚဵုတိတ်အာဍုၚ်မ္ၚးဂၠိုၚ်မံၚ်။ သၟတ်လ္ၚဵုယၟုပါမံၚ်ပ္ဍဲစရၚ်။ ယၟုပါဟီုမ္ဂး ဂြိပ်ပါဲအာဖအိုတ်ရ”သာ်ဝွံ သ္ဂးရ။
ပ္ဍဲအကြာဒေသဂှ်လေဝ် ညးနွံသၟဝ်တဲကဝ်မယှေန်ပၞာန်တံ အခိၚ်ဗတမ် ဗက်ဂၠာဲရပ်မံၚ်သၟတ်တံဂှ်ကီု၊ ဒၞာဲမွဲကွဳလိုန်ဓါတ် ညးတြုံၜါတၠဍိုက်ဟွံဂွံဂှ် ယဝ်ဍိုက်မ္ဂး ဒးဒုၚ်ရပ်ကီု အခိၚ်အာ/စဴ နူကမၠောန်လေဝ်ဒးရပ်တုဲ ပကောံစုတ်ဏာကောန်ပၞာန်တၟိ မဒှ်ရ။
အတိုၚ်ဗီုပြၚ်ဏံ ကဝ်မယှေန်ပၞာန်ထ္ၜးဟိုတ်နာနာတုဲ ရပ်ကေတ် သၟတ်တံပကောံမံၚ်ကောန်ပၞာန်ဂၠိုၚ်တိုန်ဂှ်တုဲ သၟတ်ဗွဲမဂၠိုၚ် တိတ်အာဍုၚ်ဇိုၚ်ဝုတ်ဒိုဟ်ဂၠိုၚ်မံၚ်တုဲ နူကဵုဂၠံၚ်ဍာန်ဟွံလုပ်သၞောဝ် လုပ်အာဂှ်တှ်ေ ဒးဒုၚ်ရပ်မံၚ်မွဲဏှမွဲဏှ နွံကီုရ။
အတိုၚ်တင်နၚ် ဌာန်ပရိုၚ်သြၚ်လောန်တိုၚ်မ် ကံက်လဝ်တၚ်နၚ်မ္ဂး ပ္ဍဲကဵုတွဵုရးမန် စနူကဵုဘာတန်ဗတောန် ယိုက်ဂၠေၚ်ဝန်ပၞာန် နူကဵုလၟေၚ် ၁ ဒဵုကဵု လၟေၚ် ၁၈ သၟတ်လုပ်အဝေါၚ် ယိုက်ဝန်ပၞာန် ဟွံအောန်နူကဵု ၃၃၀၀ ဒးဒုၚ်ပကောံလဝ် ကောန်ပၞာန်တၟိ တုဲတုဲရ။
ပရိုၚ်-သြၚ်လောန်တိုၚ်မ်
Photo – MOI