မတ်မလီု ၊ ဒဳဇြမ်ပါ ၆
ပ္ဍဲကဵုတွဵုရးမန် ဂကောံဒပ်မၚ်ကွာန် သၟဝ်တဲကဝ်မယှေန်ပၞာန် ညးဒေသတံကော်ခဴစ ပျူသဝ်ထဳတံဂှ် လ္တူညးဍုၚ်ကွာန် မွဲတ္ၚဲတုဲမွဲတ္ၚဲ ပရေၚ်ကေတ်ဇၞးသ္ပမာန်ကြီုကြတံ ပဵုတုဲ ပရေအ်ကၠုၚ်မံၚ်ကွေံကွေံ ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပျူသဝ်ထဳ သၟဝ်တဲကဝ်မယှေန်ပၞာန်တံဂှ် ဗိုက်လတက်ကျိုၚ်လဝ် ကယျိုၚ်ကောန်ပၞာန်ဍေံတံတုဲ လ္တူညးဒေသတံဂှ် ထ္ၜးသေနာတ် ဘပဠမံၚ်ဂှ်ကီု၊ ကညာၚ်လက်ဆောမံၚ်သၟးဟွံက သီုကဵု ၜုၚ်တက်လဝ်တံနွံမံၚ် ထေၚ်ၚ်လဵုလဵုကၠးကၠးမးမးရ။
တုဲပၠန် ထ္ၜးဟိုတ် ဟွံသင်ကာပုဟ်ဂးတုဲ ရပ်သၟတ်လ္ၚဵုတံ ကဵုအာအာတ်နုက်ကဵုသြန်တံကီု၊ ကဵုသြန်ဟွံမာန်မ္ဂး ပလံၚ်ဗစိုပ်ဏာ ဘာတန်ဗတောန်ယိုက်ဝန်ပၞာန်သၟးဟွံက စကာသုၚ်စောဲနဲကဲနာနာ သာ်တုဲ ကေတ်ဇၞးသ္ပမာန်ရဂှ် ညးဒေသတံ သ္ဂးရ။
ညးလုပ်ဂကောံပျူသဝ်ထဳ သၟဝ်တဲကဝ်မယှေန်ပၞာန်တံဂှ် ဒှ်ရဲဂတာကွာန် ဟွံလုပ်အဝေါၚ်မၞိဟ် ညးစကာသုၚ်စောဲ ဟွံဂွံတံတုဲ ယဝ်ရံၚ်ဗဵုဒးအာ ဗီုဍေံတံဗိုက်လတက်လဝ် ယူနဳဖံၚ်မ္ဂး ဂၠာဲတိုန်ပြဿနာမာန်ရောၚ်ဂှ်လေဝ် ညးဒေသမန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“လၟုဟ် ပ္ဍဲအရာပ်လ္တူဍုၚ် ဟီုသောၚ်ၚ်တှ်ေ ဍဵုဍိုက်ဍေံတံတုဲဟီုဟွံသေၚ်ပုဟ်။ ကၠာတေံ ဍေံတံဟွံလုပ်အဝေါၚ်မၞိဟ်ပုဟ်။ ညးလေဝ် စကာဟွံဂွံပုဟ်။ အကြာမၞိဟ်ညိလေဝ်ထပိုက်ဟွံမာန်ပုဟ် လၟုဟ်ဗိုက်တိုန်ယူနဳဖံၚ်တုဲ ဍေံတံတတ်ကၠုၚ်အကြာဇကုတုဲ ဗဵုရံၚ်ဒးအာမ္ဂး ၝမုပရံၚ်အဲရော ညံၚ်ကဵုမၞိဟ်ပရီုအကြာန်၊ ဂဥုပ်သ္ကိုပ်ပၞာန်ဇၞောန်မေန်အံၚ်လှိုၚ် တတ်ကၠုၚ်ကရပ်ပိုဲ ပိုဲရံၚ်ဒးညးဂှ် မုဒုဟ်လေဝ်ဟၟဲပုဟ်လေဝ်” သာ်ဝွံ သ္ဂးရ။
တုဲပၠန် အခိုက်ပျူသဝ်ထဳတံဏံဂှ် သုၚ်အရက် ဗၜူဓလူမံၚ်လၟိုန်တုဲ သၟတ်ညးတြုံတံသၟးဟွံက သီုညးဗြဴတံလေဝ် ဍေံတံဟီုဂးလက်ဆော ဘပဠ ဗီုဍေံတံဒးစိုတ် ဍေံတံကြာန်မံၚ်ကွေံကွေံရောၚ် ညးဆက် ဟီုရ။
ပျူသဝ်ထဳတံဂှ် ဒက်ဂကောံတုဲ သ္ပမၞိဟ်ပရီုဗက်ဂၠာဲပြဿနာကီု၊ အကြာတ္ၚဲတံဏံ မိက်ဂွံထ္ၜးစအဝဵုတုဲ ရပ်စပ်ၜုၚ်တက်လဝ် သၟတ်မွဲတၠဂှ် ဒးပတိုန်စွံလဝ်ရုၚ်ဂဥုဲနွံမံၚ် ညးဒေသမန်မွဲတၠပၠန်ဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဍေံတံ ဂၠာဲပြဿနာဏောၚ်၊ ဂၠာဲတုဲ ကြီုမံၚ်ညးမွဲဓဝ်ဟွံသေၚ်ပုဟ်။ ဒှ်ယျတှ်ေ ဍေံတံဆက်ဖုၚ်ဏောၚ်။ နူကဵုအတေံအဏံ ကောံတုဲစှ်ေကၠုၚ်ကဵုကွဳစက်ဇၞော်ဍောတ်တံဏောၚ်။ ဒုက်ဏောၚ်။ မွဲတ္ၚဲဂှ် သၟတ်မွဲ မုလေဝ်ဟွံဆေၚ်ပုဟ်။ ပ္ဍဲဝိုၚ်အာန်ဂလုၚ် လုက်ဒးအာ။ ဍေံဒုၚ်ဂုဏ်တုဲ ပြေစိုတ်ဂွံမံၚ်ရ။ ဆဂး ဗိုက်လဝ်ယူနဳဖံၚ်တုဲမှ မိက်ဂွံထ္ၜးပါဝါ ရပ်စာဲဍေံ။ ၜုၚ်တက်ဍေံ။ ဇုတ်ဒကဲကဝ်အာ၊ လၟုဟ်ဒးပတိုန်လဝ်ရုၚ်ဂဥုဲ” သာ်ဝွံ သ္ဂးရ။
အခိၚ်ကဝ်ယှေန်ပၞာန်သီအဝဵုတုဲ ဗွဲကြဴဏံ ထ္ၜးဟိုတ်ပရေၚ်ဂီုကၠီုတုဲ အပ္ဍဲဒေသတံမ္ဂး ပကောံဟလိုၚ်ကေတ် ဇြဟတ်ပျူသဝ်ထဳ ညးဒေသတံ ကော်ခဴစ ဒပ်မၚ်ကွာန် (ပြည်သူ့စစ်) ဗွဲမဂၠိုၚ်နွံမံၚ် မဒှ်ရ။
ပြဟ်ဟ်ဏံ ပျူသဝ်ထဳတံ ပံၚ်ကဵုဒပ်ဗၠာဲသၟိၚ် သၟဝ်တဲကဝ်မယှေန်ပၞာန် တံတုဲ ထ္ၜးစဇြဟတ်ဂေတ်ဂေၚ်မံၚ်ဂှ်ကီု၊ မာတ်ဆိုအ်ဗက်ဂၠာဲ စၟဳစၟတ် မံၚ်တံ စၟဳစၟတ်စရၚ်ကၟုဲကီု သီုကဵုကေတ်ကဵုမံၚ်ပရေၚ်ဂီုကၠီု ဝိုၚ်ဝေၚ်တံ ကီုရ။
ပ္ဍဲကဵုတွဵုရးမန် ထ္ၜးလဝ်ဟိုတ်ကဵု ပရေၚ်ဂီုကၠီုတုဲ ကဝ်မယှေန်ပၞာန် ပံက်စွံလဝ် ဂကောံပျူသဝ်ထဳဗွဲမဂၠိုၚ်ကီုလေဝ် ပရေၚ်ပၠံၚ်ၜးတံ ပရေၚ်ပန်ဂစိုတ်မၞိဟ်တံ ပရေၚ်ဒမၠဗတိုက်တံ မွဲဏှမွဲဏှ က္တဵုဒှ်မံၚ်ဖိုအ်ရ။
ပရိုၚ်-သြန်လောန်တိုၚ်မ်
Photo – MOI