ရေဝ်၊ ဒဳဇြမ်ပါ ၆
ပ္ဍဲကဵုဒၞာဲ ဒပ်ပၠန်ဂတးတံ ဇြဟတ်ချဳဒရာၚ်ခိုဟ် ပွိုၚ်ဍုၚ်ရေဝ်ဂှ် သွက်ပေါဲရုဲမာဲကဝ်မယှေန်ပၞာန် ကၠောန်အာဏံ ဗော်ပရေၚ်ဍုၚ်ကွာန် စှ်ေစန်ဒက်တံၚ်ဂြဲမာဲ ပ္ဍဲကဵုဗလးတိ ဟၟဲဏီပုဟ်ဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သွက်အလံၚ်အမာတ်တံ ဂွံတံၚ်ဂြဲမာဲ သွက်ပေါဲရုဲမာဲဂှ် စနူကဵုဂိတု အံက်တဝ်ပါ ၂၈ ဒဵုစိုပ်ဒဳဇြမ်ပါ ၂၆ ကဝ်မယှေန်ပၞာန် ခုတ်စၟတ်ကဵုလဝ် ပွိုၚ် ၆၀ တ္ၚဲရ။
ဆဂး ဒဵုကဵုဒဳဇြမ်ပါ ၅ ဂှ် ပ္ဍဲကဵုပွိုၚ်ဍုၚ်ရေဝ် ဗော်ပရေၚ်ဍုၚ်ကွာန်တံ ဗစူဂတဵုမုက်ကီု စှ်ေဗလးတိတံၚ်ဂြဲမာဲကီု ညိလေဝ်ဟၟဲဏီပုဟ် အတိုၚ်ညးဒေသတံ ဟီုလဝ် ဂွံတီကေတ်ရ။
အပ္ဍဲဏံ ဗော်ပျဳခိုၚ်ဖျိုဝ် ဒုၚ်ယံက်ဒပ်ပၞာန်ကေုာံ ဗော်ညဳသၟဟ်မန် MUP ဇၞးလဝ်မာဲ အလုံပွိုၚ်ဍုၚ်ရေဝ်ဖအိုတ် ပ္ဍဲကဵုပေါဲရုဲမာဲ ၂၀၂၀ ဂှ်လေဝ် ဗစူဂတဵုမုက်ဗော်ညးတံ ဟၟဲဏီရ။
နကဵုတင်တၟေၚ်မွဲမ္ဂး ပ္ဍဲကဵုဂတမုက်သ္ၚိ အလံၚ်အမာတ် ဥူမျိုဝ်အံၚ် ဗော် “အမျိုးသားအကျိုးစီးပွား တိုးတက်ရေးပါတီ” ဂှ်တှ်ေ သွက်တံၚ်ဂြာဲမာဲ ဗစူစွံလဝ်ဂတဵုမုက်ဗော်ညးနွံမံၚ်ရောၚ်ဂှ် ဂွံတီနူကဵု ညးဒေသတံရ။
ဗော်ပရေၚ်ဍုၚ်ကွာန်တံ ဟွံဂံၚ်တံၚ်ဂြဲမာဲဂှ် ဟိုတ်နူဒပ်ပၞာန်ကဵု ပရေၚ်ဂီုကၠီုဟွံမာန်ကီု၊ ဒၟာနူကဵု ဒပ်ပၠန်ဂတးတံဇြဟတ်ချဳဒရာၚ် ခိုဟ်မံၚ်ရောၚ်ဂှ် ညးဒေသတံဟီုမံၚ်အိုတ်ရ။
တုဲကၠုၚ်ဒဳဇြမ်ပါ ၃ တေံဂှ်လေဝ် ပ္ဍဲဒေသခေါဇာ ပွိုၚ်ဍုၚ်ရေဝ်ဂှ် သွက်ဂွံဒစဵုဒစးအာ ပေါဲရုဲမာဲကဝ်မယှေန်ပၞာန်ဂှ် ဒပ်ပၠန်ဂတးတံ ဗတိုက်ဖအောဝ် ဆဝ်ဗ္ၚုဟ်ကၠုၚ်လဝ်ရောၚ် ဂွံတီရ။
ပ္ဍဲတွဵုရးမန် ပွိုၚ်ဍုၚ်ရေဝ် သွက်ဂွံလုပ်ပြိုၚ်အာ ပေါဲရုဲမာဲ ကဝ်မယှေန်ပၞာန်ဂှ် အလံၚ်အမာတ် နူကဵုဗော်ပရေၚ်ဍုၚ်ကွာန် ၈ ဗော်တံ ပတိုန်လဝ်စရၚ်နွံရ။
ပရိုၚ်-သြန်လောန်တိုၚ်မ်
Photo – CJ