နေပျဳတဝ်၊ ဒဳဇြမ်ပါ ၁၂
ပ္ဍဲကဵုဍုၚ်ဗမာ ကမၠောန်ကျာဖျ ညိမှညံၚ်ဟွံဂွံဖျေံသ္ဇိုၚ်ဂးတုဲ ပံက်ဏာကမ္မတဳဗဟဵု ကော်ကာဲဗတိုက်သရိုဟ် ပရေၚ်လီသြန်အန်လိုၚ်ကေုာံ ဝေင်ဇျှၚ်လံၚ်သြန်အန်လိုၚ်ရဂှ် ကဝ်မယှေန်ပၞာန် လလောၚ်တြးလဝ် ပ္ဍဲကဵုဒဳဇြမ်ပါ ၁၀ ရ။
ဝန်ဇၞော်ဌာနကေၚ်ကာအပ္ဍဲဍုၚ် ဒုသ္ကိုပ်ပၞာန်ဇၞော် ထောန်န်နံၚ်ဂှ် ဥက္ကဌ၊ ဝန်ဇၞော်ဍုၚ်သ္အာၚ်ကဵု ဝန်ဇၞော်လဝကတံ နဒဒှ် ဒုဥက္ကဌ ကေတ်တာလျိုၚ် သ္ကိုပ်သ္ကအာ ကမ္မတဳဏံရောၚ်။
ညးပါလုပ်ဂကောံကမ္မတဳတံဂှ်တှ်ေ ဥက္ကဌဗာန်ဗဟဵု၊ သ္ကိုပ်ဝန်ဇၞော် ရးကဵုတွဵုရး၊ သ္ကိုပ်ဌာန်ရးပၞာန်တံကီု နကဵုညးပါလုပ်ဂကောံ သီုဖအိုတ် ၁၆ တၠ ဒက်ပ္တန်လဝ်တုဲ နဒဒှ် ညးအုပ်ကာကမ္မတဳဂှ် ဒုဝန်ဇၞော် ကေၚ်ကာအပ္ဍဲဍုၚ် ကေတ်အာတာလျိုၚ် မဒှ်ရ။
သွက်ဂွံထပိုတ်ကၠေံရိုဟ်ကၞက် ပရေၚ်လီသြန်အန်လိုၚ်ကေုာံ ဝေင်ဇျှၚ်လံၚ်သြန်အန်လိုၚ်တံမာန် နူကဵုကမ္မတဳဏံ ဖျေံကဵုမူဝါဒကီု၊ ဗီုပၟိက်က္တဵုဒှ်ထပ်ပံက်ကမ္မတီ၊ ချူဓဇက်နဲကဲပရေၚ်ကမၠောန်နာနာ၊ ဒးပါ်ပရအ်ကဵု တာလျိုၚ်လၟေၚ်ကမၠောန်တံရောၚ် ချူလဝ်ရ။
တုဲပၠန် ကောန်ဍုၚ်မ္ၚးဗွဲဟွံလုပ်သၞောဝ် စိုပ်မံၚ်ဒၞာဲကမၠောန်ကျာဖျတံ သွက်ဂွံကလေၚ်သၠောဲပအပ်ကဵု ဍုၚ်မဆေၚ်စပ်ကေုာံ ပံၚ်တောဲအာ ကဵု ဍုၚ်ဂၠးကဝ်တံတုဲ ဗတိုက်သရိုဟ်အာရောၚ်ဂှ် ဟီုလဝ်ရ။
ပံက်လဝ်ကမ္မတဳဏံဂှ်တှ်ေ ကမၠောန်ကျာဖျတံဏံ ညိလေဝ် ညံၚ်ဟွံဂွံဖျေံသ္ဇိုၚ် ပ္ဍဲကဵုဍုၚ်ဗမာဂှ် ပညဳပညပ်ပံၚ်တောဲ ရေၚ်တၠုၚ်အာကဵု ဂကောံဇြဟတ်အပ္ဍဲဍုၚ်သၟးဟွံက သီုကဵုအလဵုအသဳ ဍုၚ်ဂၠးကဝ်တံရောၚ် ကဝ်မယှေန်ပၞာန် သ္ဂးလဝ်ရ။
ပြဟ်ဟ်ဏံ နူကဵုကဝ်မယှေန်ပၞာန် သရိုဟ်မံၚ်စမြိုၚ်ဒၞာဲ ပ္ဍဲကဵု KK Park ကဵု ဍုၚ်တၟိယှိုဲကုက်ကို ဒၞာဲဒပ်မၚ်ပယျဵုကရေၚ် BGF ထိၚ်ချုက်လဝ်ဂှ်တုဲ ကောန်ဍုၚ်မ္ၚးမွဲဠက်ပြၚ်ၚ် စိုပ်ကၠုၚ်လဝ် ဗဗွဲသၞောဝ်ဟွံသေၚ်တံဂှ် နူကဵုဍုၚ်သေံမွဲအဆံၚ် သၠောဲပြံၚ်ကဵုလဝ်နွံရဂှ် လလောၚ်ပတိတ်လဝ်ပရိုၚ်ရ။
ပရိုၚ်-သြင်လောန်တိုင်မ်
Photo – Social Media