မတ်မလီု ၊ ဒဳဇြမ်ပါ ၁၂
ကၠောန်လဝ်ပရေၚ်ချဳဒရာၚ် ဗကပ်ဗဗေၚ်ရမျှာၚ်သ္ၚိတ်တ် အလုံဍုၚ်မွဲဝွံ တက်ပကဝ်ထောံပေါဲရုဲမာဲအလီကေုာံ ကဝ်မယှေန်ပၞာန်မိက်ဂွံဒှ် လုပ်ဗဗွဲသၞောဝ်တံမာန်ယျရောၚ် အလဵုအသဳညဳသၟဟ်ကောန်ဂကူ NUG ကဵုလဝ်သမ္တီရ။
ပ္ဍဲဒဳဇြမ်ပါ ၁၀ တ္ၚဲအခေါၚ်အရာမၞိဟ်ဂၠးကဝ် ကၠောန်လဝ်ပရေၚ်ချဳဒရာၚ် ဗကပ်ဗဗေၚ်ရမျှာၚ်သ္ၚိတ်တ်တံဂှ် သီုကဵု ညးဍုၚ်ကွာန်တံပါလုပ် ဗွဲမအံၚ်ဇၞးတုဲ NUG ပလံၚ်ဗစိုပ်တၞးလိက်ပတိုန်စရာဲ လလောၚ်တြးလဝ် ပ္ဍဲကဵုတ္ၚဲဂှ်ရ။
စနူကဵုအခိၚ်နူဂယး ၁၀ နာဍဳ ဒဵုကဵုသဝ်တ္ၚဲ ၃ နာဍဳ နကဵုဗီုပြၚ် မာတ်ထောံဆေင်ဖျာကီု၊ ဟွံအာလ္တူဂၠံၚ် မံၚ်ဒၟံၚ်ပ္ဍဲသ္ၚိသ္ၚိတ်တ်တံ ထပ်ထ္ၜးလဝ်သက်သဳ ပၠန်ဂတးတံမာန်ယျ သ္ဂးရ။
ကၠောန်လဝ်ပရေၚ်ချဳဒရာၚ် ဗကပ်ဗဗေၚ်ရမျှာၚ်သ္ၚိတ်တ်တုဲ ပေါဲရုဲမာဲအလီကဝ်မယှေန်ပၞာန် ဟွံလုပ်ဗဗွဲသၞောဝ်တံဂှ် ဆန္ဒညးဍုၚ်ကွာန်တံ ညိလေဝ်ဟွံပါလုပ် ထမံက်ပတိတ်မာန်ကၠုၚ်လဝ် ခိုၚ်ၚ်ကၠိုက်က်မာန်တုဲ တက်ပကဝ်ထောံ ဂုဏ်သိက္ခာ ပေါဲရုဲမာဲအလီကေုာံ ကဝ်မယှေန်ပၞာန် မိက်ဂွံဒှ်လုပ်ဗဗွဲသၞောဝ်မာန်ယျဂှ် ပ္ဍဲလိက်လလောၚ်တြးဂှ် ချူလဝ်ရ။
ပေါဲရုဲမာဲ ပ္ဍဲကဵုဒေသတိဍာ် ကဝ်မယှေန်ပၞာန်အုပ်ဓုပ်လဝ်တံဂှ် ဗဒေါအ်အာဟွံမာန်ပုဟ် ညးလ္ၚတ်ပရေၚ်ဍုၚ်ကွာန် ဥူကျဳမျေအ် ဟီုကဵုဌာန်ပရိုၚ်သြင်လောန်တိုင်မ်ရ။
“ဍေံတံ(ကဝ်မယှေန်ပၞာန်) ပန်တၠ ကၠုၚ်ကဵုမာဲတှ်ေလေဝ်တုဲရ ဟီုလဝ်တုဲတုဲလေဝ်၊ ၄ တၠဓဝ် ကၠုၚ်ကဵုလေဝ်ဂွံ။ ဟိုတ်ဂှ်ရ ဗဒေါအ်ဏာ ပရေၚ်ဏံမာန်ဏောၚ် ဟွံထေၚ်ပုဟ်။ ပ္ဍဲကဵုဒၞာဲပရေၚ်အုပ်ဓုပ်ဍေံတံ တိဍာ်နွံသၟဝ်ပၠံၚ်လွဟ်သေနာတ်ဍေံတံဂှ် အာဗဒေါအ်ထောံမာန်ဏောၚ် ဟွံထေၚ်ပုဟ်” သာ်ဝွံ သ္ဂးရ။
ပ္ဍဲကဵုသၞောဝ်ဥပဒေ ပေါဲရုဲမာဲဍုၚ်ဗမာဂှ် ညးကဵုမာဲအောန်အိုတ် နွံမူစိမှအံၚ်ဇၞးရောၚ်ဂှ် ကေၚ်ချူခၞံစုတ်လဝ်ဟၟဲပုဟ်။ စိုတ်ဟွံလုပ်စကဵု ပေါဲရုဲမာဲပုဟ်ဂှ် ညးဍုၚ်ကွာန်တံ ဟီုလဝ်ရ။
ဆဂး ပြဟ်ဟ်ဏံ ဆန္ဒမာဲဒစးဒုၚ် နူကဵုကောန်ဍုၚ်ဗမာစိုပ်မံၚ်ဍုၚ်သအာၚ်လ္ၚဵုတံကဵု ကွးဘာတက္ကသိုလ် ဒဳဂရဳကဝ်လိက် နွံမံၚ်သၟဝ်တဲကဝ်မယှေန်ပၞာန်တံဂှ် ဂွံလဝ်လၟိဟ်ကဵုဠက် တုဲမံၚ်ယျ။
တုဲကၠုၚ် ဂိတုနဝ်ဝမ်ပါ ပ္ဍဲကဵုအခိၚ်စၟတ်ပိုၚ်ခြာလဝ်ဂှ် ကွးဘာတက္ကသိုလ် ဒဳဂရဳကဝ်လိက် ၂၈၃၃၉ တၠတံ ကၠုၚ်စုတ်လဝ်မာဲဒစးဒုၚ် တုဲအာယျရောၚ် လိက်ပရိုၚ်ကၟိန်ဍုၚ် ဒပ်ပၞာန်ထိၚ်လဝ်တံ ချူလဝ်ရ။
တုဲပၠန် သွက်ပေါဲရုဲမာဲဂှ် ကောန်ဍုၚ်ဗမာစိုပ်မံၚ်ဍုၚ်မ္ၚးတံ ညံၚ်ဂွံကဵုမာဲဒစးဒုၚ်မာန် ပ္ဍဲရုၚ်ကလုတ်၊ ရုၚ်ဂကောံညးစၞးလၟိန်ကေုာံ ရုၚ်ကလုပ်ပၞာန် ၅၀ တံမ္ဂး ကဵုကၠုၚ်လဝ်မာဲလၟေၚ်ၚ် တုဲကၠုၚ်ရဂှ် ကဝ်မယှေန်ပၞာန် လလောၚ်တြးလဝ်ပရိုၚ်ရ။
အတိုၚ်လၟေၚ်ကမၠောန်တံဏံမ္ဂး ပ္ဍဲကဵုရုၚ်ကလုတ်၊ ရုၚ်ဂကောံ ညးစၞးလၟိန်ကေုာံ ရုၚ်ကလုပ်ပၞာန် ၄၁ ရုၚ်တံဂှ် ကၠောန်လဝ် ပရေၚ်ကဵုမာဲဒစးဒုၚ်တုဲကီုလေဝ် လၟုဟ်မူစိစုတ်လဝ်မာဲဂှ် ချူထမံက်လဝ် ဟၟဲရ။
ပ္ဍဲကဵုရုၚ်ကလုတ် သှ်ေမံၚ်တၞဟ်တံလေဝ် ကောန်ဍုၚ်ဗမာစိုပ်မံၚ်ဍုၚ်သ္အာၚ်တံ သွက်ဂွံကဵုမာဲဒစးဒုၚ် ညံၚ်ကေတ်အဆက်မာန် နူကဵုမုက်လိက် Facebook ရုၚ်ကလုတ်ဗမာတံ ထပ်ထပဵုလဝ်ကဵုတ္ၚဲဂှ် ဂွံဆဵုကီုရ။
နကဵုကဝ်မယှေန်ပၞာန် ဟွံဒးကေတ်သိက္ခာပရေၚ်ဍုၚ်ကွာန်ဂှ် ပူရိသာအ်ဍေံကဵုဍေံ သွက်ဂွံဒးဂွဟၟဲ ကၠောန်အာပေါဲရုဲမာဲဏံရောၚ် ဒါရိုက်တာ ဖံၚ်ဒေယှေန်အခေါၚ်အရာမၞိဟ် နာဲအဲမန် ဟီုကဵုဌာန်ပရိုၚ်သြင်လောန်တိုင်မ်ရ။
“ဂုဏ်သိက္ခာတံ ပရေၚ်ဟွံလုပ်သၞောဝ်တံ ပ္ဍဲကဵုပေါဲရုဲမာဲအလီကဝ်မယှေန်ပၞာန်ဏံ ဇြစှ်ေအာမံၚ်ဂှ် နမတ်ပိုဲဂွံညာတ်မံၚ်။ ဗီုလဵုလေဝ် ဟရိုဟ်ကၠောန်အာအာ မၞိဟ်ဍေံတံကဵုဍေံတံ ဟွံဒှ်ညံၚ်ဂွံဒှ်ဂှ် ကၠောန်အာတွဵု။ မိက်ဂွဟၟဲ သိက္ခာဟၟဲ တိုန်အာစၚ်ပရေၚ်ဍုၚ်ကွာန် အတိုၚ်ဏံရဏောၚ်” သာ်ဝွံ သ္ဂးရ။
သွဟ်ပေါဲရုဲမာဲဏံ ဍုၚ်ဂၠးကဝ်တံ ညံၚ်ဟွံဂွံဒုၚ်တဲဂှ် ဗီုကဝ်မယှေန်ပၞာန်တံဖံက်ပကဝ်လဝ် အခေါၚ်အရာမၞိဟ်တံဂှ် နကဵုသက်သဳစၟတ်သမ္တီ ကၠောန်ပတိတ်အာရောၚ် ညးဟီုရ။
ပ္ဍဲကဵုကၠောန်လဝ်ပရေၚ်ချဳဒရာၚ် ဗကပ်ဗဗေၚ်ရမျှာၚ်သ္ၚိတ်တ်ဂှ် ဗွဲမပြဟ် ညံၚ်ဂွံဗလးကဵု ဒဝ်အံၚ်သာန်သုကျဳကဵု ဥူဝေန်မျေအ်တံကီု ညးဍုၚ်ကွာန်တံ ညံၚ်ဂွံဒစဵုဒစးဗကပ်ဗပေၚ်ကဵု ပေါဲရုဲမာဲအလီဏံကီု ညံၚ်ဂွံပလီုကဵု ဥပဒေယိုက်ဝန်ပၞာန်အဓ္ဓမတံ အာတ်မိက်လဝ်ရ။
အခိၚ်ကၠာတေံ ညးဍုၚ်ကွာန်တံကၠောန်လဝ် ဗကပ်ဗဗေၚ်ရမျှာၚ် သ္ၚိတ်တ် သီုကဵု ၅ ဝါဂှ် ဆၜိုတ်မိၚ်ရမျှာၚ် Silent Strike ဟီုမ္ဂး တၠအဝဵုပၞာန်တံ ဖေက်မံၚ်အိုတ်စောန်ဂှ် ညးဍုၚ်ကွာန်တံ ထ္ၜးလဝ်ပရေၚ်ညဳသၟဟ်မာန်ရဂှ် NUG သ္ဂးရ။
လၟုဟ်ပၠန်လေဝ် အတိုၚ်တၚ်ဒတူလိုၚ်ညးဍုၚ်ကွာန်တံ အသိၚ်ပရေၚ်တဝ်စၞေဟ် သၞောတ်တၠအဝဵုပၞာန် ဟွံအိုတ်ဏီ ထ္ၜးသက်သဳမာန်ကၠုၚ်ရဂှ် ညးလ္ၚတ်တံ ထံက်ထ္ၜးဟီုလဝ်ရ။
နကဵုရမျှာၚ်သ္ၚိတ်တ် ဍုၚ်အခေါၚ်အရာမၞိဟ်ကၠေံဗ္ဒန်မွဲ ကေုာံ ရမျှာၚ်ကမြေဲတံဂှ် အလုံဂၠးကဝ်ညံၚ်ဂွံမိၚ် ပေါဲရုဲမာဲအံၚ်ဇၞးအာကီုလေဝ် ကဝ်မယှေန်ပၞာန် ထံက်လဝ်ကဵုၜုန်မြတုဲကၠောန်လဝ်ရောၚ်ဂှ် ညံၚ်ဂွံတီအာ ဂကောံဇြဟတ်ဗကပ်ဗဗေၚ်တံ သ္ဂးရ။
ဘပဠဓရတ်လဝ်မၞိဟ်တံတုဲ ကၠောန်လဝ်ပေါဲရုဲမာဲ ထ္ၜးဗီုကီုလေဝ် ဆန္ဒညးဍုၚ်ကွာန်တံ ညိလေဝ်ဟွံပါဂှ်ဒးထ္ၜးကဵုရောၚ် ဥက္ကဌကမ္မတဳဒစဵုဒစးပေါဲရုဲမာဲအလီ ဟွံလုပ်သၞောဝ်၊ ကံၚ်သဳဖိတ်ဒရေဝ်ဍုၚ်မန် MSFC မိသုတဇဝ် ဟီုကဵုဌာန်ပရိုၚ်သြင်လောန်တိုင်မ်ရ။
“ပ္ဍဲကဵုတ္ၚဲအခေါၚ်အရာမၞိဟ်ဂှ် ပရေၚ်ပကီုပရာတ်တံ နွံတၟာဂလိုၚ်ဂးတှ်ေ ဘပဠဓရတ်လဝ်မၞိဟ်တံတုဲ ကၠောန်လဝ်ပေါဲရုဲမာဲထ္ၜးဗီုဟီုဂှ် မုဖဵုလဝ်ဒှ်ကၠုၚ်ဟွံမာန်ပုဟ်။ တုဲပၠန် ထပ်ဖံက်ပကဝ်မံၚ် အခေါၚ်အရာမၞိဟ်တံဂှ် ပိုဲတံထ္ၜးတုဲ စန်ဒက်ဂွံမံၚ်။ တုဲပၠန် ရမျှာၚ်ညးဍုၚ်ကွာန်တံဟွံပါ၊ ဟွံကဵုမာဲပုဟ်၊ ဆန္ဒမာဲညးတံဟွံပါပုဟ် ဍုၚ်ဂၠးကဝ်တံ ဂွံမိၚ်အာဏောၚ်” သ္ဂးရ။
ပ္ဍဲကဵုဍုၚ်ဗမာ ပၞာန်အပ္ဍဲဍုၚ်ဒှ်မံၚ်ဏံ ပရေၚ်သီလဝ်အဝဵု ညံၚ်ဂွံဒှ်ဗဗွဲသၞောဝ်မာန် ညံၚ်ဂွံပြံၚ်သၠာဲအာ အလဵုအသဳ ညးဍုၚ်ကွာန်ရုဲစှ်လဝ်ဂးတုဲ ကဝ်မယှေန်ပၞာန်သွက်ဂွံကၠောန်အာပေါဲရုဲမာဲဂှ် ပါ်လဝ် ပိသ္ကုတ်ရ။
ဟိုတ်ဂှ်ရ ပ္ဍဲကဵုကၞောတ်သၞာံဏံ တမ်သၞာံတၟိတေံမံက်မ္ဂး ကၠောန်အာပေါဲရုဲမာဲသ္ကုတ် ၁ ကဵု ၂ ပ္ဍဲကဵု ၂၀၂ ပွိုၚ်ဍုၚ်ရောၚ် ကဝ်မယှေန်ပၞာန် လလောၚ်တြးလဝ်ရ။
ဆဂး အပ္ဍဲကဵု ၂၀၂ ပွိုၚ်ဍုၚ်ဏံမ္ဂး ပါဲနူရးလ္ဂုၚ်ကဵုနေပျဳတဝ်တုဲ အလုံဍုၚ်သှ်ေမံၚ် ကွာန်၊ အရာပ် ပ္ဍဲရးဒေသကဵု တွဵုရး ကရပ် ၃၀၀၀ တံဂှ် အကာဲအရာကၠောန်ပေါဲရုဲမာဲ သၠးပွးဓဝ်ယာဟွံမာန်ပုဟ် ဒုၚ်လဝ်ဝန်ရ။
ပရိုၚ်-သြင်လောန်တိုင်မ်
Photo – MOI