ဗိက်၊ ဒဳဇြမ်ပါ ၁၃
ပ္ဍဲပွိုၚ်ဍုၚ်တနၚ်သဳ ကွဳစက်ရေၚ် ဒပ်ကဝ်မယှေန်ပၞာန် သွက်ဂွံထပေၚ်ဇွောံမ၊ ဇြဟတ်ပၞာန် ဖ္ဍိုက်ပတိုန်နၚ်ဂှ် ဒးဒုၚ်တံၚ်မါၚ် ကြပ်ပ်တုဲ ကောန်ပၞာန်ဗမာ ဟွံအောန်နူကဵု ၂၀ တၠ ချိုတ်အာရဂှ် ဂွံတီ နူကဵုဒပ်စဵုစၞာ ပွိုၚ်ဍုၚ်ကျောန်သုရ။
နူကဵုဍုၚ်ဗိက် ကွဳစက်ပၞာန်ရေၚ် ဒပ်ကဝ်မယှေန်ပၞာန် ၇ မ တိတ်ကၠုၚ် လပါ် ပွိုၚ်ဍုၚ်တနၚ်သဳတံဂှ် ဒပ်မဟာမိတ်ပၠန်ဂတးတံ တံၚ်မါၚ်တုဲ ပန်ဗတိုက်ဏာ ပ္ဍဲကရပ် ကွာန်ကုန်ဇြဲ ပ္ဍဲဒဳဇြမ်ပါ ၁၁ အခိၚ်နူဂယး ၜိုတ် ၁၀ နာဍဳကဝက်ဂှ်ရ။
ဟိုတ်နူဒပ်မဟာမိတ်ပၠန်ဂတးတံ တံၚ်မါၚ်ပန်ဗတိုက်ဏာဂှ်ရ ဒှ်လဝ်ပေါဲဗတိုက် ၜိုတ်ပွိုၚ် ၂၀ မိနေတ်ဂှ် ကွဳစက် ၂ မ လီုအာ ပ္ဍဲဒၞာဲဂှ်တုဲ၊ မွဲမပၠန်ဂှ်လေဝ် အဃောပၟတ်တူမံၚ်ဂှ် ဒဳဟရိပ်ဏာ သ္ဂးရ။
ပ္ဍဲကဵုပေါဲဗတိုက် ကောန်ဒပ်ကဝ်မယှေန်ပၞာန် ဟွံအောန်နူကဵု ၂၀ တၠ ချိုတ်အာ ဒးဝပ်ကရပ် ၁၀ တၠ နွံမံၚ်ရောၚ် ညးတာလျိုၚ် လလောၚ်ပရိုၚ် ဒပ်စဵုစၞာပွိုၚ်ဍုၚ်ကျောန်သု ဟီုရ။
ပ္ဍဲဒဳဇြမ်ပါ ၁၂ အခိၚ်နူဂယးဂှ် ပ္ဍဲဂကောံကွာန် ၜါန်လမတ် ပွိုၚ်ဍုၚ် တနၚ်သဳဂှ် အကြာဒပ်ကဝ်မယှေန်ပၞာန်ကဵု ဒပ်မဟာမိတ်ပံၚ်တောဲ ပၠန်ဂတးတံ ဒှ်လဝ်ပေါဲဗတိုက်ကဵု ဂကောံဇြဟတ်ပၠန်ဂတးတံ ဟီုရ။
ပေါဲဗတိုက်ဏံ ဒပ်ဗတိုက်ပကဖ ရးတနၚ်သဳ၊ ပကဖ ပွိုၚ်ဍုၚ် ကျောန်သု၊ ပကဖ ပွိုၚ်ဍုၚ်တနၚ်သဳ၊ ဒပ်ဒရုၚ် Dragon Square၊ တမ်ဒပ်(၁၁ ) KNLA ၊ ဂကောံဒပ် ဗိုလ်ခရေၚ်တံ ပံၚ်တောဲဗတိုက်လဝ် မဒှ်ရ။
ပြဟ်ဟ်ဏံ ပ္ဍဲကဵုဂၠံၚ်ဇၞော်ကွဳစက် ဗိက်-ကအ်သံၚ်ဂှ် ဒပ်ကဝ်မယှေန်ပၞာန် ထပ်ဗပေၚ်လဝ်ဇြဟတ်တုဲ စနူဒဳဇြမ်ပါ ၈ မ္ဂး ညးဍုၚ်ကွာန်တံ အခိၚ်ဗ္တံ ညံၚ်ဟွံဂွံအာတရဴဂှ် ပကဖ ခရိုၚ်ဗိက် လလောၚ်တြးကဵုလဝ်သတိနွံရ။
ပရိုၚ်-သြၚ်လောန်တိုင်မ်
Photo – PDF