မတ်မလီု ၊ ဒဳဇြမ်ပါ ၁၅
ပ္ဍဲကဵုတွဵုရးဍုၚ်မန် သွက်ဂွံစသိုၚ်ခၞံအာ ရုၚ်ဓါတ်လလဳတၟံချး ပ္ဍဲကဵုပွိုၚ်ဍုၚ်ၜါသွာၚ်ဗွဲမပြဟ်ဂှ် အမာတ်ကလုတ်ကြုက်ကဵု ကဝ်မယှေန်ပၞာန်တွဵုရးမန်တံဆဵုဂဗသဳကၠဳလဝ်နွံ ညးကြပ်ကဵုကဝ်မယှေန်ပၞာန်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဒဳဇြမ်ပါ ၁၂ ဂှ် ဂကောံညးစၞး သ္ကိုပ်ဝန်ဇၞော်တွဵုရးမန် ဥူအံၚ်ကျဳတိၚ်ကဵု အမာတ်ကလုတ်ကြက် မေတ်သ်မာကျာတံဆဵုဂဗသဳကၠဳလဝ် ပ္ဍဲကဵုရုၚ်အလဵုအသဳတွဵုရးဍုၚ်မတ်မလီု သွက်ဂွံစသိုၚ်ခၞံ ရုၚ်ဓါတ်လလဳတၟံချး မဒှ်ရ။
သွက်ဂွံသၠုၚ်ပတိုန် ပရေၚ်ဆာန်ကၟိန် အကြာကြုက်-ဗမာ၊ ဂွံကၠုၚ်ဓလိုက်တမ်ရိုဟ်ပရေၚ်ပိုန်ဒြပ်၊ ကဏ္ဍပရေၚ်ပိုန်ဒြပ်ကဵု ကွတ်စက်တံသၟးဟွံက သွက်ဂွံအာရံၚ်ဒၞာဲသိုၚ်ခၞံ ရုၚ်ဓါတ်လလဳတၟံချး ပ္ဍဲကဵုပွိုၚ်ဍုၚ်ၜါသွာၚ်ဂှ်လေဝ် သ္ကိုပ်ဝန်ဇၞော်မန် ကော်ဘိက်အမာတ်ကလုတ်ကြုက် ကီုရ။
ဆဂး စပ်ကဵုတရဴ အမာတ်ကလုတ်ကြုက် မေတ်သ်မာကျာ အာလဝ်တွဵုရးမန်တုဲ နူကဵုရုၚ်ကလုတ်ကြုက် ဒဵုကဵုလၟုဟ် လလောၚ်ပတိတ်လဝ်ပရိုၚ်ဂှ် ဟွံဂွံဆဵုဏီရ။
ကၠာအမာတ်ကလုတ်ကြုက်ဟွံစိုပ်လဝ် ပ္ဍဲဒဳဇြမ်ပါ ၇ တေံ သ္ကိုပ်ဝန်ဇၞော် တွဵုရးမန်အာလဝ်ကွာန်ဒဵုကြေဝ် ကၠောန်လဝ်ပေါဲသောၚ်ကလး ကိစ္စသိုၚ်ခၞံရုၚ်စက်ဓါတ်လလဳတၟံချး ပ္ဍဲကဵုဘာတိုက်မင်္ဂလာသုခ ကီုရ။
ပ္ဍဲကဵုဆဵုဂဗသောၚ်ကလးလဝ်ကဵု ညးဒေသတံမ္ဂး စကာနဲကဲကဆံၚ်သၠုၚ် ကၠောန်အာရုၚ်စက်ဓါတ်လလဳတၟံချးဏံ မဒှ်တုဲ သွက်ဘဲအန္တရာယ်ပွဳပွူသဘာဝတံကဵု ပရေၚ်ထတ်ယုက်ညးဍုၚ်ကွာန်တံ ဖဵုဂွံဒးဂွိၚ်ဂွာဲဟၟဲရောၚ် သ္ကိုပ်ဝန်ဇၞော်မန် ဒုၚ်လဝ်လျိုၚ်နွံရဂှ် ညးဒေသတံ ဟီုရ။
သွက်ဂွံသိုၚ်ခၞံအာ ရုၚ်ဓါတ်လလဳတၟံချးဏံ အကြာကွာန်ကလုဲကဵုဒဵုကြေဝ် ပ္ဍဲပွိုၚ်ဍုၚ်ၜါသွာၚ်မဒှ်တုဲ ပတိတ်ဓါတ်လလဳ ၃၀ မဂ္ဂါဝါပ်မာန်ရောၚ် ကဝ်မယှေန်ပၞာန်တွဵုရး သ္ဂးလဝ်ရ။
ဟိုတ်နူကၠောန်အာ ရုၚ်စက်ဓါတ်လလဳတၟံချးဏံတုဲ သွက်ညးဍုၚ်ကွာန်တံဘိုအ်ဂွံဒးဂွိၚ်ဂွာဲ ဘဲအန္တရာယ်ပွဳပွူသဘာဝကဵု ပရေၚ်ထတ်ယုက်ညးဍုၚ်ကွာန်တံကီုလေဝ် လ္တူကဝ်မယှေန် ရပ်လွဟ်အုပ်ဓုပ်မံၚ်ဏံ ဗီုကၠာကၠာတေံဟွံဂွံဟီုဂး ပတိုန်ထ္ၜးပုဟ် ညးဒေသတံဟီုရ။
သွက်သိုၚ်ခၞံကၠောန်အာ ရုၚ်စက်ဓါတ်လလဳတၟံချးဏံ ရာန်ကေတ်လဝ် တိဝါဗ္ၚညးဍုုၚ်ကွာန်တံ ၅၀ ဧက အကြာကွာန်ကလုဲကဵု ဒဵုကြေဝ် တုဲယျ။
သွက်ဂွံထမံက်ရုပ်ရဴ သိုၚ်ခၞံအာ ရုၚ်ဓါတ်လလဳတၟံချး ပ္ဍဲကဵုပွိုၚ်ဍုၚ်ၜါသွာၚ်ဂှ် ပံၚ်တောဲကဵု ကာန်ပနဳကြုက်တံရောၚ် ကဝ်မယှေန်ပၞာန်တွဵုရးမန် လလောၚ်ပတိတ်လဝ်ပရိုၚ်နွံရ။
ပရိုၚ်-သြင်လောန်တိုင်မ်
Photo – MOI