အကြာၜါဍုၚ်ဒေါအ်ပန်ပှော်ရောၚ် ထရဟီုလေဝ် ဆက်ဗတိုက် ခမေန်ရောၚ် သေံဟီု

ၜၚ်ကံက်၊ ဒဳဇြမ်ပါ ၁၅

သွက်အကြာၜါဍုၚ်ဂွံဒေါအ်ပန်ပှော်ဂှ် ပ္ညဳပ္ညဳလဝ်ကဵုတုဲယျ သမ္မတအမေရိကာန် ဒဝ်နေဝ်ထရ ဟီုဂးတုဲ လံၜိုတ်နာဍဳမွဲဍောတ် ပ္ဍဲဒဳဇြမ်ပါ ၁၃ ဂှ် ၜၚ်ကျာပၞာန်ဆက်ဗတိုက်မံၚ်၊ ဒၞာဲဒှ်မံၚ်ပရေၚ်ကယျာန်ထဝါတ် မွဲဒမြိပ်ပယျဵုဂှ် ဆက်ဗတိုက်အာရောၚ် က္ဍိုပ်သ္ကိုပ်သေံ ဟီုရ။

ပ္ဍဲကဵုတိဍာ်ပိုဲ ညးဍုၚ်ကွာန်ပိုဲ အန္တရာဲဟၟဲရပုဟ် ဒဵုကဵုအခိၚ်ဂွံဒုၚ်စသိုၚ်ဂှ် ဆက်ဗတိုက်အာပၞာန်ရောၚ် သ္ကိုပ်ဝန်ဇၞော် အနုတေန် ချူလဝ်ပ္ဍဲ Facebook ညးရ။ 

ကေတ်လဝ်အဆက်ကဵု အနုတေန်၊ သ္ကိုပ်ဝန်ဇၞော်ခမေန် ဟန်မာနက်တံ ပ္ဍဲဒဳဇြမ်ပါ ၁၂ ဂှ် ပရေၚ်ပေါဲဗတိုက်သီုဖအိုတ် ညံၚ်ဂွံဒေါအ် တုပ်လဝ်စိုတ်နွံ ထရ ဟီုရ။

ထရ ကေတ်အဆက် ပတိတ်လဝ်လိက်လလောၚ်ကီုလေဝ် က္ဍိုပ်သ္ကိုပ်လဵုမှ ဂွံလဝ်တင်တုပ်ရောၚ် ဟွံဟီုပတိတ်၊ ပရေၚ်ဒေါအ်ပန်ပှော် ဟၟဲပုဟ် အနုတေန် ဟီုရ။

စပ်ကဵုပေါဲဗတိုက်အကြာၜါဍုၚ်ဏံတုဲ သွက်ဂွံကဵုလညာတ်မွဲမွဲ ကေတ်အဆက်သၟာန်လဝ် သ္ၚိဗ္တာၚ်ကီုလေဝ် မုလေဝ်ကဵုလဝ်သွဟ်ဟၟဲပုဟ် ဌာန်ပရိုၚ်ရိုက်တာ ချူလဝ်ကီုရ။ 

အဲမိက်ဂွံဟီုဂှ် ကမၠောန်ပိုဲနူဂယးဏံ လဴထ္ၜးလဝ် တုဲယျ အနုတေန် ဟီုရ။ 

ခမေန် ဗတိုက်မံၚ်ညးဍုၚ်ကွာန်ပိုဲတံဂှ် ပိုဲတံစဵုဒၞာကဵုမံၚ်ရောၚ် အနုတေန် သ္ဂးရ။

အတိုၚ်တၚ်နၚ်တုပ်လဝ်စိုတ် ထပက်လဝ်စၟတ်တဲ ပ္ဍဲဂိတုအံက်တဝ်ပါတေံ သွက်ဂွံသောၚ်ကလးအာ ပရေၚ်ကယျာန်ထဝါတ်တံ နနဲၜိုဟ်ဟ်သြိုဟ်ဟ်ဂှ် ဆက်ဂစာန်အာရောၚ် သ္ကိုပ်ဝန်ဇၞော် ခမေန် လလောၚ်စုတ်လဝ် ပ္ဍဲကဵု Facebook ညးတေံရ။

ပ္ဍဲကဵုဒၞာဲပွန် မွဲဒမြိပ်ဒေသပယျဵုသေံကဵုခမေန်ဂှ် စနူဒဳဇြမ်ပါ ၈ မွဲလပါ်ကဵုမွဲလပါ် ပန်မံၚ်ကဵုလွဟ်ဇၞော်တံတုဲ ၜၚ်ကျာပၞာန်သေံတံဂှ် ပန်သၠိပ်မံၚ် ဒၞာဲပွန်ဒပ်ပၞာန်ခမေန်တံရ။ 

သီုအကြာညးဒဴပၞာန် ၇ ကိုတ်ပြၚ်အာတုဲ ချိုတ်ကီု ဒးဝပ်ကီု လၟိဟ်ပဵုတိုန်မံၚ်ရရောၚ်။ 

အကြာၜါဍုၚ် သီုဖအိုတ် ချိုတ်လဝ် ၂၀ တၠ၊ ဒးလဝ်ဝပ် ၂၆၀ တၠ နွံရ။

ပ္ဍဲဂိတုတုဲကၠုၚ်တေံ ကောန်ပၞာန်သေံမွဲ လိုန်ဒးမာၚ် ပ္ဍဲပယျဵုဂှ် ဒးကုတ်ထောံဇိုၚ်တုဲ ဒေါအ်လဝ် အစဳဇန်သွက်ဂွံယှအ်ဖျေံအာ ပရေၚ်ကြံၚ်မ္ၚိုဟ်သီုဖအိုတ်ရ။ 

ခမေန်တံ ကၠုၚ်ထပ်စုတ်လဝ် မာင်တၟိတၟိတံရောၚ် ညးတာလျိုၚ်သေံတံ ဟီုရ။ 

ပ္ဍဲကဵုပေါဲပၞာန် ခမေန် ကလေၚ်ဒှ်ကၠုၚ်မွဲအလန်ဏံ နူကဵုသေံစကာလဝ် ဇြဟတ်ပၞာန်တိုက်ဍာ်ကျာ သီုဖအိုတ်တုဲ နူကဵုခမေန်ဂှ် အဓိက ဗတိုက်မံၚ်ကဵု လွဟ်ဇၞော်တံ မဒှ်ရ။

Ref:Agencies