ဗြဝတဳ၊ ဒဳဇြမ်ပါ ၁၆
ပ္ဍဲကဵုကမၠောန်ဗတိုက်သရိုဟ်ကျာဖျ ပ္ဍဲတိဍာ်ယှိုဲကုက်ကိုဏံ ဒပ် BGF ဟွံပံၚ်တောဲကၠောန်တံဂှ် ပါ်ခြာထောံပိုတ်တ်ရောၚ် က္ဍိုပ်သ္ကိုပ်ဂကောံလလောၚ်ပရိုၚ် ကဝ်မယှေန်ပၞာန်ဗမာ သ္ကိုပ်ပၞာန်ဇြဝ်မေန်ထောန် ဟီုရ။
ပ္ဍဲဍုၚ်လ္ဂုၚ် ကၠောန်လဝ် ပေါဲသောၚ်ကလးလိက်ပရိုၚ် ထပိုတ်ကၠေံရိုဟ်ကၞက် ပရေၚ်လီသြန်အန်လိုၚ် ပ္ဍဲဒဳဇြမ်ပါ ၁၄ တေံဂှ် သ္ကိုပ်ပၞာန်ဇြဝ်မေန်ထောန် ဟီုလဝ်မဒှ်ရ။
ပ္ဍဲဂကောံလဵုဒှ်ဒှ် မၞိဟ်ခိုဟ် မၞိဟ်ပရေအ်တံနွံတုဲ ဆီပရေအ်တံပါကၠုၚ်မ္ဂး ဒးဖံက်ပတိတ်ရောၚ် သ္ကိုပ်ပၞာန်ဇြဝ်မေန်ထောန် ဟီုရ။
ဆဂး ပ္ဍဲကဵုကမၠောန်ဗတိုက်သရိုဟ် ပရေၚ်လီသြန်အန်လိုၚ် ကေုာံကမၠောန်လံၚ်ဇျှၚ်ဝေင်သြန်အန်လိုၚ် ဒၞာဲယှိုဲကုက်ကိုတံဂှ် ဒပ်BGF ပံၚ်တောဲရေၚ်တၠုၚ်မံၚ်တံနွံမံၚ်ရောၚ် ညးဟီုလဝ်ရ။
ပရေၚ်လီသြန်အန်လိုၚ် ကေုာံ ကမၠောန်လံၚ်ဇျှၚ်ဝေင်သြန်အန်လိုၚ် ဒၞာဲတိဍာ်ယှိုဲကုက်ကို ပ္ဍဲတွဵုရးကရေၚ်ဂှ် စနူနိုဝမ်ပါ ၁၈ ဒပ်ကဝ်မယှေန်ပၞာန်တံ လုပ်သီကေတ်တုဲ ရပ်ဂွံကောန်ဍုၚ်မ္ၚးတံဗွဲမဂၠိုၚ်တုဲ စမြိုၚ်ဒၞာဲတံဂှ်လေဝ် ကဝ်မယှေန်ပၞာန် ဖံက်ဟတိုဟ်ထောံ နွံရ။
နူကၠာဒပ်ကဝ်မယှေန်ပၞာန်တံ ဟွံလုပ်သီကေတ် ပ္ဍဲကဵုဒၞာဲယှိုဲကုက်ကိုဂှ် နူကဵု BGF ကဵုလဝ်ပရေၚ်ဂီုကၠီုတုဲ ကော်ပတိတ် ပြံၚ်ပဆုဲထောံဒၞာဲ ပ္ဍဲကဵုသေဌဳကာန်ပနဳက္ဍိုပ်သ္ကိုပ်ဇၞော်ဇၞော်တံရဂှ် ညးကြပ်ကဵု BGF တံ ဟီုရ။
အတိုၚ်ညးကြပ်ကဵု BGF တံဟီုလဴလဝ်မ္ဂး ကော်ပြံၚ်ပဆုဲလဝ်သေဌဳကြုက်ကျာဖျတံ ပ္ဍဲကဵုဒၞာဲဒေသဒပ် BGF ဌာန်ဂအုပ်လၟိဟ် (၂) ပ္ဍဲကဵုကွာန် တေံကတေ၊ သိုၚ်လဝ်ဒၞာဲစမြိုၚ်ကျာဖျတၟိတုဲ ဆက်ဗဂေတ်မံၚ် ကမၠောန်ကျာဖျတံဖိုအ် ဂွံတီရ။
သေဌဳကာန်ပနဳ က္ဍိုပ်သ္ကိုပ်ကျာဖျဇၞော်ဇၞော်တံဂှ် နူကဵု BGF ဒစးဒုၚ်ကော်ပတိတ်လဝ်ဟွံသေၚ်ပုဟ်၊ စပ်ကဵုပရိုၚ်ဏံတုဲ ဟွံဍာံပြပုဟ်ဂှ် ညးအခေါၚ်ဟီုဂးနွံ BGF သ္ကိုပ်ဗိုလ်ဇၞော် နာဲမိုင်ဇြဝ် တးပါဲလဝ်ရောၚ်။
ပြဟ်ဟ်ဏံ စပ်ကဵုပရေၚ်ကျာဖျတုဲ ဂကောံညးစၞးဒုဝန်ဇၞော် ဌာနဝန်ဇၞော်ပရေၚ်ဂီုကၠီုဍုၚ်ကြုက် မေတ်သတာ လျိုကျုၚ်ယိတံ နူကဵုဍုၚ်မေဝ်ဆံက် မွဲအဆံၚ် စိုပ်မံၚ်ဒေသယှိုဲကုက်ကိုတုဲ စှ်ေလ္ၚတ်မံၚ် အကာဲအရာတိဍာ်ဒေသဂှ် ဂွံလဝ်ပရိုၚ်ရ။
ပရိုၚ်-သြၚ်လောန်တိုင်မ်
Photo – MOI