မတ်မလီု ၊ ဒီဇြမ်ပါ ၁၇
နူကဵုကမ္မတဳလဝေင်ပၞာန် ညးစၞးဒပ်ဆေင်စပ်တံမပါလုပ်ဂှ်ကောပ်ကာဲအာ ဒပ်ပံၚ်ကောံမဟာမိတ်တမ်ကညၚ် SRA ရောၚ် ညးအခေါၚ်ဟီုဂးနွံ ဟီုကဵုဌာန်ပရိုင်သြၚ်လောန်တိုၚ်မ်ရ။
ဟိုတ်နူပရေၚ်သီအဝဵု ဒပ်ပၠန်ဂတးနာနာမံက်တိုန်ကၠုၚ် ၁၉ ဂကောံတံဂှ် ဒက်ပ္တန်ဒပ်ပံၚ်ကောံမဟာမိတ် တမ်ကညၚ် SRA ရဂှ် လလောၚ်တြးလဝ် ပ္ဍဲကဵုဒဳဇြမ်ပါ ၁၅ ရ။
အပ္ဍဲကာလသီအဝဵု ပွိုၚ် ၅ သၞာံဏံ ဒပ်ပံၚ်ကောံဇၞော် ဂကောံရပ်လွဟ်တံမံက်တိုန်ကၠုၚ် အလန်ပထမကိုပ်ကၠာအိုတ်မဒှ်ကီု သွက်ဂွံထပိုတ်တမ်ရိုဟ်သၞောတ်တၠအဝဵုပၞာန် ညံၚ်ဂွံပိုတ်အာ အခိၚ်ညးဂမၠိုၚ် ဗတိုက်ဖအောဝ်မံၚ်ဏံ မံက်တိတ်လဝ်ကီုရ။
သွက်ဂွံဒုၚ်ဒဝ်ဗတိုက်အာ ပရေၚ်ပကီုပရာတ်ဂကောံပၞာန်တံ နနဲဗျူဟာစှ်ေစှ်ေမာန် ဒုၚ်လဝ်သ္ဇိုၚ်ကဵုပရေၚ်ကောံကလောအ် ညဳသၟဟ် အကြာဒပ်ပၠန်ဂတးတမ်ကညၚ်တံတုဲ နကဵုဝတ်တာလျိုၚ် ပၠန်ဂတးပေၚ်ၚ် သွက်ညးဍုၚ်ကွာန်တံ သွက်သ္ဂောံဂွံဖိတ်ဒရေဝ် ဒဳမဝ်ကရေသဳ၊ အခေါၚ်အရာမၞိဟ်၊ ပရေၚ်ဂျန်ဒါတုပ်သၟဟ်၊ ပရေၚ်ဓရ်ယာကေုာံ ပရေၚ်ၜိုဟ်လလမ်တံဂှ် ဒပ်ပံၚ်ကောံဏံလုပ်အာပေါဲဗတိုက်ရောၚ် ကဵုလဝ်သမ္တီရ။
ပံက်လဝ်ကမ္မတဳတုဲ နူကဵုဏံလၟေၚ်ကမၠောန်ဇြဟတ်ခိုဟ်ဟ်တံ မံက်တိုန်ကၠုၚ်ရောၚ် ညးအခေါၚ်ဟီုဂးနွံ ဒပ်ပၞာန်ကွးဘာ ဒုဥက္ကဌ ၁ ကိုမေန်ထက်ဟာန် ဟီုရ။
“ပ္ဍဲဒပ်ပံၚ်ကောံဏံ ပံက်စွံလဝ်ကမ္မတဳနွံမွဲ။ ပ္ဍဲကမ္မတဳဏံ ညးစၞးနူကဵုဇၟာပ်ပ်ဒပ်တံ ပါလုပ်လဝ်လၟိဟ်ညဳညဳရ။ နူကမ္မတဳဏံ ကောပ်ကာဲအာလၟေၚ်ကမၠောန် လဝေင်ပၞာန် ဒပ်ပံၚ်ကောံဏံတုဲ ရေၚ်တၠုၚ်အာချိုတ်တ်ပၠိုတ်တ်ရောၚ်။ ဟိုတ်ဂှ်ရ နူကဵုဒပ်ပံၚ်ကောံဏံ ပရေၚ်လဝေင်ပၞာန် ဗျူဟာစှ်ေစှ်ေ ဇြဟတ်ခိုဟ်ဟ်တံ မံက်တိုန်ဏောၚ်” သာ်ဝွံ သ္ဂးရ။
သွက်ဂွံဒှ်ကၠုၚ်ဒပ်ပံၚ်ကောံဏံ အခိၚ်ကာလကၠောန်မံၚ်သဘၚ်သဳကၠဳတံဂှ် ဆဵုဂဗလဝ်ကဵု အလဵုအသဳညဳသၟဟ်ကောန်ဂကူ NUG တုဲ သဳကၠဳလဝ်နွံကီု ညးဆက်ဟီုရ။
လ္တူဏံ လညာတ်ကဵုဇြဟတ်ပရေၚ်ဒုၚ်တၠုၚ်နွံမံၚ်တုဲ ပ္ဍဲဍာ်ဇမၠိုၚ်မ္ဂး ချိက်ကလောအ်ပံၚ်တောဲအာကဵု NUG တုဲ သွက်ဂွံရေၚ်တၠုၚ်အာနွံ ကိုမေန်ထက်ဟာန် သ္ဂးရ။
ဒပ်ပံၚ်ကောံမဟာမိတ်တမ်ကညၚ် ဗွဲမသၠဲလးမွဲ ညံၚ်ဂွံမံက်ဂတဝ်အာ ပ္ဍဲဂိတုမေသၞာံဏံ ဒပ်ပၠန်ဂတး ၇ ဂကောံတံ စပ္ညဳပ္ညပ်ကၠောန်လဝ်တုဲ ပ္ဍဲဂိတုနဝ်ဝမ်ပါ ပထမသတ္တဟဂှ် ဒပ် ၁၄ ဒပ်တံ ကိုပ်ကၠာအိုတ် ကၠောန်လဝ်ပရေၚ်ဆဵုဂဗသဳကၠဳမာန်ကၠုၚ် ချူလဝ်ပ္ဍဲလိက်လလောၚ်တြးရ။
နူကဵုဏံ ဂွံကၠုၚ်ပရေၚ်တုပ်စိုတ်ဘုံမွဲ ထပ်ကော်ဘိက် ဂကောံညးမဘိက်ထေက်တံတုဲ ကၠောန်သ္ပလဝ်သဘၚ်သဳကၠဳ ဒပ်ပံၚ်ကောံ ပ္ဍဲကဵုတိဗၠးၜးမွဲဒၞာဲ စနူကဵုနဝ်ဝမ်ပါ ၂၁ ပွိုၚ်ပိတ္ၚဲဂှ် ဒက်ပ္တန်ဒပ်ပံၚ်ကောံမာန်ကၠုၚ် သာ်ဝွံ ချူလဝ်ပ္ဍဲကဵုတၚ်နၚ် လိက်လလောၚ်တြးဂှ်ရ။
ပ္ဍဲဒပ်ပံၚ်ကောံဏံမ္ဂး ဂကောံဒုၚ်လဝ်ယၟုကောန်ဍုၚ်အရၚ် မပ္တံကဵု ဒပ်စဵုဒၞာကောန်ဂကူကရေၚ်ဍာဲ KNDF၊ ကောဒေံချေၚ် CB၊ ဒပ်ပၞာန်ဗၠးၜး ညးဍုၚ်ကွာန်ဓနု DPLF၊ ဒပ်ပၠန်ဂတးဍုၚ်မန် MSRF ကေုာံ ဒပ်စဵုဒၞာညးဍုၚ်ကွာန်ပအိုဝ် (ခမ်ဒေါမ်)တံ ပါလုပ်လဝ်ရ။
တုဲပၠန် ဂကောံဒုၚ်ယၟု ဒပ်ပၠန်ဂတးဂကူဗမာ ဒပ်ပၞာန်ဗၠးၜး ညးဍုၚ်ကွာန် ဂကူဗမာ BPLA၊ ဒပ်ပၞာန်ဗမာ BA ကေုာံ ၝောံဒပ်ဒဳမဝ်ကရိတ်တေတ်ဗၠးၜးဗမာ BLDF တံလေဝ် ပါလုပ်ကီုရ။
မွဲလပါ်ပၠန် ဒပ်ပၞာန်ဗၠးၜးညးဍုၚ်ကွာန် PIA၊ Generation Z Army GZA ကေုာံ ဒပ်ပၞာန်ဗၠးၜးကောန်ဂကော NLA ပရေၚ်ဆက်ဆောံ ကြပ်မံၚ်ကဵု KIA, AA, TNLA တံ ပါလုပ်မံၚ်ရ။
နူကဵုဒေသအညာ ဒပ်ပၞာန်စဵုဒၞာညးဍုၚ်ကွာန် မဂွေ Magway PDF၊ ဒပ်ပၞာန်စဵုဒၞာ ညးဍုၚ်ကွာန်သဂိုၚ် Sagging PDF၊ ဒပ်စဵုဒၞာဒေသ ကလေဝ် KRF၊ ဒပ်ပၞာန်ယဝ် YA၊ ဒပ်စဵုဒၞာယဝ် YDF၊ 96 Soldiers PDF ၊ Force for Federal Democracy FFD ကေုာံ ဒပ်ပၞာန်ကွးဘာ SAF တံလေဝ်ပါလုပ်မံၚ် ပ္ဍဲဒပ်ပံၚ်ကောံဏံရ။
ဂကောံဒပ်တံဏံချဳဒရာၚ်မံၚ် ပ္ဍဲဇၟာပ်ဒၞာဲဒေသနာနာတံဂှ် ပရေၚ်ဆက်စၠောံရေၚ်တၠုၚ် နကဵုဒပ်ပံၚ်ကောံ ဇြဟတ်ပဵုတုဲခိုဟ်တိုန်ရောၚ် ကိုမေန်ထက်ဟာန် ဟီုရ။
“ဒးဟီုဒပ်ပံၚ်ကောံဏံတှ်ေ ဒပ်ပံၚ်ကောံပိုဲတံ နွံမံၚ်ပ္ဍဲဍုၚ်ဗမာဇၟာပ်ပ်ဒၞာဲဏောၚ်။ ဟိုတ်ဂှ်တှ်ေ ဇြဟတ်ပိုဲ နွံမံၚ်ကရပ်မွဲဠက်။ ဟိုတ်ဂှ်တုဲ ပ္ဍဲကဵုဇၟာပ်ပ်ဒၞာဲဒေသတံမ္ဂး ပရေၚ်ဆက်စၠောံ နကဵုမကမ်လွဟ်တံကီု နဲကဲပညာတံကီု သွက်ဇြဟတ်ပဵုခိုဟ်တိုန်ရနွံမာန်ဂှ် ဂွံဇြဟတ်ကွေံကွေံ။ နူကဵုဒပ်ပံၚ်ကောံဏံ ပရေၚ်ဆက်စၠောံကၠောံက္ဍအာ ဇၟာပ်ဒပ်တံနွံတိုန်။ တင်ဇြဟတ်ခိုဟ်တံ နွံမံၚ်ဗွဲမဂၠိုၚ်” သာ်ဝွံ သ္ဂးရ။
ပ္ဍဲကဵုသဘၚ်သဳကၠဳဒပ်ပံၚ်ကောံဏံ ချူခၞံသ္ဇိုၚ်သၞောဝ်တုဲ သ္ပလဝ်ဒတန်ကီု ဖျေံပရေၚ်ကမၠောန်အဓါန်ဂတတံကီု သီုကဵုထပက်လဝ်စၟတ်တဲ ကတိဝတ်ပၠန်ဂတးတံကီုရေၚ်တၠုၚ်လဝ်ဂှ် ဒပ်ပံၚ်ကောံဏံ ကဵုလဝ်သမ္တီရ။
အတိုၚ်ညးဍုၚ်ကွာန် ခေတ်အဆက်ဆက်တံအာတ်မိက်လဝ်ကီု သီုကဵုရန်တၟံဂကောံပၠန်ဂတးတံ သွက်သၠောတ်တၠအဝဵုပၞာန် ညံၚ်ဂွံကၠေံကၠက်အာ၊ သၞောတ်ဖိတ်ဒရေဝ်ဒဳမဝ်ကရေသဳ ညံၚ်ဂွံမံက်ဂတဝ်တိုန် လုပ်အာပေါဲဗတိုက်ရောၚ် အဓိကကဵုလဝ်ကတိဝတ် မဒှ်ရ။
ပြဟ်ဟ်ဏံ လ္တူညးဍုၚ်ကွာန်တံဂှ် ရဲဂကောံပၞာန်တံဖံက်ပကဝ်မံၚ် ပရေၚ်ရာဇဝတ်ကေုာံ အခေါၚ်အရာမၞိဟ်ဇၟာပ်ပ်တ္ၚဲနွံမံၚ်တုဲ အလုံဍုၚ်မွဲဒးဇီုကပိုက်မံၚ်ကဵု ပရေၚ်ဒိုက်ဝါတ်ပိုန်ဒြပ်နာနာသာ်ဂှ် ညးဍုၚ်ကွာန်တံညံၚ်ဂွံဗၠးတိတ်အာမာန် ဒပ်ပံၚ်ကောံဏံလုပ်အာ ပေါဲဗတိုက်ရောၚ် သ္ဂးရ။
တုဲပၠန် ကလေၚ်ပလေဝ်ပလေတ်အာ တၚ်ဍိုန်လျမကၠောံက္ဍ အုပ်ဓလီုပၠန်ဂတးတမ်ကညၚ်ဂှ်တုဲ ညံၚ်ဂွံဒှ်အာဒပ်ပံၚ်ကောံ မဟာမိတ်သၠဲလးမာန် ပရေၚ်ယန္တရာကောပ်ကာဲဇြဟတ်ခိုဟ်ဟ် ညံၚ်ဂွံမံက်ဂတဝ် ကၠောန်အာရောၚ်ဟီုရ။
နကဵုပရေၚ်ညဳသၟဟ် ဒပ်ပံၚ်ကောံမဟာမိတ်တမ်ကညၚ် စပ်ကဵုပရေၚ်ဍုၚ်ကွာန်၊ တင်ပတဝ်က္ဍိုပ်ပရေၚ်ပၞာန်၊ တၚ်ရန်တၟံ ကေုာံ လၟေၚ်ကမၠောန် သွက်ဂွံထမံက်အာရုပ်ရဴ ကတိဝတ်တံဂှ်လဝ် ချူခၞံစုတ်လဝ်ကီုရ။
မွဲလပါ်ပၠန် ဂကောံဇြဟတ်တမ်ကညၚ်ဟွံပါလုပ်လဝ် ပ္ဍဲဒပ်ပံၚ်ကောံဏံဂှ် ထပ်ကော်ဘိက်အာမဒှ်တုဲ ရုပ်ရဴလၟေၚ်ကမၠောန် အဓါန်ဂတ ဒပ်ပံၚ်ကောံဏံညံၚ်ဂွံမံက်တိုန် လွဳပရာဂစာန်အာရောၚ် လလောၚ်တြးလဝ် မဒှ်ရ။
ပရိုၚ်-သြင်လောန်တိုၚ်မ်
Photo – SRA