တဳဟဳရာန်၊ ဒီဇြမ်ပါ ၁၇
လောန်ကၠုၚ်သတ္တဟတေံ အခိၚ်ကၠုၚ်ရပ်လဝ် ညးတၠလာဘ်နိုဗေဝ်လ်အဳရာန် နာဂါတ်သ် မိုဟာမာန်ဒဳ ဒးဒုၚ်ၜုၚ်တက်တုဲ ဒးဗတိုန်လဝ်ရုၚ်ဂဥုဲရောၚ် ကၟိန်သ္ၚိဌာန်ညးတံ ဟီုရ။
ဂကောံအေဂျေအ်ရပ်လဝ်လှ်ေခတေက် ဗိုက်လတက်လဝ် ကယျိုၚ်ကွာန်တံ ၜုၚ်တက်လဝ်ပ္ဍဲကဵုက္ဍိုပ်၊ ကအ်တံ အလန်ကဵုအလန်ဂှ် ဒးပတိုန်ရုၚ်ဂဥုဲကာမံက်တိုန် ၜါဝါဂှ် ညးချဳဒရာၚ် က္တိုၚ်ကၟိုဟ်အခေါၚ်အရာမၞိဟ် နာဂါတ်သ် မိုဟာမာန်ဒဳ ဆက်ဖုၚ်လဴလဝ်ကဵု ကၟိန်သ္ၚိဌာန်ညးတံ ပ္ဍဲကဵုဒဳဇြမ်ပါ ၁၅ နူကဵုဖံၚ်ဒေယှေန် နာဂါတ်သ် လလောၚ်လဝ်ရ။
လ္တူပရေၚ်ဏံ ညးတာလျိုၚ်အဳရာန်တံ ပရေၚ်ဟီုဂးလဝ် မွဲသာ်လေဝ် ဟၟဲကီုလေဝ် ပ္ဍဲဒဳဇြမ်ပါ ၁၂ ကၠောန်လဝ်တ္ၚဲဗှ်ဗၞုဟ်ပ္ဍဲကဵုဍုၚ် မာတ်ရှ်ဟာတ်ဂှ် ဟိုတ်နူညးဟီုလဝ်ပရေၚ်ဂၠာဲဂလာန်တုဲ ရပ်ထိၚ်လဝ်ရေၚ် ညးတာလျိုၚ်အဳရာန်တံ ဟီုလဝ်ရ။
သွက်ဂွံကလေၚ်ဗလးကဵု ရဲအာတ်မိက်လဝ်တံမ္ဂး ကမ္မတဳရုဲစှ် တဆိပ်လာဘ်နိုဗေဝ်လ်ကဵု ညးဖန်ဗ္ဒျ်ရုပ်ဂမျိုၚ်လာဘ်တဆိပ်ကြာ ဂျာဖာ ပါနာဟဳတံလေဝ် ပါလုပ်ကီုရ။
မေတ်သေတ် နာဂါတ်သ် မိုဟာမာန်ဒဳ ဒုဥက္ကဌ သေန်တာ စဵုဒၞာ အခေါၚ်အရာမၞိဟ် ဍုၚ်အဳရာန်ဝွံ ဟိုတ်နူညးတေံ ချဳဒရာၚ်လဝ် ဒစဵုဒစးပရေၚ်ဍဵုဍိုက်ညးဗြဴတံကဵု ဂစာန်လွဳလဝ် အခေါၚ်အရာမၞိဟ် တံ ညံၚ်ဂွံတဴတက်တိုန်ဂှ် ပ္ဍဲသၞာံ ၂၀၂၃ တေံ ဂွံလာဘ်တဆိပ် ပရေၚ်ၜိုဟ်လလမ် နိုဗေဝ်လ် မဒှ်ရ။
ညးတေံ ဒးဒုၚ်ဖျေံထံၚ်မွဲအယုက်မွဲတ္ကအ်တုဲ ဒးမံၚ်လဝ်ပ္ဍဲထံၚ် ၁၀ သၞာံကီုရ။
စနူသၞာံ ၂၀၂၁ တေံ ဟိုတ်နူတြးဝါဒ ဒစဵုဒစးပရေၚ်ဍုၚ်နိဂီု ဒးဒုၚ်စောဲစပ်တုဲ ဒးဒုင်ဖျေံထံၚ် ၁၃ သၞာံရ။
ပ္ဍဲသၞာံ ၂၀၂၄ ဂိတုဒဳဇြမ်ပါဂှ် နကဵုဟိုတ်ပရေၚ်ထတ်ယုက် ကလေၚ်ဗၠးတိတ်ကၠုၚ်ဗွဲယာယဳ နူကဵုထံၚ်ယၟုပရေအ်အ်ဒယှ်တှ် အဳဗေန်ရ။
အခိၚ်ညးတေံ ဝဳမံၚ်ယဲဂှ်လေဝ် ချဳဒရာၚ် ပရေၚ်က္တိုၚ်ကၟိုဟ်တံကီုရ။
သွက်သၟာဥပဒေ ချဳဒရာၚ်အခေါၚ်မၞိဟ်မွဲတၠ ပ္ဍဲကဵုဒဳဇြမ်ပါ ၁၂ ကၠောန်လဝ် အခန်ကၞာတ္ၚဲဗှ်ဗၞုဟ်ဂှ် မိုဟာမာန်ဒဳ တိုန်စိုပ် ဟီုလဝ် ဂလာန်ရ။
ပရေၚ်သၟာဥပဒေချိုတ်လဝ်ဏံ တၚ်နၚ်ပရောပရာ သွက်ဂွံဒှ်သံသယ ဗွဲမဂၠိုၚ်ဂၠၚ်နွံမံၚ်ရောၚ် ညးချဳဒရာၚ်ပရေၚ်အခေါၚ်မၞိဟ်တံ ဟီုလဝ်ရ။
ပ္ဍဲအခန်ကၞာဏံ ဂကောံအေဂျေအ်ကယျိုၚ်ကွာန်တံ တံၚ်ဂြဲသော်က္ဍိုပ်ကီု ၜုၚ်တက်ကဵုလှ်ေခတေက်ကီု ဖန်လဝ် လ္တူမေတ်သေတ် နာဂါတ်သ် မိုဟာမာန်ဒဳဂှ် ရဲဆဵုနမတ်တံ ဟီုရ။
ရပ်လဝ်ညးတေံ နကဵုအမှုလဵု ရပ်ချုက်စွံလဝ်ဒၞာဲလဵုဂှ် ညးတာလျိုၚ်အဳရာန်တံ ဟွံကဵုလဝ်သမ္တီပုဟ် ဆက်ဖုၚ်ဟီုလဝ်ကဵု ရဲသ္ၚိကၟိန်အိန်ထံၚ်ညးတေံရ။
ပ္ဍဲအခန်ကၞာဏံ ညးပါလုပ်တိုန်စိုပ်လဝ် ၃၉ တၠ ဒးဒုၚ်ရပ်ဏာလဝ်နွံ ညးဆဵုနမတ်တံ ဟီုရ။
Ref:BBC