ဝါယှေန်တန်၊ ဒဳဇြမ်ပါ ၁၈
ရဲရပ်လဝ်စၟတ်တဲ ဂကောံအုပ်ဓုပ်ပါလေတ်သတိုၚ်ပတိတ်လဝ်တံကေုာံ နူကဵုဍုၚ် ၇ ဍုၚ် သီုကဵုကောန်ဍုၚ်သဳရဳယာတံ သွက်ဂွံလုပ်အမေရိကာန်ဂှ် ကၟာတ်အခေါၚ်လုပ်ဍုၚ်တုဲ နူကဵုသမ္မတအမေရိကာန် ဒဝ်နဝ်ထရ ထပဵုပတိုန်လဝ် ပွမဗဒေါအ်ပရေၚ်လုပ်ဍုၚ်ရ။
ဟိုတ်ဂှ်ရ လၟိဟ်ဍုၚ်နိဂီုကရပ် ၄၀ ဒးဒုၚ်မာတ်လဝ် အခေါၚ်လုပ်ဍုၚ် အမေရိကာန် မဒှ်ရ။
နူကဵုဍုၚ်ပလိုတ်တံ ကၠုၚ်အမေရိကာန်ဂှ်လေဝ် ထရ ထပ်ပတေၚ်လဝ် စေဝ်ပၞောန်တံ ဗွဲမဂၠိုၚ်ရ။
လ္တူရဲဆုဲပြံၚ်မံၚ်စံၚ်တံ ထရ ဗီုမိက်ဂွံဂၠာဲမံၚ်ဂလာန်လံကွေံရဒှ်တုဲ ထဍေၚ်ပတိတ်ထောံနူဍုၚ် လ္တူကောန်ဍုၚ်အမေရိကာန်တၟိ မၞိဟ်ဗုဟွံသေၚ်တံဂှ် အခိၚ်ညးတေံစွံလဝ်စိုတ်ကြံၚ်ၚ်မ္ၚိုဟ်ဟ်ဏံ တၚ်လလောၚ်တြးတံဏံ မံက်တိတ်ကၠုၚ် မဒှ်ရ။
ကောန်ဍုၚ်မ္ၚး ရန်တၟံလဝ် မိက်ဂွံကဵုဘဲအန္တရာဲကဵု ကောန်ဍုၚ်အမေရိကာန်တံတုဲ ကၟာတ်အခေါၚ်လုပ်ဍုၚ်ရောၚ် သ္ၚိဗတာၚ် ဟီုရ။
သွက်ဍုၚ်အမေရိကာန် ယေန်သၞာၚ်၊ ပရေၚ်အုပ်ဓုပ်၊ ဂကောံနာနာ (ဝါ) သ္ဇိုၚ်မူဝါဒတံ ဇြဟတ်ဂွံယအ်အာ (ဝါ) ညံၚ်ဟွံညိၚ်ဝပ် ဂွံဒှ်အာ သွက်ကောန်ဍုၚ်မ္ၚးကၠောန်ဗ္ဒျ်အာတံ ထရ မိက်ဂွံတာဒၞာလဝ်ရောၚ် ပ္ဍဲတၚ်လလောၚ် သ္ၚိစၠတ်ဗတာၚ် ချူလဝ်ရ။
ပ္ဍဲဍုၚ်သဳရဳယာ ကောန်ဒပ်အမေရိကာန် ၂ တၠ ကေုာံ ကောန်အရာပ် ၁ တၠ ဒးဒုၚ်ဂစိုတ်တုဲ လံခြာပွိုၚ်တ္ၚဲဂှ် မာတ်ထောံအခေါၚ် ကောန်နိဂီုဍုၚ်သဳရဳယာတံ သွက်ဂွံလုပ်ဍုၚ်အမေရိကာန် မဒှ်ရ။
ကောန်ဒပ်ပရေၚ်ဂီုကၠီု လညာတ်အေတ်သလာန်မေတ်ၜက်ၜေတ်တၞုၚ်တၞးမွဲတၠ ကၠောန်ဗ္ဒျ်လဝ် ပရေၚ်ဏံရောၚ် ဂကောံအုပ်ဓုပ်သဳရဳယာတံ ဟီုလဝ်ရ။
ဍုၚ်နိဂီုဒးဒုၚ်ကၟာတ်လဝ်တၞဟ်တံမ္ဂး ဍုၚ်ဗာကဳနာဖာသို၊ မာလဳ၊ နိုၚ်ဂျာ၊ သဳလဳယာ ကေုာံ သူဒါန်သၠုၚ်ကျာ သၟးဟွံက ဍုၚ်လဴလေဝ် ပါလုပ်ကီုရ။
ကောန်ဍုၚ် နိုၚ်ဂျဳရဳယာ၊ အိုၚ်ဗရဳကိုသ် ကဵု သဳနဳဂဝ်တံဟွံက ကောန်ဍုၚ်အာဖရိက တံကီုလေဝ် ထရ မာတ်ထောံအခေါၚ် မွဲသ္ကုတ်မွဲသ္ကူကီုရ။
ပ္ဍဲကဵုဍုၚ်ဒးဒုၚ်မာတ်လဝ်အခေါၚ်လုပ်ဍုၚ်အမေရိကာန်ဂှ် ဍုၚ်ကနေဒါ ကဵု မဂ္ဂသဳကို အံၚ်လဝ်သွက်ဂွံလုပ်ပြိုၚ်ဗဝ်ဂၠးကဝ် အမေရိကာန်လေဝ် ပါလုပ်မံၚ်ကီုရ။
သၟာဝေၚ်ဇြဟတ် သွက်ဂွံလုပ်ပြိုၚ်ဗဝ်ဂၠးကဝ်တံဂှ် ထရ ကဵုအခေါၚ်လုပ်ဍုၚ်ရောၚ် ဟီုလဝ်ကီုလေဝ် ပူရိသာဒ် ရဲကၠုၚ်ကဵုဇြဟတ်တံဂှ် ကဵုအခေါၚ်ဟွံကဵုအခေါၚ် ဟီုဂးလဝ်ဟၟဲဏီပုဟ်။
Ref:AFP