ပလဝ်၊ ဒဳဇြမ်ပါ ၁၈
ရးတနၚ်သဳ ပွိုၚ်ဍုၚ်ပလဝ် ပ္ဍဲကဵုကွာန်သာခေဝ်ဂှ် ညးတာလျိုၚ် ပရေၚ်ပညာဂကောံဗုက် ပွိုၚ်ဍုၚ်ပလဝ် အစာဇၞော်တြုံဗြဴၜါတၠတံ ဒးဒုၚ်ဂစိုတ်လဝ်ဓဇန်ဓဇန်ရဂှ် ဂကောံဇြဟတ်ပၠန်ဂတးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အစာဇၞော် သၞာဲဒါ CDM ဒဝ်ဧတဳအံၚ် အာယုက် ၄၉ သၞာံကဵု တၠသ္ရိညး ကိုပျေအ်ဖျိုဝ်နိုၚ် အာယုက် ၄၀ ၜါတၠတံ ပ္ဍဲဒဳဇြမ်ပါ ၁၆ အခိၚ်နူဂယးပြဟ် ၁ နာဍဳဂှ် ဒးဒုၚ်ဂစိုတ်လဝ် အပ္ဍဲသ္ၚိညးတံမံၚ် ပ္ဍဲကဵုကွာန်သာခေဝ် ဂှ်ရ။
ညးတာလျိုၚ် ပရေၚ်ပညာဂကောံဗုက် ပွိုၚ်ဍုၚ်ပလဝ် အစာဇၞော် ဒဝ်ဧတဳအံၚ်ဝွံ စနူသၞာံသီအဝဵု ၂၀၂၁ တေံဂှ် ပါလုပ်ကၠုၚ် ပ္ဍဲကဵုပရေၚ်ဒစဵုဒစးအဝဵုအာဏာ ဟွံသေၚ်ကဵုပကီုပရာတ် CDM တုဲ သွက်ကောန်ၚာ်ဒေသတံ ဂွံလေပ်လိက် သ္ကိုပ်သ္ကကၠောန်မံၚ်ရ။
အတိုၚ်ညးဒေသတံဟီုမ္ဂး ညးတာလျိုၚ် ပရေၚ်ပညာဂကောံဗုက် ပွိုၚ်ဍုၚ်ပလဝ် အစာဇၞော်တြုံဗြဴၜါတၠဏံဂှ် မၞိဟ်မွဲဂကောံ တိုန်ကၠုၚ်သ္ၚိ တုဲ ဗိုက်ဂစိုတ်ထောံရောၚ် ဂွံတီရ။
သၞာဲဒါညးဍုၚ်ကွာန် ကၠောန်မံၚ်ပရေၚ်ပညာခိုဟ်ဟ်တံ လ္တူညးတံ ဒးဒုၚ်ဂစိုတ်ဏာနပကီုပရာတ်သာ်ဏံဂှ် နူကဵုတမ်ဒပ်ခရိုၚ်ဗိက်လၟိဟ် (၁) ပျုတ်ဗဒေက်ဏာ ဇၞော်ကဵုဇြဟတ်ရ။
ရဲတၠတဲဂစိုတ်လဝ်တံ ညံၚ်ဂွံကလေၚ်ရပ်ဂွံမာန်ကီု ညံၚ်ဂွံကဵုအာဒုဟ်ဒဏ်မာန်ဂှ် နူကဵုတမ်ဒပ်ခရိုၚ်ဗိက်လၟိဟ် (၁) သ္ကိုသ္ကပံၚ်တောဲအာကဵု ဂကောံမဟာမိတ်တံတုဲ ပံက်ပရေၚ်ဂၠိုက်ဂၠာဲကာတၟေၚ် ဂစာန်ရေၚ်တၠုၚ်အာရောၚ် ကဵုလဝ်သမ္တီရ။
တုဲပၠန် ညးကလိလောန်ကၠောန်လဝ်ဒုဟ်တံဏံ ဒၞာဲလဵုဒှ်ဒှ် ယဝ်ရ ဂြိပ်ပါဲမ္ဂး နကဵုတမ်ဒပ် ကေတ်တာလျိုၚ် ထမံက်ပတိတ်အာကီု ယဝ်ရကလိဂွံလဝ်တၚ်နၚ်နွံမ္ဂး ညံၚ်ဂွံပလံၚ်ဗစိုပ်ကဵု ညးတာလျိုၚ်တမ်ဒပ်တံညိဂှ် ဗတိုက်ဖအောဝ်လဝ်နွံရ။
ပရိုၚ်-သြၚ်လောန်တိုင်မ်
Photo – Social Media