ဗေဂျေၚ်၊ ဒဳဇြမ်ပါ ၁၉
ပရေၚ်သွံရာန်လွဟ်သွက်ဍုၚ်နာနာတံဂှ် ဒှ်အရာပံၚ်ဗစပ်ပရေၚ်စဵုဒၞာမွဲသ္ကုတ်ဍောတ်ရဒှ်မံၚ် နူကဵုဗေဂျေၚ်ဟီုဏာတုဲ အကြာသေံ-ခမေန် သွက်ဂွံကလေၚ်ဒက် ပရေၚ်ၜိုဟ်လလမ်ဂှ် သီုဇရေၚ်သီၜါဍုၚ်တံ ကြုက်ဗလးဏာ ညးစၞးတၟေၚ်မွဲတၠ လလောၚ်တြးလဝ်ရ။
ညးစၞးတၟေၚ်ပရေၚ်အာသဳယာန်ကြုက် တိက်ချဳကျာန် သွက်ဂွံကၠောန်ပရေၚ် ပ္ညဳပ္ညပ်ပြဿနာ အကြာၜါဍုၚ်ဏံ နူကဵုဒဳဇြမ်ပါ ၁၈ ဂှ် အာစိုပ်မံၚ် ဍုၚ်သေံ ကဵု ခမေန် ပ္ဍဲတၚ်လလောၚ်တြး ဗေဂျေၚ် ထမံက်လဝ်ရ။
ပေါဲဗတိုက်ဒေသပယျဵု သေံ-ခမေန်တံဂှ် ကြုက်မၚ်ရံၚ်အာ ကြပ်ပ်တုဲ အသိၚ်ညံၚ်ဂွံယအ်စှ်ေအာ နကဵုနဲကဲဇကု ဂစာန်မံၚ်ရောၚ် နူရုၚ်ကလုတ်ကြုက် နွံမံၚ်ဍုၚ်ၜၚ်ကံက် လလောၚ်ပတိတ်လဝ်ရ။
သၞောတ်မကမ်သၠောဝ် ပလီုကွဳခြပ်ပၞာန် နူကဵုကြုက်ပတိတ်လဝ်ဂှ် ဒဒှ်ရသီဂွံလဝ် နူကဵုကောန်ပၞာန်ခမေန်တံ ဒပ်ပၞာန်သေံဟီုလဝ်တုဲ အခိၚ်ညးဂမၠိုၚ်တံ အာရီုစိုတ်လုပ်စမံၚ်ကဵု ပရေၚ်ဒပ်ပၞာန်ခမေန်စကာ ကပေါတ်ပၞာန်ကြုက်ဏံ လၟေၚ်တရဴ တိက်ချဳကျာန် မံက်တိတ်ရ။
သေံကီု ခမေန်ကီု ပရေၚ်ပံၚ်တောဲရေၚ်တၠုၚ် အတိုၚ်ဓမ္မတာ ကြုက်ကၠောန်မံၚ်ဂှ် စွံလဝ်ပွန်ကဵု ဍုၚ်တတိယလဵုမှဟွံသေၚ်ကီု ဆက်စပ်ပါလုပ်မံၚ် ပ္ဍဲကဵုပေါဲဗတိုက်ဒေသပယျဵုတံဏံလေဝ်ဟၟဲပုဟ် ရုၚ်ဝန်ဇၞော်ဍုၚ်သ္အာၚ်ကြုက် ဟီုလဝ်ရ။
သွက်ဂွံပ္ညဳပ္ညပ်ပြဿနာသေံ-ခမေန်တံဂှ် တိက်ချဳကျာန် ကေၚ်အာအိုပ်လဝ်ၜါဍုၚ်ဏံ ဟွံအောန်နူၜါဝါနွံကၠုၚ်တုဲ လၟေၚ်တရဴဒဳဇြမ်ပါ ၁၈ ဏံဂှ် နူကဵုၜါဍုၚ်ဏံ ထပက်လဝ်စၟတ်တဲမလေဝ်ယှာတုဲ ဗွဲကြဴမ္ဂး ဒှ်လၟေၚ်တရဴအလန်ပထမ ကၠာအိုတ်ရ။
သ္ကိုပ်ဝန်ဇၞော်သေံကဵု ခမေန်တံ ဥက္ကဌအာသဳယာန် သ္ကိုပ်ဝန်ဇၞော်မလေဝ်ယှာ အာန်ဝါ၊ ဂတမုက်သမ္မတအမေရိကာန် ဒဝ်နေဝ်ထရတံ ချုက်လဝ်ထပက်စၟတ်တဲ ပ္ဍဲကဵုဂိတု အံက်တဝ်ပါတေံ မဒှ်ရ။
နူကဵုထရ ဆက်ဖုၚ်ကဵု သ္ကိုပ်ဝန်ဇၞော်သေံ အနုတေၚ်၊ သ္ကိုပ်ဝန်ဇၞော်ခမေန် ဟန်မာနက် ခြာဟွံလံကၠုၚ်ဂှ်တုဲ ညံၚ်ဂွံစွံပရေၚ်ဇြိုဟ်နက်ကဵု ပရေၚ်တုပ်စိုတ်တံကီု ပြဟ်ဟ်ဏံ ညံၚ်ဂွံပြဿနာဂွံသောၚ်အာ ကလေၚ်ပ္ညဳပ္ညပ်ညးသ္ကံညိဂှ် ဗတိုက်ဖအောဝ်လဝ်ကီုရ။
အကြာၜါဍုၚ် ဂွံပရေၚ်တုပ်စိုတ်ဒေါအ်ပန်ပှော်ယျ ထရ ၜိုန်ရဟီုကီုလေဝ် ပေါဲဗတိုက်ဆက်ဒှ်မံၚ်ဏီဂှ် ကောန်ပၞာန်သေံ ၂၁ တၠ ကေုာံ ကောန်ပၞာန်ခမေန်ကြပ် ၃၀ တၠ ညးဍုၚ်ကွာန် ၁၂ တၠ ချိုတ်လဝ်တုဲ မဒှ်ရ။
ဗီုအမေရိကာန်တံဟွံသေၚ် ညံၚ်မၞိဟ်ဂမၠိုၚ်ဟွံဂွံတီ ကြုက်ဆက်စၠောံပ္ညဳပ္ညပ်မံၚ်ကၠောန်ကၠုၚ်မံၚ် အခိၚ်ပဋိပက္ခဏံ နူကဵုစဒှ်ကၠုၚ်လဝ် မဒှ်ရ။
Ref:Bangkokpost