တယိတ်ချံၚ်၊ ဒဳဇြမ်ပါ ၁၉
ဒပ်ပၞာန်ဗၠးၜးကောန်ဂကူကရေၚ် KNLA ရပ်ထိၚ်လဝ် သ္ကိုပ်နဲကဲဗျူဟာ ၃၃ ကဵု ကောန်ဒပ်ကရပ် ၅၀ နူကဵုဌာနပၞာန်ရးတၟေၚ် NUG သွက်ဂွံကလေၚ်ဗလးကဵုဂှ် အကြာၜါလပါ် ပ္ညဳပ္ညိပ်ပြေပြံၚ်အာယျရောၚ် ဂွံတီနူကဵု ရိုဟ်ကၞက်ပရိုၚ်ပၠန်ဂတးတံရ။
လောန်ကၠုၚ်ဒဳဇြမ်ပါ ၁၇ သ္ကိုပ်နဲကဲဗျူဟာ ၃၃ သဝ်ဒါကို၊ သ္ကိုပ်တမ်ဒပ်ခရိုၚ်ထဝါဲလၟိဟ် (၂) မေန်တာဂျဳတံ အဃောအာတရဴ ကိစ္စပရေၚ်ကမၠောန်မွဲဂှ် နူကဵုတမ်ဒပ် (၁၂) KNLA မဟာဒပ်(၄) ရပ်ထိၚ်လဝ်ရ။
တုဲပၠန် နူကဵု တမ်ဒပ် (၁၂) KNLA ဂှ် ဆက်ရပ်ဏာကောန်ဒပ်ကရပ် ၅၀ သီုကဵုသ္ကိုပ်ဒပ်ပါ် အထံက်ဒပ်တံတုဲ သီကေတ်ထောံလွဟ်တံကီုရ။
စပ်ကဵုပရူဒဒှ်ဏံတုဲ ပ္ညဳပ္ညပ်လဝ်ကဵု ညးတာလျိုၚ် KNLA ပြေပြံၚ်အာ တုဲ ကောန်သ္ဂံၚ်ဒးဒုၚ်ထိၚ်လဝ်သီုဖအိုတ်တံ ခြာဟွံလံ သီုကဵုလွဟ် ကလေၚ်စိုပ်ကၠုၚ် ဇရေၚ်တမ်ဒပ်ရောၚ် သ္ကိုပ်နဲကဲဗျူဟာ ၃၃ သဝ်ဒါကို ပ္ဍဲဒဳဇြမ်ပါ ၁၈ အခိၚ်ဒေါဝ်တ္ၚဲဂှ် ကဵုသမ္တီချူပတိုန်လဝ် ပ္ဍဲကဵုမုက်လိက် ပရေၚ်မၞိဟ်ညးရ။
တုဲပၠန် စပ်ကဵုပရူဒဒှ်ဏံတုဲ ဂကောံကောဒေံပၠန်ဂတးတံ အထၚ်ဗၠေတ်ညးသ္ကံ နွံဆညိညဓဝ်ဟေၚ်ဂှ် ပြဿနာဟွံသေၚ်ရောၚ် သ္ဂးရ။
တုဲကၠုၚ် ဒဳဇြမ်ပါ ၁၆ တေံဂှ် အကြာကောန်ဒပ်ခရိုၚ်ထဝါဲ တမ်ဒပ်(၂) ကဵု ကောန်ဒပ် KNLA တမ်ဒပ် (၁၂) တံၜါလပါ် ဒှ်ကယျာန်ညးသ္ကံတုဲ ပရေၚ်ရပ်ထိၚ်ဒှ်ကၠုၚ်လဝ်ဗီုဏံရ။
သွက်ဂွံသောၚ်ကလးပြဿနာဏံ ညးတာလျိုၚ် KNLA ကဵု NUG တံ ဗွဲမပြဟ် အာစိုပ်ပ္ဍဲဒၞာဲ ဒှ်လဝ်ပရူပရာဂှ်ရောၚ် ညးအုပ်ကာ ခရိုၚ်ဗိက်-ထဝါဲ မဟာဒပ်(၄) KNU ပဒိုသဝ်အေဝ်နာ ကဵုလဝ်သမ္တီနွံရ။
ဌာနပၞာန်ရးတၟေၚ် NUG သ္ကိုပ်နဲကဲဗျူဟာ ၃၃ ကဵု ကောန်ဒပ်ကရပ် ၅၀ တံဂှ် နူကဵု KNLA တမ်ဒပ် (၁၂) မဟာဒပ်(၄) ဒပ်ပတီတလုၚ် ကေုာံ ကရောၚ်ပၞာန်ကသေဝ်ဒိုတံ ရပ်ထိၚ်လဝ်မဒှ်ကီုရ။
ပရိုၚ်-သြၚ်လောန်တိုၚ်မ်
Photo – KNLA