ကအ်သံၚ်၊ ဒဳဇြမ်ပါ ၁၉
ပ္ဍဲရးတနၚ်သဳ ပွိုၚ်ဍုၚ်ကအ်သံၚ် လောန်ကၠုၚ် ပွိုၚ်မွဲသတ္တဟဏံ နူကဵုဒပ်ကဝ်မယှေန်ပၞာန် တံၚ်ရပ်ဏာပဝ်တာ သၟတ် ၁၀၀ ပြၚ် သွက်ဂွံယိုက်ဝန်ပၞာန်ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
တုဲကၠုၚ် ဂိတုဒဳဇြမ်ပါ ၉ စဵုကဵု ၁၅ တေံ ညးတြုံသၟတ်အယုက် အကြာ ၂၀ ကဵု ၃၀ နွံမံၚ်အရာပ် လ္တူဍုၚ်ကအ်သံၚ်ကဵု ပ္ဍဲဂကောံကွာန် ဗွဲမဂၠိုၚ် ဒးဒုၚ်တံၚ်ဏာပဝ်တာရ။
အတိုၚ်ညးဒေသတံဟီုမ္ဂး ပ္ဍဲအရာပ်လ္တူဍုၚ်ကအ်သံၚ်ဂှ် စနူအခိၚ်ဗတမ် ၇ နာဍဳဂှ် ဆဵုညာတ်သၟတ်အာမံၚ် လ္တူဂၠံၚ်မ္ဂး ကဝ်မယှေန်ပၞာန် ရပ်ကော်ကေတ် အတေၚ်အဓ္ဓမသၟးဟွံက ပ္ဍဲဇၟာပ်အရာပ်တံလေဝ် ဗက်စၟဳစၟတ်စရၚ်ကၟုဲတုဲ ရပ်ကေတ်မံၚ်နွံရ။
တုဲပၠန် အခိၚ်ဒေါဝ်တ္ၚဲဂှ်လေဝ် ဗက်ရပ်ကော်ဏာ သၟာကမၠောန်ကၠောန်မံၚ်အကြာကၠအ်ဇိုၚ်ကွာန်တုဲ အခိၚ်ဗ္တံ ဗက်စၟဳစၟတ်စရၚ်ကၟုဲတုဲ ညးတြုံၜိုတ်ဆဵုလဝ်တံဂှ် ရပ်ကော်ဏာသ္ဂးရ။
ပ္ဍဲကဵုဂကောံကွာန် ၁၀ တိုၚ်ဂှ်လေဝ် ဒပ်ကဝ်မယှေန်ပၞာန် ပံၚ်လဝ်ကဵုညးဇၞော်အရာပ်တံတုဲ ရပ်ကော်ဏာ သၟာကမၠောန် ညးတြုံ ၇ တၠ နွံမံၚ်ရဂှ် ညးတြုံဒေသဟွံထမံက်ယၟုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဒပ်ကဝ်မယှေန်ပၞာန် တံၚ်ပဝ်တာ ရပ်ကော်ဏာလဝ် ညးတြုံ ၁၀၀ ပြၚ်တံဟီုဂှ် သၟတ်ဒးဒုၚ်ပလံၚ်နၚ်လဝ် နူကဵုဍုၚ်သေံတံဟွံပါ၊ ညးတြုံနူဒေသ ကအ်သံၚ်တံသၟးမဒှ်တုဲ မွဲအရာပ်တှ်ေ အောန်အိုတ် သၟတ် ၇ တၠ ဒးဒုၚ်ရပ်လဝ် သ္ဂးရ။
တုဲပၠန် ညးတြုံဒးဒုၚ်လဝ် အတေၚ်အဓ္ဓမတံဏံဂှ် ကဝ်မယှေန်ပၞာန် ပလံၚ်ဗစိုပ်လဝ် ဒပ်ဗတောန်ကွတ်ပၞာန် တကက ၁၂ ပ္ဍဲပလံက် ပွိုၚ်ဍုၚ်ပလဝ်တေံရောၚ် ဂွံတီကေတ်ရ။
မွဲလပါ်ပၠန် ကြပ်ကၠုၚ်မံၚ်ကဵုပေါဲရုဲမာဲဟဍၚ် ကဝ်မယှေန်ပၞာန် ထပဵုဟလိုၚ်ဗတိုန်လဝ် ဇြဟတ်ဂီုကၠီု ပ္ဍဲပွိုၚ်ဍုၚ်ကအ်သံၚ်တုဲ ဗက်ရပ်မံၚ်ပဝ်တာဂှ်ရ ညးတြုံဂမၠိုၚ် သွက်ဂွံတိတ်မ္ၚးသ္ၚိဌာန်ညးတံဂှ် ဖေက်လကိုတ်မံၚ်အိုတ်ရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media