ရေဝ် ၊ ဒဳဇြမ်ပါ ၁၉
အပ္ဍဲကဵုတွဵုရးမန် သ္ကုတ်ဒေသသၠုၚ်ကျာ ပရေၚ်ချဳဒရာၚ်ဇြဟတ်ပၞာန် ဒှ်မံၚ်ဂၠိုၚ်အိုတ် ပ္ဍဲကဵုပွိုၚ်ဍုၚ်ရေဝ်ဂှ် ကဝ်မယှေန်ပၞာန် သွက်ဂွံကၠောန်ပေါဲရုဲမာဲနွံတုဲ အကာဲအရာပရေၚ်ဂီုကၠီုပွိုၚ်ဍုၚ်ရေဝ် ဘိုအ်ဂွံဒှ်ဒွိၚ်နွံမံၚ်ရောၚ် ဂကောံသုတေသနပရေၚ်ဍုၚ်ကွာန် ရာမညအေန်သတဳကျု RICE သ္ၚဳဂၠိပ်လဝ်ရ။
ပ္ဍဲဒဳဇြမ်ပါ ၁၅ ဏံ အတိုၚ်လိက်ဒုၚ်ဒဳရေၚ် ပရေၚ်သ္ၚဳဂၠိပ် လၟေၚ်သတ္တဟ RICE မ္ဂး ဆေၚ်စပ်ကဵုကဏ္ဍပရေၚ်ပၞာန် ပ္ဍဲကဵုပွိုၚ်ဍုၚ်ရေဝ် တၠုၚ်လအာပရေၚ်ပၞာန် ဗီုက္တဵုဒှ်ကၠုၚ်မာန်တံဂှ် ပကောံတုဲချူလဝ်မဒှ်ရ။
ကရောၚ်ပၞာန်ဒပ်ဗမာဂှ် အပ္ဍဲကဵုပွိုၚ်ဍုၚ်ရေဝ် ဂေတ်ဂေၚ်ထပက်မံၚ်ပၞာန် အကြာကွာန်ဗရံၚ်- ၝောံလမု-ကွာန်တူဒဝ်၊ ကၞေၚ်တၟံ-အံၚ်သာယာ-ကၠအ်လဳမဴ၊ အရုတံၚ်-ကွာန်တၟိ-ကွာန်ဍောတ်- လုက်ပုက်ကဵု အရုတံၚ်-စောဂလာ-တံၚ်မောံ၊ အကြာ ပိုၚ်ဝါန်တံရ။
သွက်ဂွံထ္ၜးဗီုပြၚ် ပ္ဍဲကဵုပေါဲရုဲမာဲဏံ အကာဲအရာဂွံဖျေံစိုတ် ပရေၚ်ဂီုကၠီုမာန်ဂးတုဲ ဒပ်ပၞာန်ထပက်ကရောၚ်ပၞာန် ထ္ၜးစမံၚ်ရောၚ် ပ္ဍဲလိက်ဒုၚ်စဳရေၚ် RICE ထမံက်ပတိတ်လဝ်ဂှ် ဂွံဆဵုကေတ်ရ။
ပ္ဍဲကဵု ဂိတုဂျာန်နဝါရဳ ၁၁ သၞာံဂတးတေံ ကဝ်မယှေန်ပၞာန်ကၠောန်အာပေါဲရုဲမာဲ သ္ကုတ် ၂ မ္ဂး ပ္ဍဲကဵုပွိုၚ်ဍုၚ်ရေဝ် အရာပ်လ္တူဍုၚ် ကဵု ဒၞာဲဂအုံကွာန်ဒပ်ပၞာန်တံဂှ် သွက်ဂွံကၠောန်ပေါဲရုဲမာဲနွံရ။
ဟိုတ်ဂှ်တုဲ ပ္ဍဲကဵုကွာန်တမ်ဒပ်ပၞာန် ဒပ်ဗလံက်တံဖျေံလဝ်သ္ဇိုၚ် ကွာန်ကလအ်၊ ကအ်လဂုတ်၊ ဒစိတ်တိုၚ်၊ ကွာန်ဘာ၊ တူမျံၚ်တံဂှ် ကၠောန်အာပေါဲရုဲမာဲရောၚ်။ ဆဂး ဒှ်ဒၞာဲပရေၚ်ဂီုကၠီုဇြဟတ်ခိုဟ် ဟွံသေၚ်ပုဟ်ဂှ် ဂကောံ RICE ထံက်ထ္ၜးလဝ်ရ။
ပ္ဍဲပွိုၚ်ဍုၚ်ရေဝ်ကီု အလုံဍုၚ်မွဲ ဂကောံပၠန်ဂတးတံနွံမံၚ်တုဲ ဒၞာဲလဵုကၠောန်ပေါဲရုဲမာဲဒှ်ဒှ် အကာဲအရာပရေၚ်ဂီုကၠီု ဘိုအ်ဂွံဖျေံစိုတ်ဂွံဟွံသေၚ်ပုဟ် သ္ကိုပ်ဌာနပရေၚ်စဵုဒၞာကံၚ်သဳဖိတ်ဒရေဝ်ဍုၚ်မန် MSFC နာဲတလနာဲ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ဒၞာဲလဵုပေါဲရုဲမာဲကၠောန်ကၠောန် အကာဲအရာပရေၚ်ဂီုကၠီု ဘိုအ်ဂွံဖျေံစိုတ်ဂွံဟွံသေၚ်ပုဟ်။ မုဟိုတ်ရောတှ်ေ ပ္ဍဲအလုံဍုၚ်ဇၟာပ်ပ်ဒၞာဲဂှ် ဂကောံပၠန်ဂတးတံ နွံမံၚ်သီုဖအိုတ်တံဂှ် ဒၞာဲလဵုပေါဲရုဲမာဲအလီကၠောန်ကၠောန် ဒစဵုဒစးအာဏောၚ်။ ပွိုၚ်ဍုၚ်ရေဝ်မွဲဟွံသေၚ် သီုကဵုအလုံဍုၚ်မွဲ ဒၞာဲဂွံဖျေံစိုတ်ဟၟဲပုဟ်” သ္ဂးရ။
ပ္ဍဲကဵုကၠောန်ပေါဲရုဲမာဲ ၂၀၂ ပွိုၚ်ဍုၚ်တံမ္ဂး ဒၞာဲဂအုံကွာန်၊ အရာပ် ကၠောန်ပေါဲရုဲမာဲဟွံမာန် နွံမံၚ် ၃၀၀၀ ပြၚ်တံဂှ် ကၠောန်ပေါဲရုဲမာဲ ဟွံမာန်ပုဟ်ဂှ် ကဝ်မယှေန်ပေါဲရုဲမာဲကၟိန်ဍုၚ် ဒုၚ်လဝ်ဝန် ပ္ဍဲဒဳဇြမ်ပါ ၆ တေံ နွံရ။
ပ္ဍဲကဵုတွဵုရးမန် ၇ ပွိုၚ်ဍုၚ် ဂအုံကွာန် ၁၄၀ တံဂှ် ဒှ်ဒၞာဲကၠောန်ပေါဲရုဲမာဲ ဟွံမာန် လလောၚ်တြးလဝ်တုဲ ပ္ဍဲဂအုံကွာန်ပွိုၚ်ဍုၚ်ရေဝ် နွံမံၚ် ၃၀ ဂှ် ကၠောန်ပေါဲရုဲမာဲဟွံမာန် ၂၃ ဒၞာဲ နွံရ။
ပ္ဍဲပေါဲရုဲမာဲဏံ ညးဍုၚ်ကွာန်တံ ညံၚ်ဂွံဒးဘဲဒဏ်အောန် ဒစဵုဒစးအာရောၚ် တမ်ဒပ်ဒဝ်န နဲကဲဗျူဟာ (၃၃) NUG ၊ ဒပ်ပၠန်ဂတးဍုၚ်မန် MSRF၊ ဒပ်စဵုဒၞာညးဍုၚ်ကွာန်ရေဝ် YPDF တံ လလောၚ်တြးလဝ် နွံရ။
ဟိုတ်ဂှ်ရ ပွိုၚ်ဍုၚ်ရေဝ်ဂှ် နွံမံၚ် ပ္ဍဲဗွိုၚ်ဒေသပဋိပက္ခမွဲ မဒှ်တုဲ အကြာပရေၚ်ပြိုၚ်ပကာန် ဇြဟတ်ၜါလပါ်ဏံ ညးဍုၚ်ကွာန်တံ ညံၚ်ဂွံစွံမံၚ်သတိကဵုပရေၚ်ပၞာန်၊ ပရေၚ်ဍုၚ်ကွာန်ညိဂှ် ဂကောံ RICE ဗတိုက်ဖအောဝ်လဝ် မဒှ်ရ။
မွဲလပါ်ပၠန် ပ္ဍဲတ္ၚဲအကြာတံဏံ ဒက်ပတန်လဝ် ပ္ဍဲကဵုဒပ်ပံၚ်ကောံမဟာမိတ်ပၠန်ဂတးတမ်ကညၚ် SRA ဂှ် ဒပ်ပၠန်ဂတးဍုၚ်မန် MSRF ပါလုပ်မံၚ်ရ။
လ္တူဏံ စပ်ကဵုပရေၚ်ဒစဵုဒစးပေါဲရုဲမာဲတုဲ ဒှ်အရီုဗၚ်နွံမံၚ်ကီုဟာ ဌာန်ပရိုၚ်သြၚ်လောန်တိုၚ်မ် သၟာန်တုဲ နာဲတလနာဲ ဟီုလဝ်အတိုၚ်ဏံရ။
“ဂကောံဟွံဒုၚ်တဲပေါဲရုဲမာဲဖအိုတ် ပါလုပ်မံၚ် ပ္ဍဲကဵု SRA ရ။ ဆဂး လၟုဟ်မှ ကိုပ်ကၠာအိုတ် အကာဲအရာ ဒက်ပကောံလဝ် ဂကောံမဟာမိတ်ဏံရ။ စပ်ကဵု SRA တံ ဂွံဟီုလဴစဂှ် ပြဟ်မံၚ်ဏီရောၚ်” သာ်ဝွံ သ္ဂးရ။
ပ္ဍဲကာလသီအဝဵုဏံ နူဂကောံပၠန်ဂတး မံက်တိတ်ကၠုၚ်လဝ် ၁၉ ဂကောံတံဒက်ပတန်ဏာ ဒပ်ပံၚ်ကောံမဟာမိတ်ပၠန်ဂတးတမ်ကညၚ် SRA ဂှ် လလောၚ်တြးလဝ် ပ္ဍဲကဵုဒဳဇြမ်ပါ ၁၅ ဂှ်ရ။
လဝေၚ်ပၞာန်ကီု လၟေၚ်ပရေၚ်ကမၠောန်ဗျူဟာစှ်ေစှ်ေတံ ဇြဟတ်ခိုဟ်ဟ် နကဵုညးစၞးဒပ်တံဒက်ပတန်လဝ် နူကဵုကမ္မတဳသ္ကိုပ်သ္ကဂှ်ကောပ်ကာဲအာရောၚ် ညးအခေါၚ်ဟီုဂးနွံ SRA ကိုမေန်ဟာန်ထက် ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပြဟ်ဟ်ဏံ အလုံဍုၚ်မွဲဟီုမ္ဂး တွဵုရးမန်ဂှ် ပေါဲဗတိုက်ညိၚ်မံၚ်ကီုလေဝ် အကြာဂိတုနိုဝမ်ပါ ၁၄ ဒဵုစိုပ်ဒဳဇြမ်ပါ ၁၂ ဂှ် ပေါဲဗတိုက် ၇ ဝါ ဒှ်လဝ်တုဲ နူကဵုဒပ်ပၞာန်ပန်လွဟ်ဇၞော် နွံကၠုၚ်မွဲဝါ ရ။
ဟိုတ်နူကရောၚ်ပၞာန် ဒပ်ကဝ်မယှေန်ပၞာန်ဗမာ ထပက်မံၚ်ကရောၚ်ပၞာန် ပ္ဍဲကဵုတိဍာ် KNU မဟာဒပ် ၆ ဂှ် ပေါဲဗတိုက်ဒှ်မံၚ် အကြာပွိုၚ်သၟဝ်ကျာရောၚ် နူကဵုတၚ်နၚ်ဂကောံ RICE ချူပတိတ်လဝ်ရ။
ပရိုၚ်-သြၚ်လောန်တိုၚ်မ်
Photo – MOI