တယိတ်ချံၚ်၊ ဒဳဇြမ်ပါ ၂၀
ဒပ်ပၞာန်ဗၠးၜးကောန်ဂကူကရေၚ် KNLA ရပ်လဝ် သ္ကိုပ်နဲကဲဗျူဟာ ၃၃ ကေုာံ ကောန်ပၞာန် NUG ရးဒေသတၟေၚ် သီုဖအိုတ်တံ ကလေၚ်ဗၠးကၠုၚ်ရဂှ် ချူလဝ်ပ္ဍဲဇာဖိုၚ်ပရေၚ်မၞိဟ် သ္ကိုပ်ဗျူဟာ သဝ်ဒါကို ရ။
ပ္ဍဲရးတနၚ်သဳ ပွိုၚ်ဍုၚ်တယိတ်ချံၚ် တုဲကၠုၚ်ဂိတုဒဳဇြမ်ပါ ၁၇ ဏံ သ္ကိုပ်နဲကဲဗျူဟာ ၃၃ သဝ်ဒါကို၊ သ္ကိုပ်တမ်ဒပ် ခရိုၚ်ထဝါဲလၟိဟ် (၂) မေန်တာဂျဳ သီုကဵုကောန်ပၞာန်ကြပ် ၅၀ တၠတံဂှ် နူကဵု တမ်ဒပ် (၁၂) KNLA မဟာဒပ်(၄) ရပ်ထိၚ်လဝ်ရ။
‘
ရဲဒးဒုၚ်ရပ်လဝ် သ္ကိုပ်ဗျူဟာ သဝ်ဒါကိုကီု ကောန်ပၞာန်သီုဖအိုတ်တံ ပ္ဍဲဒဳဇြမ်ပါ ၁၉ ၜိုတ်အခိၚ်နူဂယး ၇ နာဍဳဂှ် ကလေၚ်ဗၠးကၠုၚ် မဒှ်ရ။
ကောန်သ္ဂံၚ်တံကဵုလွဟ်မကမ်သီုဖအိုတ် ကလေၚ်စိုပ်ကၠုၚ်ဒၞာဲတမ်ဒပ်ယျဂှ် သ္ကိုပ်ဗျူဟာ သဝ်ဒါကို ဟီုလဴစလဝ်ရ။
ဗီုပြၚ်ပရောဒဒှ် အကာဲအရာကလေၚ်ဗၠးတိတ်ကၠုၚ်ဂှ် နူကဵုဌာန်ပရိုၚ်သြၚ်လောန်တိုၚ်မ် သၟာန်လဝ် သ္ကိုပ်ဗျူဟာ သဝ်ဒါကို ကီုလေဝ် ဟွံကလေၚ်သှ်လဝ်ဏီပုဟ်။
တုဲကၠုၚ်ဂိတုဒဳဇြမ်ပါ ၁၆ တေံ ကောန်ပၞာန် တမ်ဒမ်ခရိုၚ်ထဝါဲလၟိဟ် (၂) ကဵု ကောန်ပၞာန် တမ်ဒပ်လၟိဟ်(၁၂) KNLA တံ ဒှ်ကယျာန်ထဝါတ် ညးသ္ကံတုဲ သ္ကိုပ်ဗျူဟာကီုသီုကဵု ကောန်ပၞာန် PDF ကရပ် ၅၀ တၠ ဒးဒုၚ်ရပ်သီဏာ သီုကဵုလွဟ်လက်နက် မဒှ်ရ။
အကြာကောဒေံ ဂကောံပၠန်ဂတးတံ ပရေၚ်ဓရ်ကၠိုဟ်ခၠၚ်ဗၠေတ်ဗၠေၚ်အာညိညနွံတုဲ ကောန်ပၞာန် PDF တံဒးဒုၚ်ရပ်ဂှ်တှ်ေ ပြဿနာဟွံသေၚ်ပုဟ်ဂှ် သ္ကိုပ်ဗျူဟာ သဝ်ဒါကို ချူလဝ်ပ္ဍဲမုက်လိက်ဇာဖိုၚ်ပရေၚ်မၞိဟ် ဂိတုဒဳဇြမ်ပါ ၁၈ ဂှ်ရ။
ညးတာလျိုၚ် NUG ကဵု KNLA တံ ပ္ညဳပ္ညပ်သဳကၠဳညးသ္ကံတုဲ သ္ကိုပ်နဲကဲ ဗျူဟာ ၃၃ ကေုာံ ကောန်ပၞာန် NUG ရးဒေသတၟေၚ်သီုဖအိုတ်တံ ကလေၚ်ဗၠးကၠုၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media