ဒါကာ၊ ဒဳဇြမ်ပါ ၂၀
ပ္ဍဲအဓိကိုရ်ပရေၚ်ကလိုက်ကၟဵု သၞာံ ၂၀၂၄ တေံ ပလှ်ဖျေံလဝ်အလဵုအသဳ ယှုက်ခ်ဟာသဳနာ ညးမဒှ် က္ဍိုပ်သ္ကိုပ်သၟတ်ထ္ၜးဆန္ဒ ယှယှေတ် အဝ်သမာန် ဟာဒဳ ချိုတ်အာတုဲ ပ္ဍဲဗၚ်ဂလာဒက်ရှ် ပေါဲထ္ၜးဆန္ဒ ပကီုပရာတ်ဇၞော်ဇၞော် ကလေၚ်ဒှ်ပၠန်ရ။
အခိၚ် က္ဍိုပ်သ္ကိုပ်သၟတ် ယှယှေတ် အဝ်သမာန် ဟာဒဳ တိတ်ကၠုၚ်နူဗလဳလ္ၚောဝ်ကျာ်ဂှ် သၟာလွဟ်ဂြောပ်လဝ်မုက်တံပန်တုဲ အဃောပလံၚ်ဝဳမံၚ်ယဲ ပ္ဍဲရုၚ်ဂဥုဲသင်ကာပူဂှ် ချိုတ်အာရ။
ယှုက်ခ်ဟာသဳနာ ဒးပလှ်ဖျေံ နူတာလျိုၚ်တုဲ ဗွဲကြဴ ပ္ဍဲဖေဖဝ်ဝါရဳဏံ ပ္ဍဲကဵုကၠောန်အာပေါဲရုဲမာဲအလန်ပထမဂှ် က္ဍိုပ်သ္ကိုပ်သၟတ်ဏံ စဳဇန်လဝ်သွက်ဂွံလုပ်ပြိုၚ်မာဲ မဒှ်ရ။
ပ္ဍဲဗၚ်ဂလာဒက်ရှ် ဒၞာဲရုၚ်တိုက် လိက်ပရိုၚ်ဒယှ် The Daily Star ကဵု Prothom Alo တံဂှ် ညးထ္ၜးဆန္ဒတံ စံၚ်ပလီုထောံ ပ္ဍဲကဵုဒဳဇြမ်ပါ ၁၈ တေံရ။
ဟာဒဳ ကလေၚ်ဗၠးဘဲလမျီုတုဲ စဴကၠုၚ်ဏောၚ် ရဲထ္ၜးဆန္ဒတံ အခိၚ်စၟဳမၚ်မံၚ်ဂှ် ကၠောန်တိုန်ပရေၚ်ပကီုပရာတ် ပ္ဍဲဒဳဇြမ်ပါ ၁၉ ရ။
ဒးဆောံလေၚ်ထောံ ဟာဒဳဂှ် သွက်ဍုၚ် ဗီုလဵုမှ ကလေၚ်ထပက်အဇာဟွံဂွံရောၚ် ညးအာက္ဍိုပ်အလဵုအသဳယာယဳ ဍုၚ်ဗၚ်ဂလာဒက်ရှ် မိုဟာမက် ယူနာတ်သ် ဟီုရ။
စမြိုၚ်ရုၚ်တိုက်လိက်ပရိုၚ်ၜါထပ် ဒးဒုၚ်စံၚ်ကီု ကပေါတ်သီုဖအိုတ်လေဝ် ဒးဒုၚ်ပလီုထောံတုဲ ပ္ဍဲဒဳဇြမ် ၁၉ အကာဲအရာ သွက်ဂွံကလေၚ်ဗဂေတ်ကမၠောန်ဟၟဲရ သၟာကမၠောန်တိုက်လိက်ပရိုၚ်တံ ဟီုရ။
အခိၚ်ရဲထ္ၜးဆန္ဒတံ ကၠောန်မံၚ်ပကီုပရာတ်တံဂှ် ပၠံၚ်ကေတ်ဏာ ကေမ်မရာတက်ဗီုရုပ်၊ သီုကဵုကပေါတ်မဳဒဳယာ အစာပရိုၚ်တံရ။
တင်စၟတ်သမ္တီ ပကောံပကေဝ်ကၠုၚ်လဝ်ကဵု နူအခိၚ်လံလံတေံသီုဖအိုတ်ဂှ် ဒးဒုၚ်ပလီုဏာ အစာပရိုၚ်တံဟီုရ။
ပ္ဍဲအခိၚ်ဒေသ ဗ္တံ ၁၁ နာဍံ ညးလ္ၚဵုကောံစိုပ်ကၠုၚ် ဂတမုက်ရုၚ်လိက်ပရိုၚ် Daily Star ဂှ် ဒပ်ဂီုကၠီုတံ နွံမံၚ်ကီုလေဝ် မုလေဝ်လုပ်စဵုဒၞာကဵုအကြာဟၟဲပုဟ် ဂွံတီရ။
ပ္ဍဲပွိုၚ် ၃၅ သၞာံ လိက်ပရိုၚ်လၟေၚ်တ္ၚဲ Daily Star တိတ်ဟွံမာန် အလန်ပထမကၠာအိုတ် ဒှ်တ္ၚဲဏံ အေဝ်ဒဳတာ ခါမေဝ်လ် အာမက် ဟီု ပ္ဍဲဒဳဇြမ်ပါ ၁၉ ရ။
ရုၚ်တိုက်လိက်ပရိုၚ် ဗတိတ်မံၚ်နကဵု ဘာသာ ဗၚ်ဂါလဳ Prothom Alo လေဝ် ဒးဒုၚ်သရိုဟ်ပလီုလဝ်ကီုရ။
တိုက်လိက်ပရိုၚ်ၜါဏံဝွံ တတ်ပါ်ကၠုၚ်လဝ် ပရေၚ်ဇြဟတ်ဟရိုဟ်အလဵုအသဳအဆက်က်တံ ပရေၚ်ဘပဠတံတုဲ တန်တဴကၠုၚ်လဝ် မဒှ်ရ။
ပ္ဍဲဂိတုဖေဖဝ်ဝါရဳဏံ ကၠောန်ပေါဲရုဲမာဲရောၚ် ညးတာလျိုၚ် ဗၚ်ဂလာဒက်ရှ်တံ လလောၚ်တြးတုဲ ဟာဒဳ ဒးဒုၚ်ပန်ဂစိုတ်လဝ်ရ။
Ref:BBC