ဖာအၚ်၊ ဒဳဇြမ်ပါ ၂၀
ဒပ်ပၞာန်သီအဝဵု သွက်ဂွံဗတိုက်သရိုဟ်အာ ပရေၚ်ပၞာန်ဂတးတံဂှ် စကာသုၚ်စောဲလဝ် ဗီုပြၚ်နဲကဲလဝေင်ပၞာန် ဟွံတုပ်ကဵုသဘဴမၞိဟ်တံ ပတိတ်လဝ်ဥပဒေစေဝ်ပၞောန်ရောၚ် ဥက္ကဌ ဗော်သွးကောန်ဂကူ ကရေၚ် KNU ပဒိုဝ်သဝ်ကွေဝ်ထူဝေန် ဟီုရ။
ပ္ဍဲကဵုလိက်သဝဏ်ပလံၚ်ဗစိုပ်လဝ် တ္ၚဲကၠောံသၞာံတၟိ ကောန်ဂကူကရေၚ် သၞာံ ၂၇၆၅ ပ္ဍဲဂိတုဒဳဇြမ်ပါ ၁၉ ဏံ ဥက္ကဌ ဗော်သွး ကောန်ဂကူကရေၚ် KNU ပဒိုဝ်သဝ်ကွေဝ်ထူဝေန် ဟီုလဝ်မဒှ်ရ။
စပ်ကဵု ဒပ်ပၞာန်သီလဝ်အဝဵု ဗွဲအဓ္ဓမဂှ် ပရေၚ်ဒစဵုဒစးလုပ်မံၚ် ပေါဲဗတိုက်ကဵု နဲကဲအမာတ်ကလုတ်နာနာ၊ နဲကဲလဝေင်ပၞာန်၊ နဲကဲပရေၚ်ဍုၚ်ကွာန်၊ ဂၠံၚ်နဲညးဍုၚ်ကွာန် ချဳဒရာၚ်နာနာသာ်တံ ဂၠိုၚ်တုဲပဵုဂၠိုၚ်တိုန်ကီုတုဲ ဇြဟတ်လေဝ် ပဵုခိုဟ်တိုန်ကၠုၚ်ရဂှ် ပဒိုကွေဝ်ထူဝေန် သ္ဂးရ။
ပါဲနူဍုၚ်လ္ၚဵုညိတုဲ နူကဵုဍုၚ်ဂၠးကဝ်ဂမၠိုၚ် ဟွံသ္ပစၟတ်သမ္တီကု ဂကောံပၞာန်တံတုဲ ဒေါအ်ထောံလဝ် ပရေၚ်ပံၚ်တောဲ ဆက်စၠောံ နနဲပရေၚ်ဍုၚ်ကွာန်၊ ပရေၚ်ပိုန်ဒြပ်ကေုာံ ပရေၚ်ရီုဗၚ်ထံက်ပၚ်တံတုဲ စပ်ကဵုပရေၚ်ပၞာန်၊ ပရေၚ်ဍုၚ်ကွာန်၊ ပရေၚ်ပိုန်ဒြပ်မ္ဂး ဒပ်ပၞာန် ဒှ်မံၚ်အခက်အခုဲဝါတ်ဂါတ်နာနာသာ်ရောၚ် ဥက္ကဌ KNU သ္ဂးလဝ်ရ။
ပ္ဍဲကဵုဒပ်ပၞာန်ဗမာတံ ဗတိုက်မံၚ်ဂကောံပၠန်ဂတးတံမ္ဂး စကာသုၚ်စောဲလဝ်နဲကဲလဝေင်ပၞာန် စှ်ေဗဗွဲ စေဝ်ပၞောန်ဥပဒေ တုပ်ကဵုမၞိဟ်တံ စကာမံၚ်ဟွံသေၚ်၊ ဒၞာဲဒပ်ပၞာန်ဟာ ဒၞာဲညးဍုၚ်ကွာန်တံဟာ ညိလေဝ် ဟွံပါ်ခြာလဝ် ပန်မံၚ်လွဟ်ဇၞော် ကဆံၚ်လှုၚ်ၚ်၊ နကဵုၜၚ်ကျာကြဳဖျေံဗုမ် ပ္ဍဲကဵုဒၞာဲကွာန် ဒၞာဲညးဂမၠိုၚ် တန်တဴမံၚ်စံၚ်မံၚ်တံ ဒၞာဲစမြိုၚ်ဘုတ်ဘာ ပရေၚ်သာသနာဟာ ညိလေဝ်ဟွံပါ်ခြာ ပလီုပလာ် ကၠောန်မံၚ် ပကီုပရာတ်နာနာသာ်ရ။
ပ္ဍဲအခိၚ်အခါ အကာဲအရာဗီုလၟုဟ်ဏံ ဟိုတ်နူဒပ်ပၞာန်ကၠောန်မံၚ် ပွမၞိဟ်တံဟွံသေၚ်တုဲ ပရေၚ်ညးဍုၚ်ကွာန် ဒိုက်ဂတ်ဝါတ်ကျာတ် နာနာသာ်ကီု၊ လီုလာ်စာ်ထောၚ်၊ ဒးဒုၚ်ဂစိုတ်၊ ဒွိၚ်ဒွာဲပွမဒးဒှ်မံၚ်ဒွိၚ်နာနာတုဲ ညးဂြိပ်ပါဲဒဴတိတ်အာနူဍုၚ် မွဲတ္ၚဲတုဲမွဲတ္ၚဲဂၠိုၚ်တိုန်မံၚ်ရောၚ် ပဒိုသဝ်ကွေဝ်ထူဝေန် ဟီုရ။
တုဲပၠန် ကောန်ဂကူတန်တဴမံၚ် ပ္ဍဲကၟိန်ဍုၚ်ပိုဲမွဲစွံ သီုကဵုဂကူကရေၚ်တံကီု အတိုၚ်ပၟိက်ဆန္ဒညးဍုၚ်ကွာန်သီုဖအိုတ် ညံၚ်ဂွံဍိုက်ပေၚ်အာမ္ဂး နကဵုဂၠံၚ်ဍာန် နဲကဲပရေၚ်ဍုၚ်ကွာန်မွဲဟေၚ်ရုံဂပ်ဟွံမာန်တုဲ ဒးစကာထမံက်အာရုပ်ရဴ ပရေၚ်ပၞာန်တံကီုရောၚ် သ္ဂးလဝ်ရ။
ကောန်ဂကူကရေၚ်တံသၟးဟွံက ညးဍုၚ်ကွာန် ကောန်ဂကူစုၚ်ၚ်တံညံၚ်ဂွံတီကၠိုဟ် ဒုၚ်လဝ်တဲ အကာဲအရာတံဏံတုဲ ပ္ဍဲကဵုပရေၚ်ပၠန်ဂတးဏံ ပံၚ်တောဲအာကဵု KNU မွဲစွံတုဲ ညံၚ်ဂွံပြံၚ်လှာဲအာ မူဝါဒ ပရေၚ်အုပ်ဓုပ်ကၟိန်ဍုၚ်ဏံမာန် ရေၚ်အာညးသ္ကံ မွဲကရောံမွဲစွံတုဲညံၚ်ဂွံၜှ်ကေတ် ပေါဲအံၚ်ဇၞး ဂှ် ပဒိုသဝ်ကွေဝ်ထူဝေန် ဗတိုက်ဖအောဝ်လဝ်ရ။
ခေတ်ပရေၚ်အုပ်ဓုပ် သၠောတ်တၠအဝဵုပၞာန်အိုတ်ကၠေံကၠက်တုဲ အခိၚ်ဒက်ပတန်ကၟိန်ဍုၚ်ဖိတ်ဒရေဝ် ဒဳမဝ်ကရေသဳတေံမာန်မှကလိဂွံ ပရေၚ်ၜိုဟ်လလမ်ဍုၚ်ဍာံဍာံမာန်ရောၚ် ဥက္ကဌ KNU ဟီုလဝ်ရ။
တုဲပၠန် အခိၚ်လၟုဟ် သွက်အဝဵုဒပ်ပၞာန် ညံၚ်ဂွံခိုၚ်ကၠိုက်အာထာဝရလၟိန်မာန် အဃောဍေံတံဂစာန်ကၠောန်မံၚ်ဂှ် အတိုၚ်သၞောဝ် ၂၀၀၈ သွက်ဂွံကၠောန်အာပေါဲရုဲမာဲ ပလေဝ်စမံၚ်တုဲ အဓိက တင်ရန်တၟံ ဒပ်ပၞာန်တံဂှ် ညံၚ်ဍေံတံဂွံထိၚ်ချုက်လဝ် အဝဵုပရေၚ်ဍုၚ်ကွာန်ထာဝရမာန်ရောၚ် သ္ဂးလဝ်ရ။
ညံၚ်ဍေံတံသွက်ဂွံဇၞး ပေါဲရုဲမာဲအလီဏံ ပလေဝ်ပလေတ်စဳရေၚ်မံၚ်တုဲ က္ဍိုပ်သ္ကိုပ်ပၞာန် လုပ်ဒုၚ်ရုဲမာဲ ဗွဲမဂၠိုၚ်တံ ညံၚ်ဂွံဇၞးမာဲဟီုတှ်ေ စကာအာနဲကဲစုၚ်ၚ်ရောၚ် ဥက္ကဌ KNU ပဒိုသဝ်ကွေဝ်ထူဝေန် ဟီုရ။
ပရိုၚ်-သြၚ်လောန်တိုၚ်မ်
Photo – KNU