မတ်မလီု ၊ ဒဳဇြမ်ပါ ၂၀
ပ္ဍဲတွဵုရးမန် အခိၚ်ကြပ်ကၠုၚ်မံၚ်ကဵု ပေါဲရုဲမာဲကဝ်မယှေန်ပၞာန်ကၠောန်အာဏံ ပရေၚ်ဗက်ဂၠာဲရပ်စၟဳစၟတ် ပ္ဍဲအကြာဒေသတံ ပဵုတုဲကြီုတိုန်မံၚ်ရောၚ် ညးဒေသတံဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲပၞော်လုပ်တိတ်ဍုၚ် ဒၞာဲမၞိဟ်ဂၠိုၚ် ဒၞာဲဂၠံၚ်ပန်သွာၚ် ဒၞာဲဟွံတော်ခယျလဝ်တံဂှ် ဂေတ်ဍုၚ်တုဲ ကဝ်မယှေန်ပၞာန် ဗက်စၟဳစၟတ် ထရတ်မံၚ်ညးဍုၚ်ကွာန်တံအိုတ်အစောန်ရ။
ဒပ်ပၞာန် ဒပ်ဗၠာဲသၟိၚ်၊ ဂကောံဒပ်မၚ်ကွာန်၊ ဂကောံဂီုကၠီု ညးဍုၚ်ကွာန် ကဵု ဂကောံဗတိုက်သရိုဟ်ပကီုပရာတ်တံ စကာလဝ်ဇြဟတ်ဂၠိုၚ်ၚ်တုဲ ဗက်ဖန်ကၠောန်မံၚ် ပရေၚ်မာတ်ဆိုအ် ရပ်ထိၚ်မၞိဟ်တံ မဒှ်ရ။
ကြပ်ကဵုပေါဲရုဲမာဲဟဍၚ် နူကဵုကဝ်မယှေန်ပၞာန် ဆက်ပတေၚ်လဝ်ပရေၚ်ဂီုကၠီု၊ စကာဇြဟတ်ဂၠိုၚ်ၚ်တုဲ ပ္ဍဲဇၟာပ်ပ်ဒၞာဲဂှ် ဗက်ဂၠိုက်ဂၠာဲစၟဳစၟတ်မံၚ်အတိုၚ်မွဲတ္ၚဲရဂှ် ညးဍုၚ်ကွာန်ရေဝ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ဟိုတ်နူကြပ်ကၠုၚ်ကဵု အခိၚ်ရုဲမာဲရ ဒှ်မာန်။ ပရေၚ်ဂီုကၠီု ပတေၚ်လဝ်အိုတ်စောန်။ ဇြဟတ်ဂၠိုၚ် ဒၞာဲဒိုဟ်စုၚ်ၚ် ဍေံတံဗက်ဆုဲပြံၚ်ဒၞာဲစၟဳစၟတ်မံၚ် အတိုၚ်မွဲတ္ၚဲရဟီုဂွံ။ ဗက်စၟဳစၟတ်မံၚ် စေက်က်ရ” သာ်ဝွံသ္ဂးရ။
ဟိုတ်နူလပါ်ကဝ်မယှေန်ပၞာန် ဗက်စၟဳစၟတ်ကြီုတိုန်ဟဍၚ် သၟတ်အပ္ဍဲဒေသတံဟွံဂံၚ်တိတ်မ္ၚးတုဲ ညးလ္ၚဵုနကဵုစိုတ်ဒှ်ဒွိၚ် စွံသတိဒးအာစဴမံၚ်ကမၠောန်ရောၚ် ညးဆက်ဟီုရ။
ပရေၚ်ဒပ်ကဝ်မယှေန်ပၞာန် ဗက်ရပ်မၞိဟ် မွဲတ္ၚဲတုဲမွဲတ္ၚဲ အကာဲအရာပေရအ်ကြီုတိုန်မံၚ် ရပ်ဏာသၟတ်လ္ၚဵုတံတုဲ မွဲအလန်ဓဝ် ဟရိပ်ပလံၚ်ဏာ ဒၞာဲပကောံကောန်ပၞာန်တၟိတံလေဝ်နွံမံၚ်ရောၚ် ညးဒေသၜဳလေၚ်မွဲတၠ ဟီုရ။
“စၟဳစၟတ်ကြီုကြာန်တိုန်သၟး။ လဆောဝ် ၁၃/ တံ။ ဓဇက်ဖျေံနူကွဳစက်လေဝ်နွံ။ ရပ်မံၚ်အရိုဟ်တ္ၚဲ။ နူဂယးလဝ်ရပ် သဝ်တ္ၚဲလေဝ်ရပ်။ အခိၚ်ကၠာတေံ ရပ်လပါ်သဝ်တ္ၚဲ၊ လၟုဟ်အခိၚ်နူဂယးလေဝ် ရပ်။ ဟွံလံ ဒေါအ်တ္ၚဲလေဝ် ရပ်ဏောၚ်။ တၞးကာဒ်ကောန်ဍုၚ် ဟွံကၠးမ္ဂး ပလံၚ်ထောံဒၞာဲယိုက်ဝန်ပၞာန်” သာ်ဝွံ သ္ဂးရ။
ကြပ်ကၠုၚ်ပေါဲရုဲမာဲဟဍၚ် စၟဳစၟတ်လေဝ်ကြာန်တိုန်မံၚ်။ ထ္ၜးဟိုတ် ဟွံသၚ်ကာ ဂးတုဲ ကဝ်မယှေန်ပၞာန်ဗက်ရပ်သၟတ်တံတုဲ သီုကဵု လက်ဆောၜုၚ်တက် ပျဲပျာံလဝ်ကီုရ။
တုဲပၠန် သၟတ်ဒးဒုၚ်ရပ်ကဵုဒပ်ကဝ်မယှေန်ပၞာန် ဗွဲမဂၠိုၚ်တံဂှ် ပါအာကရောံယိုက်ဝန်ပၞာန်တုဲ ယဝ်ရ တီညာတ် ကၠောံဍမံၚ်ကဵု ရဲဂကောံကဝ်မယှေန်ပၞာန်တံမ္ဂး ထပက်သြန်ဂၠိုၚ်ၚ်တုဲ နုက်ကေတ်မာန်ရဂှ် ညးဒေသတံ ဟီုရ။
ဟိုတ်နူ ရဲသၟဝ်တဲကဝ်မယှေန်ပၞာန်တံ ဗက်ဂၠာဲရပ်စၟဳစၟတ် ပဵုကြီုတိုန်ဂှ်ရ ပရေၚ်အာတရဴ ဂၠံၚ်ဍာန်လံလအာကီု၊ အခိၚ်ဟွံရုဲ ဒးဒုၚ်ရပ်မာန်၊ ဟိုတ်ဖဵုမုဟွံတီ ဒးဒုၚ်ၜုၚ်တက်ပျဲပျာံမာန်တုဲ တိတ်မ္ၚးတှ်ေလေဝ် ပရေၚ်ဂီုကၠီုဟၟဲရ။
ပ္ဍဲတွဵုရးမန်ဂှ် နူကဵုကဝ်မယှေန်ပၞာန် ၜိုန်ရ ဂၠိုက်ဂၠာဲစၟဳစၟတ်ကြီုမံၚ်ကီုလေဝ် ပရေၚ်ကမၠတ်ကၠတ်၊ ပၠံၚ်ၜး၊ ပန်ဂစိုတ်၊ဒမၠဗတိုက်တံ ဒှ်မံၚ်ဂၠိုၚ်လောန်တုဲ ဆလံလေဝ်ကေၚ်ရပ်စပ်ကဵုလဝ်ဒုဟ် ဟၟဲဏီပုဟ်ဂှ် ဂွံတီလဝ်ရ။
ပရိုၚ်-သြၚ်လောန်တိုၚ်မ်
Photo – CJ