ဗရာတ်သေဝ်လ်၊ ဒဳဇြမ်ပါ ၂၆
ယဝ်ရ ယူရောပ်ဖျေံသ္ဂုတ်သွာတ်ဗၠေတ်အာမ္ဂး သွက်ဂွံဇီုကပိုက်အာကဵု အန္တရာဲပရေၚ်ဂီုကၠီုတံမာန်ရောၚ် ညးဇၞော်နေတိုဝ် မက်ခ် ရူတဳ ကဵုဏာသတိရ။
ပ္ဍဲအခိၚ်သၞာံ ၂၀၂၅ အိုတ်ဏံ ညံၚ်ဂွံဆက်ရီုဗၚ်ထံက်ပၚ်ကဵု ယူခရုၚ်ဂှ် ညးတေံ ဗတိုက်ဖအောဝ်လဝ် ဍုၚ်ယူရောပ်တံရ။
ဍုၚ်ဂကောံနေတိုဝ်မွဲမွဲ နကဵုရတ်ယှာ ညံၚ်ဟွံဂွံကၠုၚ်ဗတိုက်မာန်ဂှ် သွက်ဂွံဒစးဒုၚ်လဝ်ဟီုမ္ဂး ဇြဟတ်ယူခရုၚ်ထတ်မံၚ်မှ ဒှ်မာန်ရောၚ် ပ္ဍဲကဵုရူတဳ ဆဵုဗဂဟီုလဝ်ကဵု ဌာန်ပရိုၚ် dpa ဂှ် ဟီုလဝ်ရ။
ပ္ဍဲကဵုဂိတုဂျောန်တုဲကၠုၚ် ကၠောန်လဝ်သဘၚ်သဳကၠဳ အတိုၚ်ကဵုလဝ်ဂတိတုပ်လဝ်စိုတ် ပ္ဍဲဍုၚ်တဳဟုက်ဂှ် နကဵုဍုၚ်ဂကောံနေတိုဝ်တံ ဘဏ္ဍာပရေၚ်စဵုဒၞာ ထေက်ကဵုဒးသၠုၚ်ပတိုန်လဝ်ရောၚ် ညးဟီုရ။
အရာကိစ္စၜါသာ်ဏံ ဇကုတံဖန်လဝ် သွက်ဂွံစဵုဒၞာကုဇကု ဇြဟတ်တဴမံၚ်မ္ဂး သမ္မတရတ်ယှာ ပူတေန် ညိလေဝ် ဂစာန်ကၠုၚ်လပါ်ဇကုတံ ဟွံသေၚ်ပုဟ် ညးဟီုရ။
ဍုၚ်နေတိုဝ်တံ ထေက်ကဵုဒးဗဂပ်လဝ်လွဟ် အခိၚ်ဗွဲမပြဟ်တုဲ ယဝ်ရဟွံဖန်မ္ဂး အကာဲအရာအန္တရာဲ ပရေၚ်ဂီုကၠီုဂှ် စနူကဵု သၞာံ ၂၀၂၇ ဏံ စိုပ်ကၠုၚ်ပြဟ်ဟ်မာန်ရောၚ် သ္ကိုပ်ဝန်ဇၞော်တြေံ နေဝ်တာလာန် ရူတဳ ဟီုရ။
စရိတ်ဘဏ္ဍာ ပရေၚ်စဵုဒၞာရတ်ယှာဂှ် လၟုဟ်ဏံ စိုပ်ကၠုၚ်လၟိဟ်သြန်လုပ်ဍုၚ် ၄၀% ရ ညးထံက်ထ္ၜးဟီုလဝ်ရ။
ယဝ်ရလ္ၚတ်ရံၚ်အာပေါဲဗတိုက်ယူခရုၚ်မ္ဂး သွက်ဂွံဒုၚ်လီုလာ်အာဂှ် ဆန္ဒပူတေန်ဟၟဲ၊ ကောန်ပၞာန်ရတ်ယှာတံ ချိုတ်လဝ် ၁ ဒဿမ ၁ ပြကောတိကိုဋ်တုဲယျ ရူတဳ ဟီုရ။
အခိၚ်ကိုပ်ကၠာ အမေရိကာန်တံ အဓိကကဵုလဝ်အထံက်ပၚ် ယူခရုၚ်ကီုလေဝ် နူကဵုထရ စိုပ်ကၠုၚ်သ္ၚိဗတာၚ်တုဲဗွဲကြဴဏံ ဍုၚ်ယူရောပ်တံ ဒးထပေၚ်လဝ်ကဵုမံၚ် စၞးဝါယှေန်တန်ရ။
ယဝ်ရ ပူတေန် မာန်အာယူခရုၚ်မ္ဂး ဒေါအ်အာဒၞာဲဂှ်ဟွံသေၚ်တုဲ ဆက်ဗတိုက်ကၠုၚ် ဍုၚ်ဂကောံနေတိုဝ်တံမာန်မံၚ် ပရေၚ်ဒွိၚ်ဒွာဲ ယူရောပ်တံ သၠုၚ်တိုန်မံၚ်ရောၚ်။
Ref: dpa