တိုကျို၊ ဒီဇြမ်ပါ ၂၇
ပ္ဍဲဒေသ အခိၚ်အကာဲအရာပရေၚ်ကြံၚ်မ္ၚိုဟ်ဏံ သွက်ပရေၚ်ဘဏ္ဍာစဵုဒၞာသၞာံဂတးတေံ အလဵုအသဳဂျပါန် စကာအာသြန်ဒဝ်လာအမေရိကာန် ၅၈ ဗဳလဳယာန် ပ္ဍဲကဵုဒဳဇြမ်ပါ ၂၆ သ္ပလဝ်ဒတန်ရ။
အစောန်စရာဲဗတိုက် ဒပ်ပၞာန်ဂျပါန် ညံၚ်ဂွံကလေၚ်ခိုဟ်တဴကၠုၚ်မာန်၊ သွက်ဂွံစဵုဒၞာဇိုၚ်ပြၚ်ၜဳ နကဵုသၞောတ်ကမ်သၠောဝ်ခရုတံ သၞောတ်ဒရုၚ်ဟွံစကာမၞိဟ်တံ ညံၚ်ဂွံပိုၚ်ပြဳမာန် ရန်တၟံတုဲ ကဵုအခေါၚ် စကာပရေၚ်ဘဏ္ဍာပရေၚ်စဵုဒၞာ မဒှ်ရ။
နူကဵုဗာတ်ဂျက် သၞာံဘဏ္ဍာ ၂၀၂၅ ဂှ် လၟုဟ်ရန်လဝ်ဗာတ်ဂျက် ပဵုသၠုၚ်တိုန်အာ ၉ ဒဿမ ၄% မဒှ်ရ။
ပၞောဝ်ကဵုၚုဟ်မးပတိတ်ကပေါတ်ဍုၚ်ဂျပန် ၂% တံဂှ် သွက်ဂွံစကာအာ သွက်အရၚ်လွဟ်တံ ပွိုၚ် ၅ သၞာံ စဳဇန်လဝ်တုဲ လၟုဟ်တှ်ေ စိုပ်မံၚ် ပ္ဍဲသၞာံစတုတ္ထ မဒှ်ရ။
အခိၚ်အကာဲအရာကြံၚ်မ္ၚိုဟ်မံၚ်ကဵုကြုက်တံ အလဵုအသဳဂျပါန် သၠုၚ်ပတိုန်လဝ်ဘဏ္ဍာပရေၚ်စဵုစၞာ ၜက်သၞောတ်ဏံ မံက်တိုန်ရ။
ယဝ်ရ ကြုက်ဂစာန် သီကေတ်ဍုၚ်ထာဲဝါန် နကဵုဇြဟတ်ပၞာန်မ္ဂး ပ္ဍဲပရေၚ်ပၞာန်ဏံ ဍုၚ်ဂျပါန် ပါလုပ်ကၠုၚ်ရောၚ် သ္ကိုပ်ဝန်ဇၞော်ဂျပါန် သာနေဝ် တာကာအိချဳ ဟီုလဝ်ပ္ဍဲဂိတုနဝ်ဝမ်ပါရ။
ပရေၚ်ဘဏ္ဍာစဵုဒၞာဂျပါန်ဂှ် သွက်ဂွံသၠုၚ်ပတိုန် အခိၚ်အမေရိကာန်ကဵုမံၚ်ဇြဟတ်ဟရိုဟ်ဏံ စိုပ်ဂိတုမာတ်ချ်ဏံမ္ဂး စရိတ်ပရေၚ်စဵုဒၞာပၞာန် စကာဒဵုစိုပ်သြန်လုပ်ဍုၚ် ၂% ရောၚ် ကဵုလဝ်ဂတိနွံရ။
အတိုၚ်အစဳဇန်တြေံတေံ ကၠာဟွံစိုပ်အခိၚ် ဟပြဟ်လဝ်ၜါသၞာံတုဲ ထမံက်တိုန်ရုပ်ရဴ သၠုၚ်စကာအာ ပရေၚ်ဘဏ္ဍာပၞာန် မဒှ်ရ။
ဍုၚ်ဂျပါန် ဇြဟတ်ပၞာန် ညံၚ်ကလေၚ်ခိုဟ်တိုန် ကၠာဟွံစိုပ် သၞာံ ၂၀၂၆ ဂိတုဒဳဇြမ်ပါတေံမ္ဂး ညံၚ်ဂွံကလေၚ်သ္ၚဳဂၠိပ်အာ ပရေၚ်ဂီုကၠီုကဵု မူဝါဒပရေၚ်စဵုဒၞာတံဂှ် စဳဇန်လဝ်ရ။
ပ္ဍဲဍုၚ်ဂျပါန် လၟိဟ်ညးအယုက်ဇၞော်ဇၞော်တံဂၠိုၚ်တိုန်၊ လၟိဟ်မၞိဟ်အောန်စှ်ေကၠုၚ် ဇြဟတ်သၞာဲဒါဒပ်ပၞာန် နွံကၠုၚ်ပၟိက်တုဲ လွဟ်ဟွံဒးစကာမၞိဟ်တံ သွက်ဂွံထပ်ဗပေၚ်ကဵု ရန်တၟံလဝ်ရ။
အတိုၚ်အစဳဇန် ကၠာဟွံစိုပ်သၞာံ၂၀၂၈ တေံမ္ဂး ဂျပန်တံ သွက်ဂွံစဵုဒၞာအာ ဇိုၚ်ပြၚ်ၜဳတံဂှ်တှ်ေ စကာၜၚ်ကျာ ၜၚ်ဗၠိုပ်ဍာ် မၞိဟ်ဟွံဒဳတံရောၚ် စဳဇန်လဝ်ရ။
ဂျပါန်တံ ပံၚ်တောဲလဝ်ကဵု ဍုၚ်မိတ်သဟာဲဍုက်ကေဝ်ညးတံတုဲ သၠုၚ်အသိၚ်ပတိတ်ကၠောန်မံၚ်လွဟ် အပ္ဍဲဍုၚ်ရ။
Ref:AP