သိုဝ်၊ ပျုၚ်ယာန်၊ ဒီဇြမ်ပါ ၂၈
သွက်ဒပ်ပၞာန် မကမ်သၠောဝ်သွက်ဒပ်ပၞာန် ညံၚ်သ္ဂောံဂွံအာ ရုမ်ဂပ်ဍိုက်ပေၚ်မာန်ဂှ် သိုၚ်ခၞံတိုန်ရုၚ်ဂမၠိုၚ်ပတိုန်စက်တံတုဲ ထပဵုအသိၚ်ပတိတ်ကမ်သၠောဝ်တံညိဂှ် က္ဍိုပ်သ္ကိုပ်ကိုဝ်ရဳယာသၟဝ်ကျာ စၞောန်ပ္ညုၚ်ကဵုဏာ ညးတာလျိုၚ်ဂမၠိုၚ် မဳဒဳယာဍုၚ် ပတိတ်လဝ်ရ။
ရန်တၟံကဵု အစောံစရာဲ ဍာ်ဒကေဝ်ပွန် ညံၚ်ဂွံတဴတက်ကၠုၚ်တုဲ သၞာံတုဲကၠုၚ်တံဏံ ကိုဝ်ရဳယာသၟဝ်ကျာ ထပဵုစမ်ၜတ်လဝ် မကမ်သၠောဝ်တံဂှ် ညးလ္ၚတ်တံ ဟီုရ။
သွက်ဂွံကော်ဆော ကိုဝ်ရဳယာသၠုၚ်ကျာကဵု အမေရိကာန်တံကီု ကၠာဟွံပလံၚ်မကမ်သၠောဝ်ဇရေၚ် မဟာမိတ်ရတ်ယှာဂှ် ကၠောန်စမ်ၜတ်တံ မဒှ်ရ။
ကေန်ဂျုၚ်အာန်ကဵု ညးတာလျိုၚ်အဆံၚ်လ္တူတံ အာစိုပ်ဇရေၚ် ရုၚ်စက်ပတိတ်တံတုဲ သၞာံဂတမ္ဂး ကမၠောန်ဂၠိုၚ်တိုန်ရောၚ်မဒှ်တုဲ ဒစးဒုၚ်ပလေဝ်ပလေတ်စလဝ်ညိ ကဵုလဝ်စၞောန်နွံ ဌာန်ပရိုၚ်ကၟိန်ဍုၚ် KCNA ပတိတ်လဝ်ရ။
အတိုၚ်ပၟိက်ဒပ်ပၞာန်နွံတိုန် ညံၚ်ဂွံဗပေၚ်ကဵုမာန် ညံၚ်ဂွံဂစာန်ထပဵုပတိတ်တိုန်ကမ်သၠောဝ်တုဲ သွက်ဂွံပတိတ်အာ မကမ်တံမာန် သိုၚ်ခၞံအာရုၚ်စက်တၟိတံညိဂှ် ကေန်ဂျုၚ်အာန် စၞောန်ပ္ညုၚ်လဝ်ရ။
ညံၚ်ဂွံထပေၚ်ကဵုဇြဟတ်ဒုၚ်ဒဝ်စဵုဒၞာ အစောံစရာဲပေါဲပၞာန်မာန်ဂှ် ပရေၚ်ကၠောန်ပတိတ်ကမ်သၠောဝ်တံကဵု ခၞော်မကမ်တံ ကိစ္စဇၞော်ကွေံကွေံရောၚ် ကေန်ဂျုၚ်အာန် ဟီုရ။
လောန်ကၠုၚ် ၜိုတ်ပန်သၞာံတေံ ဗွဲကြဴ ရတ်ယှာ ၜက်ၜေတ်ဗတိုက် ယူခရုၚ်ဂှ် မဝ်သကိုကဵုပျုၚ်ယာန် ပဵုဍုက်ကေဝ်ကြပ်အာတုဲ ကောန်ပၞာန်ကဵု မကမ်သၠောဝ်၊ လွဟ်ဇၞော်တံဂှ် ကိုဝ်ရဳယာသၟဝ်ကျာ ရီုဗၚ်ပလံၚ်ကဵု မံၚ်ရ။
နူကဵုရတ်ယှာပၠန် ကလေၚ်ရီုဗၚ်ကဵုမံၚ် နဲကဲပညာအဆံၚ်လှုၚ် နဲကဲအဆံၚ်လှုၚ် သွက်ကိုဝ်ရဳယာသၟဝ်ကျာရ။
ပ္ဍဲတ္ၚဲအကြာတံဏံဂှ် ကေန်ဂျုၚ်အာန် အာစိုပ်လ္ၚတ်ကျောဝ်ရံၚ် ပရေၚ်သိုၚ်ခၞံ ၜၚ်ဗၠိုပ်ဍာ် စကာနျူကလဳယာ အလန်ကၠာအိုတ်ရ။
ဇြဟတ်ပၞာန်ကျာဍိုန်လျမံၚ်ဂှ် သွက်ဂွံဗပေၚ်အာဇြဟတ်မာန် ကိုဝ်ရဳယာသၟဝ်ကျာ အာတ်မိက် ရတ်ယှာမာန်ရောၚ် ညးလ္ၚတ်တံ ဟီုရ။
Ref:Reuters