ရေဝ်၊ ဒဳဇြမ်ပါ ၃၁
တွဵုရးမန် ဍုၚ်ရေဝ် ပ္ဍဲအရာပ်သဳရိခေမာ ဂၠံၚ် ၈ ၊ အခိၚ်သဝ်တ္ၚဲ ၄ နာဍဳ ဒဳဇြမ်ပါ ၂၉ ဂှ် အကြာပ်ဇၞော်ဒပ်ဗၠာဲသၟိၚ် မွဲတၠ ဒးဒုၚ်ပန်ဂစိုတ်တုဲ ချိုတ်လဝ်ရဂှ် ညးဒေသတံဟီုကဵုဌာန်ပရိုၚ်သြၚ်လောန်တိုၚ်မ်ရ။
နူကဵုရုၚ်ဒပ်ဗၠာဲသၟိၚ်ခရိုၚ်ရေဝ် အကြာပ်ဇၞော်ဗၠာဲသၟိၚ်ဖုၚ်မျေအ် အယုက် ၅၀ မွဲတၠဓဝ် ဍိုက်တိတ်ကၠုၚ်ကွဳလိုန်ဓါတ်ဂှ် ရဲဂကောံလကိုဟ်ရေဝ် ဍံၚ်ဗက်လက်ကရဴတုဲ ပန်စုတ်ကြပ်ပ်ရ။
အကြာပ်ဇၞော်ဗၠာဲသၟိၚ်ဖုၚ်မျေအ် ဒးဒုၚ်ပန်စုတ်ကြပ်ပ် ဒးလဝ်ဝပ် ၄ ဒၞာဲတုဲ အခိၚ်စိုပ်ရုၚ်ဂဥုဲဂှ်တှ်ေ လမျီုအိုတ်ချိုတ်အာ သ္ဂးရ။
ပ္ဍဲကဵုဒၞာဲပန်ဂစိုတ်လဝ်ဏံ ရဲဂကောံလကိုဟ်ရေဝ်တံ နူအကြာပ်ဇၞော် ဗၠာဲသၟိၚ်ဖုၚ်မျေအ်ဂှ် သီကေတ်ထောံ လွဟ်မွဲဇကိုအ်ကဵု ကပေါတ်ဒပ်ဗၠာဲသၟိၚ်လ္ၚဵုတံနွံ ဂွံတီရ။
အတိုၚ်ညးဒေသတံဟီုမ္ဂး အကြာပ်ဇၞော်ဗၠာဲသၟိၚ်ဒးပန်ဂစိုတ်တုဲ နူရဲလပါ်ကဝ်မယှေန်ပၞာန်တံ ပါ်လဝ်မၞိဟ်ၜိုတ် ၂၀ ဂကောံတုဲ ဗက်မာတ်ဆိုအ်ဂၠိုၚ်ဂၠာဲမံၚ် အပ္ဍဲဍုၚ်မ္ၚးဍုၚ်ဒၞာဲစုၚ် ဂွံတီရ။
လောန်ကၠုၚ်ဒဳဇြမ်ပါ ၇ တေံကီု ပ္ဍဲကွာန်အရုတံၚ် ပွိုၚ်ဍုၚ်ရေဝ်ဂှ် ဂကောံလကိုဟ်ရေဝ်တံ လုပ်ပန်ရုၚ်ဒပ်မၚ်ကွာန်ကဵု ဗဒိုပ်သၞေဟ်ကၚ် “လေၚ်ဥူ” က္ဍိုက်ပ်ဂှ် ဂကောံဒပ်မၚ်ကွာန် ချိုတ်လဝ် ၃ တၠရ။
ပရိုၚ်-သြၚ်လောန်တိုၚ်မ်