မတ်မလီု ၊ ဒဳဇြမ်ပါ ၃၁
ပ္ဍဲတွဵုရးမန် ကဝ်မယှေန်ပၞာန် ကၠောန်ပေါဲရုဲမာဲသ္ကုတ်ပထမတုဲအာဗက်ဂှ် ကဵုအခေါၚ်ပံက်ဝိုၚ်ဝေၚ် ရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူအခိၚ်လာ်ဝှ်တိကှ်တေံ ညံၚ်ရဲကဵုလဝ်အခေါၚ်လုပ်သၞောဝ် ပံက်ကၠုၚ်လဝ်ဝိုၚ်ဝေၚ်တံဂှ် စနူဒဳဇြမ်ပါ ၂၅ တုဲ ဒဵုကဵုအခိၚ်ပေါဲရုဲမာဲသီုဖအိုတ်တုဲဒှ်အာ ကဝ်မယှေန်ပၞာန်တွဵုရး မာတ်ဗဒေါအ်လဝ်ဗွဲယာယဳရ။
ဆဂး ကဝ်မယှေန်ပၞာန်တွဵုရးမန်ဂှ်တှ်ေ ကၠောန်ပေါဲရုဲမာဲသ္ကုတ် ၁ တုဲဗက် တ္ၚဲယးဂတ ပ္ဍဲဒဳဇြမ်ပါ ၂၉ ဂှ် ကဵုအခေါၚ်ပံက်ဝိုၚ်ဝေၚ် လ္တူအရာပ်လ္တူဍုၚ် ဒၞာဲတြေံအတိုၚ်ဗီုတြေံတေံ ကဵုလဝ်အခေါၚ်မဒှ်ရ။
ပေါဲရုဲမာဲတုဲအာဗက်ဂှ် ကဝ်မယှေန်ပၞာန် ကဵုအခေါၚ်ပံက်ဝိုၚ်ဝေၚ်တံဂှ်တှ်ေ မာတ်ထောံဂၠံၚ်ဇၞော် ညးဂမၠိုၚ်အာကၠုၚ်တံတုဲ ကဵုလဝ်အခေါၚ်ပံက်လဝ်ဝိုၚ်ဝေၚ်နွံမံၚ်ရောၚ် ညးမံၚ်လ္တူဍုၚ်မတ်မလီု ဟွံမိက်ထမံက်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“နူတၞေံတေံ ပေါဲရုဲမာဲတုဲအာ။ ဝိုၚ်ဝေၚ်တံ ကလေၚ်စမံၚ်ယျ။ ဗော်ပျဳခိုၚ်ဖျိုဝ်ဇၞးအာမာဲတုဲ အတိုၚ်ပၟိက်စိုတ်ဍေံတံ ဗီုပြၚ်ဍေံတံကၠောန်အာရ။ အခိၚ်ကၠာတေံ ဗဒှ်ပေါဲတှ်ေ ဥပမာ လ္တူဂၠံၚ်ဇၞော်ညးဂမၠိုၚ်အာကၠုၚ်တှ်ေ အရၚ်မၞိဟ်တံဂွံအာ စွံလဝ်မွဲကရေက်ဏီ။ လၟုဟ် စိုပ်သဝ်တ္ၚဲ ၄-၅ နာဍဳဗက် မာတ်ထောံဂၠံၚ်ဇၞော်ဟဂှ်ရ။ ပျူသဝ်ထဳတံ ထ္ၜးအဝဵုကွေံကွေံ ကွဳလိုန်ဓါတ်တံလေဝ် တတ်ဟွံဂွံရ။ ကွဳစက်လေဝ်အာဟွံဂွံ။ ဆၜိုတ်မၞိဟ်တံ ကွာ်တတ်အာဂွံ ဍေံတံၜက်ကာဲလောန်အာကွေံကွေံ” သာ်ဝွံ သ္ဂးရ။
ဂကောံဒပ်မၚ်ကွာန်၊ ပျူသဝ်ထဳ မၚ်ပရေၚ်ဂီုကၠီုပေါဲရုဲမာဲ၊ ဂကောံဗတိုဟ်သရိုဟ် ပရေၚ်ဂီုကၠီုညးဍုၚ်ကွာန်ကေုာံ ဗတိုက်ပကီုပရာတ်တံပၠန်ရ ကေတ်လဝ်တာလျိုၚ်ပရေၚ်ဂီုကၠီုဝိုၚ်ဝေၚ်ရဂှ် ညးဆက်ဟီုရ။
မွဲလပါ်ပၠန် သဘၚ်ကျာ်၊ လံၚ်ဗဗေၚ်ဇၞော်၊ ပေါဲသဘၚ်ကထိုန်၊ ပေါဲရာသဳတံ ထ္ၜးဟိုတ်နာနာ ပေါဲကၠောန်ကေတ်သဘၚ်တံနွံမ္ဂး ကဝ်မယှေန်ပၞာန်တွဵုရးမန် ကဵုလဝ်အခေါၚ်ညံၚ်ရဴလုပ်သၞောဝ် မဒှ်ကီုရ။
ဝိုၚ်ဝေၚ်မွဲခုၚ် သွက်မွဲဗ္တံ ကရပ် ပန်ကိုတ်ဘာ်(၄၅၀၀၀၀) ဒကေဝ်ဒးကဵုအကံက်။ မွဲဗတံမ္ဂး ခုၚ်ဝိုၚ်ဝေၚ်နွံမံၚ်ကြပ် ၅၀ ခုတုဲ ကဝ်မယှေန်ပၞာန်ကဆံၚ်ၚ် စနူသ္ကိုပ်ဝန်ဇၞော်တွဵုရးတံ ဒဵုကဵုညးတာလျိုၚ်ဌာနအဆံၚ်ၚ်တံ ပါ်ပရေအ်ကေတ်သြန် အကံက်တံဏံရ။
ဟိုတ်နူကဵုလဝ်အခေါၚ်ဝိုၚ်ဝေၚ် ညံၚ်ရဴလုပ်သၞောဝ်ဒှ်မံၚ်ဂှ်တှ်ေ စနူကွးဘာသၟတ်တံဒဂေတ်လီုလာ်မံၚ်၊ ပရေၚ်ပၠံၚ်ၜးကၠတ်ဂၠံက်တံလေဝ်မွဲဏှမွဲဏှ ဆက်ဒှ်မံၚ်ဟဂှ်ရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – CJ