ၜၚ်ကံက်၊ ဂျာန်နဝါရဳ ၁
အတိုၚ်တုပ်လဝ်စိုတ် ပ္ဍဲဒဳဇြမ်ပါ ၂၇ တေံမွဲသ္ကုတ်မွဲသ္ကူဂှ် သေံကလေၚ်ဗလးကဵုဏာ ကောန်ပၞာန်ခမေန် ၁၈ တၠ ရပ်ဂွံလဝ် အကြာပေါဲဗတိုက်ဂိတုဂျူလိုၚ်တေံရ။
သွက်ဂွံဗလးကဵုကောန်ပၞာန်တံဏံ ဟိုတ်နူသေံဒှ်မံၚ်ဒွိၚ် ခမေန်ဖံက်ပကဝ်လဝ်ပရေၚ်တၚ်တုပ်စိုတ်ဂှ် လဇုဲလဇအာ မွဲတ္ၚဲကီုရ။
ဆဂး အတိုၚ်သေံတုပ်လဝ်စိုတ်ဂှ် အမာတ်ကလုတ်ကြုက် ကဵုဇြဟတ်ဟရိုဟ်တုဲ ဒးဗလးကဵုလဝ် မဒှ်ရ။
အကြာမွဲဒမြိပ်ဒေသပယျဵု သေံကဵုခမေန် ပရေၚ်ကြံၚ်မ္ၚိုဟ်ဒှ်ကၠုၚ်လဝ်ဟွံတိုန်ဟွံစှ်ေမံၚ်တံ မွဲလန်ဓဝ် ဟတိုဟ်တိတ်ကၠုၚ် ဒှ်ကၠုၚ်ပေါဲဗတိုက်သတ္တဟဗွဲမဂၠိုၚ်ဂှ် ညးဒဴပါဘဲပၞာန်ကြပ်ပေၚ်အာ လၟိဟ်မွဲပြကောတိကိုတ်ရ။
ပ္ဍဲကဵုတၚ်တုပ်စိုတ်ဒဳဇြမ်ပါ ၂၇ မ္ဂး အတိုၚ်ဒပ်ပၞာန်ၜါလပါ်နွံမံၚ်အကာဲအရာပကတိလၟုဟ်ဏံ ဒေါအ်ပန်ပှော်လဝ်၊ ညံၚ်ဟွံဂွံထပ်ဗပေၚ်ဇြဟတ်တံ၊ ရဲဒဴပၞာန်တံ ညံၚ်ဂွံကလေၚ်စဴသ္ၚိ ၜိုတ်သ္ပမာန်ဒးကၠောန်အာ မဒှ်ရ။
အခိၚ်သၠောဲပြံၚ်မံၚ်ကဵု ညးတာလျိုၚ်တံ ကောန်ပၞာန်ခမေန် ၁၈ တၠ နကဵုကယျိုၚ်ကွာန်တံ ဒၞာဲသၞေဟ်ကၚ်ဂိက်စၟဳစၟတ်ပယျဵုဂှ် ညးရာဒၞာမိက်ကဵုတံလေဝ် နွံရ။
အခိၚ်ပေါဲဗတိုက်ပြဟ်ဟ် ဂိတုဂျူလိုၚ်တေံ ဟိုတ်နူကောန်ပၞာန်ခမေန်ဒးဒုၚ်ရပ်ဂှ် ဝါဒကောန်ဂကူခမေန်ဇြဟတ်ခိုဟ်တိုန်တုဲ ညံၚ်ကောန်ပၞာန်တံဂွံဗၠးတိတ်မာန် ပ္ဍဲအရာပရေၚ်သဳကၠဳတက်ကျာဂှ် အလဵုအသဳခမေန်တံ အာတ်မိက်လဝ်တၚ်ဏံ အဓိကရ။
မိက်ဂွံထ္ၜးစ ကဵ ပရေၚ်စိုတ်စေတနာညးတံခိုဟ်သြန်တုဲ ကလေၚ်ဗလးကဵုကောန်ပၞာန်ခမေန်တံဏံမဒှ်တုဲ ခမေန်တံလေဝ် ထ္ၜးကဵုစိတ်စေတနာခိုဟ်ညိတံကီု စၟဳစလဝ်ရောၚ် ဌာနဝန်ဇၞော်ဍုၚ်သ္အာၚ်သေံ ဟီုရ။
ဒဒှ်ရကောန်ပၞာန်တံ ကလေၚ်စိုပ်ကၠုၚ်ဒၞာဲဂှ် နူကဵုဌာနဝန်ဇၞော်ပရေၚ်စဵုဒၞာခမေန် သ္ပဒတန်တုဲ အကြာၜါဍုၚ် ဒက်ပတန်အာဂလာန်ပတေဟ်မာန်ရောၚ် ဟီုလဝ်ရ။
အတိုၚ်တင်တုပ်စိုတ်မ္ဂး ပ္ဍဲဒဳဇြမ်ပါ ၃၀ နူကၠာဟွံစိုပ်အခိၚ်ဒေါဝ်တ္ၚဲ သေံဒးကလေၚ်ဗလးကဵု ကောန်ပၞာန်ခမေန်တံကီုလေဝ် ဟိုတ်နူဒရုၚ်ခမေန် ၂၅၀ မ ဖံက်လုပ်ကၠုၚ်ပယျဵုကျာသေံဂှ် ဒးလဇုဲလဇအာ မဒှ်ရ။
နူကဵုလပါ်သေံဂှ် ပတိုန်မံၚ်စောဒကနွံမံၚ်ကီုလေဝ် အခိၚ်လၟုဟ်ဏံ ပရေၚ်ဒေါအ်ပန်ပှော်အကြာၜါဍုၚ် တန်ကြန်မံၚ်ရောၚ် သ္ဂးစဂွံရ။
Ref:BBC