ကာရာကာတ်သ်၊ ဝါတန်ယှေန်၊ ဂျာန်နဝါရဳ ၆
ယဝ်ရ သမ္မတယာယဳ ဗၚ်နဳဇြဲဠာ ဒေဝ်လ်သဳ ရိုဓရဳဂေါတ်ဇ် ဟွံကၠောန်ပရေၚ်ဍာံစၟတ်မ္ဂး ပဵုဇၞော်နူကဵု မာဒူရိုဏီ ဒးဆာပ်လေဲအာပၠန်ရောၚ် သမ္မတထရ ဘပဠတုဲ ညးတေံ ပံၚ်တောဲအာကဵု အမေရိကာန်ရောၚ် ကော်ဘိက်ကၠုၚ်လဝ်ရ။
ပ္ဍဲဂျာန်နဝါရဳ ၅ မေတ်သေတ်သ် ရိုဓရဳဂေါတ်ဇ် ယဵုဗ္စာတုဲ ကၠောန်လဝ်ကောံဓရီုပ္ဍဲကဵု ဂကောံအလဵုအသဳကိုပ်ကၠာအိုတ်ဂှ် ဒေသပိုဲတံ ထေက်တန်ကဵု ပရေၚ်ၜိုဟ်လလမ်၊ ပရေၚ်သဳကၠဳတံတုဲ ဟွံထေက်ကြိုက်ကဵု ပေါဲပၞာန်ပုဟ် ဟီုဂးလဝ်ရ။
တမ်ဝါဒိဂှ် သမ္မတယာယဳ ဗၚ်နဳဇြဲဠာ သွက်ဂွံဒစဵုဒစးအမေရိကာန် ပရိုၚ်တိတ်ကၠုၚ်တုဲ ယဝ်ရ ပရေၚ်ပံၚ်တောဲရေၚ်တၠုၚ်ကဵု အမေရိကာန်ဟၟဲမ္ဂး ဒးဆာပ်လေဲ ဂၠိုၚ်နူကဵုမာဒူရိုဏီ ထရ ဘပဠလဝ် မဒှ်ရ။
ယဝ်ရ ပရေၚ်ပံၚ်တောဲရေၚ်တၠုၚ်ကဵု အမေရိကာန်ဟၟဲမ္ဂး ထပ်တုဲ ဒးဒုၚ်ဗတိုက်ပၠန်ရောၚ် ထရ ဘပဠလဝ်ရ။
ပြဟ်ဟ်ဏံ အမေရိကာန် ရပ်ဂွံလဝ်သမ္မတ ဗၚ်နဳဇြဲဠာ မာဒူရိုဂှ် သွက်ဂွံစၟဳစၟတ်ပတိုန်အာရုၚ်သၞောဝ်ဓဝ် ပ္ဍဲနယူယံက် စဳဇန်မံၚ်ရ။
အမှုကူသာန်ဗၞိက်ဒမၠုဂဥုဲၜူမာဲဂးတုဲ အမေရိကာန် ပတိုန်လဝ်ဒုဟ်ကု မာဒူရိုလေဝ် ညးတေံတးပါဲလဝ် တင်စောဲစပ်ဏံရ။
ပ္ဍဲကဵုဂျာန်နဝါရဳ ၃ အမေရိကာန် ဇီုဟဗတ်ကဵုလဝ် ဗၚ်နဳဇြဲဠာဟွံသေၚ်၊ ဇီုဟဗတ်ကဵုလဝ် ဂကောံဂဥုဲၜူမာဲတံရောၚ် ဝန်ဇၞော်ဍုၚ်သ္အာၚ်အမေရိကာန် မာကိုရူဗဳယော ဟီုရ။
ဒပ်တၟေၚ် ဂကောံဗတိုက်သရိုဟ်ပကီုပရာတ်အမေရိကာန် လုပ်ဗတိုက် ဗၚ်နဳဇြဲဠာ ရပ်ဏာ မာဒူရိုလေဝ်ဂှ် ရပ်ဏာသီုသမ္ဘာညးတေံကီုရ။
အပ္ဍဲကဵု ဍုၚ်ဗၚ်နဳဇြဲဠာမ္ဂး သဳလဳယာ ဖလဝ်ရေအ် သမ္ဘာမာဒူရိုဂှ် ဒှ်လဝ်ပူဂဵုသြဇာဇၞော် မွဲတၠ ဗွဲမလံလတေံရ။
ပ္ဍဲကဵုပေါဲရုဲမာဲ ၂၀၁၃ သမ္မတ မာဒူရို ဂွံအာဇၞးတုဲ ညးတေံ ညံၚ်ဂွံဆက် ကေမ်ဇျှာပ်လဝ်အဝဵုမာန် ကူလဝ်အရီုဗၚ်ရ။
သဳလဳယာ ဖလဝ်ရေအ်လေဝ် မွဲကရောံကု တြုံတၠသ္ၚိညးတေံကီု ဒးဒုၚ်စောဲအမှုပ္ဍဲကဵု ရုၚ်သၞောဝ်ဓရ် နယူယံက် နကဵုအမှုဂဥုဲၜူမာဲ၊ လွဟ်တံရောၚ်။
ပ္ဍဲအကြာတံဏံ အခိၚ်အမေရိကာန် ကၠောန်လဝ်လဝေၚ်ပၞာန် လုပ်ရပ်မာဒူရိုဂှ် ကောန်ဍုၚ် ၃၂ တၠ ချိုတ်လဝ်နွံ ဍုၚ်ကျူပါ သ္ပလဝ်ဒတန်ရ။
Ref:BBC