ၜၚ်ကံက်၊ ဂျာန်နဝါရဳ ၇
တင်တုပ်စိုတ်ပရေၚ်ဒေါအ်ပန်ပှော် လံကၠုၚ်ပွိုၚ် ၁၀ တ္ၚဲတုဲ ပ္ဍဲကဵုဂျာန်နဝါရဳ ၆ နူကဵုခမေန် ဟိုတ်နူပန်ကဵု မဝ်တာ ၜက်ပယျဵု ဖံက်ပကဝ်ဒေါအ်ပန်ပှော်တုဲ ကောန်ပၞာန်မွဲတၠ ဒးလဝ်ဝပ် သေံဟီုရ။
နူကဵုဂအုံထၟိက် က္တဵုဒှ်ပရေၚ်ဟတိုဟ်တုဲ ကောန်ပၞာန်ခမေန်ၜါတၠ ဒးဝပ်ကီု အလဵုအသဳဖနန်ပၚ် ဟီုလဝ်ရ။
ဍုၚ်ဇိုၚ်ဝုတ်ဒိုဟ် သ္ၚိရေၚ်ကၟေၚ်ဆက် အာသဳယာန် ၂ ဍုၚ် ဟိုတ်နူဒှ်ကယျာန်ဓဝါတ် ပရေၚ်တိဍာ်ပယျဵု လံကၠုၚ်ကဵု ဗွဝ်စှော်သၞာံတံ ဒှ်တိုန်ပဋိပက္ခလွဟ် ပ္ဍဲကဵုသၞာံတုဲကၠုၚ်ဏံရ။
ဟိုတ်နူကဵု ပေါဲဗတိုက် ပ္ဍဲဂိတုဒဳဇြမ်ပါဂှ် လၟိဟ်မၞိဟ်ကဵုစှော်တံ ချိုတ်တုဲ ပ္ဍဲၜါဍုၚ်ဏံ ညးဒဴဘဲပၞာန် ကြပ်မွဲပြကောဋိကိုတ် နွံမံၚ်ရ။
ပ္ဍဲဂျာန်နဝါရဳ ၆ အခိၚ်နူဂယးဂှ် ပ္ဍဲကဵုတွဵုရးအူဗန် ရာတ်ချ်သာနဳ ခမေန် ဖံက်ပကဝ်တင်တုပ်စိုတ်တုဲ ပန်နၚ်လွဟ်မဝ်တာ ဒပ်ပၞာန်သေံ လလောၚ်တြးရ။
ကောန်ပၞာန်သေံမွဲတၠ ဒးဝပ်နကဵုကပေါတ်ကေက်က်ဂှ် ချူလဝ်ပ္ဍဲလိက်လလောၚ်တြးရ။
ဗွဲကြဴ နူကဵုခမေန် တင်ရန်တၟံ ပန်ပၠုပ်လပါ်သေံဟၟဲ၊ ပရေၚ်လၟုဟ်ဂှ် ဟိုတ်နူပွမှာရာ ပရေၚ်လဝေၚ်ပၞာန် ကောန်ပၞာန်ခမေန်တံရောၚ် နူကဵုခမေန် ကေတ်နၚ်လဝ်အဆက် ဒပ်ပၞာန်သေံ ဟီုရ။
ပရေၚ်ဒဒှ်ဗီုဗီုတံဏံ ညံၚ်ဟွံထပ်က္တဵုဒှ်ဂှ် ဒပ်ပၞာန်ခမေန်တံ ညံၚ်ဂွံထိၚ်အာ၊ ယဝ်ရ ထပ်က္တဵုဒှ်ပၠန်မ္ဂး နူကဵုသေံ ကလေၚ်ပ္လန်အာရောၚ် ကဵုလဝ်သတိရ။
နူကဵုပယျဵု တွဵုရးအူဗန် ရာတ်ချ်သာနဳ ဆက်စပ်မံၚ်ကဵု ဍုၚ်ခမေန် တွဵုရးပရဳယာ ဗဳဟဳယာဂှ် ပ္ဍဲကဵုဂျာန်နဝါရဳ ၆ အခိၚ်နူဂယး ကောန်ပၞာန်ၜါတၠ ဒးလဝ်ဝပ်နွံ ဌာနဝန်ဇၞော်ပရေၚ်စဵုဒၞာခမေန် လလောၚ်တြးလဝ်ရ။
အဃောယိုက်ဂၠေၚ်တာလျိုၚ်ဒပ်ပၞာန်ဂှ် နူကဵုဂအုံထၟိက်မွဲဒၞာဲ ခတိုဟ်တုဲ ကောန်ပၞာန်ၜါတၠဏံ ဒးလဝ်ဝပ်ရောၚ် ညးဗြဴအခေါၚ်ဟီုဂးနွံ မာလဳ သိုချဳယာတာ သ္ဂးရ။
အတိုၚ်သေံစောဲစပ်လဝ် ကိစ္စပန်ဗတိုက်လဝ်နွံမံၚ် ညးဟွံဟီုပတိတ်ကီုလေဝ် အကာဲအရာပရေၚ်ဒဒှ်ဏံ ဂကောံပယျဵုဒေသၜါဍုၚ်တံ ချပ်ဗ္စာသဳကၠဳသောၚ်ကလးအာရောၚ် ဟီုရ။
ပ္ဍဲကဵုဒၞာဲပယျဵုသေံ၊ ခမေန်၊ လဴပိဍုၚ် ဂဗညးသ္ကံ ခတိုဟ်လဝ်ရောၚ် နူခမေန် ဟီုရ။
ပ္ဍဲအကြာတံဏံ သေံသီကေတ်လဝ် ပယျဵုခမေန်မွဲဒၞာဲနွံမံၚ် တင်စောဲစပ်လဝ်နွံတုဲ အကြာၜါဍုၚ် အကာဲအရာ ကြံၚ်မ္ၚိုဟ်မံၚ်ဏီရ။
Ref:AFP/CAN