ယှာန်ဟိုၚ်၊ ဂျာန်နဝါရဳ ၈
ညံၚ်ဂွံဘိုၚ်ရီုဗၚ်တာဒၞာကဵု ကိုန်အစဳဇန်လွဟ်နျူကလဳယာ ကိုဝ်ရဳယာသၟဝ်ကျာဂှ် ဗတိုက်ဖအောဝ်လဝ် သမ္မတကြုက် ယှဳကျေအ်ဖျေၚ်နွံမံၚ် သမ္မတကိုဝ်ရဳယာသၠုၚ်ကျာ လဳဂျေဝ်မျံၚ် ဟီုလဝ်ပ္ဍဲဂျာန်နဝါရဳ ၇ ရ။
ပရေၚ် ကိုဝ်ရဳယာသၟဝ်ကျာ ဖန်ဗ္ဒျ်ကၠောန်ပတိတ်လွဟ်ပလီုပလာ်ဂအုံကလောအ်တံဂှ် အကာဲအရာကဵုမ္ဂး ဗဒေါအ်ထောံမာန်ရောၚ် သမ္မတ လဳဂျေဝ်မျံၚ် ဟီုရ။
အပ္ဍဲကဵုပွိုၚ် ၆ သၞာံဏံမ္ဂး ပ္ဍဲသတ္တဟလောန်ကၠုၚ်ဏံဂှ် လၟေၚ်တရဴ က္ဍိုပ်သ္ကိုပ်ကိုဝ်ရဳယာသၠုၚ်ကျာ အာလဝ်ဍုၚ်ကြုက် ဒှ်အလန်ပထမကိုပ်ကၠာအိုတ် မဒှ်ရ။
နူကဵုကိုဝ်ရဳယာသၠုၚ်ကျာ ဂစာန်ကၠောန် သၠဲပတိတ်ပရေၚ်ပိုန်ဒြပ်ကဵုကြုက်တုဲ အကာဲအရာပံၚ်တောဲရေၚ်တၠုၚ်အာကဵု ကိုဝ်ရဳယာသၟဝ်ကျာဟွံဂွံ ဒှ်မံၚ်ဂှ် ညံၚ်ဘိုၚ်ရီုဗၚ်သောၚ်ကလးအာကဵုညိကီု အာတ်မိက်လဝ်ရ။
ပ္ဍဲဒဳဇြမ်ပါ ၅ ယှဳကျေအ်ဖျေၚ်ကဵု လဳတံ ဆဵုဂဗလဝ် ပ္ဍဲဗေဂျေၚ်တုဲ ကၠာဟွံမွဲတ္ၚဲဂှ် ကိုရဳယာသၟဝ်ကျာ စမ်ၜတ်ပန်ဗစိုပ်လဝ် မကမ်ၜၚ်သၠောဝ် ၂ မ ဇရေၚ်ၜဳဂျပါန်ရ။
လၟေၚ်တရဴဏံတုဲဒှ်အာတုဲ အပ္ဍဲကဵုဆဵုဂဗလဝ်ကဵု အစာပရိုၚ်တံဂှ် ကိုဝ်ရဳယာသၟဝ်ကျာ ညံၚ်ကလေၚ်ဂွံစိုပ်ကၠုၚ် ပေါဲသဳကၠဳဝိုၚ်ခုၚ်မာန် ညံၚ်ဂွံဘိုၚ်ရီုဗၚ်ကဵုညိဂှ် ဗတိုက်ဖအောဝ်လဝ်ယှဳနွံမံၚ် သမ္မတလဳ ဟီုရ။
ကိုန်အစဳဇန်လွဟ်နျူကလဳယာ ကိုဝ်ရဳယာသၟဝ်ကျာကီု ပရေၚ်ဆက်စပ်မံၚ်ကဵုၚာၚ်ၜဳတ္ကအ်ကိုဝ်ရဳယာတုဲ ကြုက်ညံၚ်ဂွံကၠောန်သ္ပကဵုနဒဒှ်ညးအကြာဂှ် ကိုဝ်ရဳယာသၟဝ်ကျာနွံမံၚ် ကေုာံ သ္ပဟိုတ်ကဵု တၚ်ယုက်ဒေက်အကြာကိုဝ်ရဳယာၜါဍုၚ်ဏံတုဲ ကြုက်ညံၚ်ဂွံအေင်ဒုၚ်အာညိဂှ် ဗတိုက်ဖအောဝ်လဝ်က္ဍိုပ်သ္ကိုပ်ကြုက်ကီု သမ္မတလီသ္ဂးရ။
အကာဲအရာ ကိုဝ်ရဳယာသၟဝ်ကျာ ပိုၚ်ပြဳဂွံလဝ်လွဟ် နျူကလဳယာတံဂှ် ကလေၚ်ပလေဝ်ဟွံဂွံပုဟ် ကိုဝ်ရဳယာသၟဝ်ကျာဟီုလဝ်တုဲ ပရေၚ်ဆက်ဆောံကဵု ကိုဝ်ရဳယာသၠုၚ်ကျာ အကာအရာပရေအ်အိုတ်မွဲတေံ စိုပ်ကၠုၚ်မံၚ်ယျ။
ဇကုတံမံၚ်ရံၚ်အာ ပရေၚ်ပြဿနာ စပ်ကဵုပထဝဳပရေၚ်ဍုၚ်ကွာန်ဂၠးကဝ်တုဲ ဒပ်နျူကလဳယာတံဂှ် သွက်ဂွံလုပ်အာပေါဲဗတိုက် မၚ်လဝ်ဂွန်ဖိုအ်ရောၚ် နူကဵုကိုဝ်ရဳယာသၟဝ်ကျာ ဟီုလဝ်ပ္ဍဲဂျာန်နဝါရဳ ၅ ရ။
Ref:AFP