ၜဳကလေၚ်၊ ဂျာန်နဝါရဳ ၁၀
သွက်ဂွံကၠောန်ပေါဲရုဲမာဲသ္ကုတ် ၂ သှ်ေမံၚ်ပွိုၚ်ဍုၚ်ၜဳကလေၚ် ပ္ဍဲကဵု ဂိတုဏံ နူကဵုဒပ်ကဝ်မယှေန်ပၞာန်တံ ဗက်ရပ်မံၚ်မၞိဟ် ဆက်မံၚ်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူဂိတုဂျာန်နဝါရဳဂှ် လ္တူဍုၚ်ၜဳကလေၚ်ကီု ပ္ဍဲကဵုဂၠံၚ် ဆက်မံၚ်ကဵုကွာန်တံကီု ဒပ်ကဝ်မယှေန်ပၞာန် စကာဇြဟတ်ဂၠိုၚ်ၚ်တုဲ ဗက်မာတ်ဆိုအ်စၟဳစၟတ် ရပ်ကေတ်မံၚ်ရ။
အတိုၚ်ညးဒေသတံဟီုလဝ်မ္ဂး စနူဂျာန်နဝါရဳ ၁ ဒဵုကဵု ၈ ညးဒေသ ဟွံအောန်နူကဵု ၆၀ တၠဒးဒုၚ်ရပ်တုဲ ဗွဲမဂၠိုၚ် ဒှ်မံၚ်ညးတြုံ အယုက်အကြာ ၂၀ ကဵု ၄၀ တံရောၚ် ဂွံတီရ။
ဟိုတ်နူညးတြုံၜါတၠ ဍိုက်ကွဳလိုန်ဓါတ်မွဲမ၊ တိတ်မ္ၚးအာကၠုၚ်ဗ္တံ ၊ အခိၚ်ဍေံတံဂေတ်ကၚ် ဟွံသင်ကာဂးတုဲ ကော်ရပ်ဏာမဒှ်ရ။
ရပ်ဂွံလဝ်မၞိဟ်တံဂှ်တှ်ေ ထိၚ်စွံလဝ် ပ္ဍဲကဵုဗဒိုပ်ဗၠာဲသၟိၚ် ၜဳကလေၚ်ကေုာံ ဒၞာဲရုၚ်တမ်ဒပ် ဒပ်ကဝ်မယှေန်ပၞာန် ဖျေံသ္ဇိုၚ် ၜဳကလေၚ်တံတုဲ နုက်ပတိတ်ကဵုသြန်ဟွံမာန်မ္ဂး ဒးဒုၚ်ပလံၚ်ဏာ ဒၞာဲပကောံကောန်ပၞာန်တၟိ သ္ဂးရ။
ဟိုတ်နူဒပ်ကဝ်မယှေန်ပၞာန် ဗက်ရပ်မံၚ်အရိုဟ်တ္ၚဲမဒှ်တုဲ သၟတ်ဗၠာဲတံ တိတ်မ္ၚးဟၟဲ၊ အောန်အာကွေံကွေံ ဂွံတီနူကဵု ညးဒေသတံရ။
တ္ၚဲယး ဂျာန်နဝါရဳ ၁၁ မ္ဂး သွက်ဂွံကၠောန်ပေါဲရုဲမာဲ ပ္ဍဲပွိုၚ်ဍုၚ်ၜဳကလေၚ်နွံတုဲ ဒပ်ကဝ်မယှေန်ပၞာန်တံ စကာလဝ်ဇြဟတ် ပရေၚ်ဂီုကၠီု လၟိဟ်ကဵုကၠမ်နွံတုဲ ပန်ဂြာံမံၚ်ကဵုလွဟ်ဇၞော် သီုတ္ၚဲသီုဗ္တံ မဒှ်ရ။
ပရိုၚ်-သြၚ်လောန်တိုၚ်မ်
Photo – CJ