မတ်မလီု ၊ ဂျာန်နဝါရဳ ၁၀
ပ္ဍဲဒေသမန် သွက်ဂွံကၠောန်အာပေါဲရုဲမာဲသ္ကုတ် ၂ ဒၞာဲပွိုၚ်ဍုၚ် သှ်ေမံၚ်တံဂှ် နူကဵုဒပ်ပၞာန်ဗမာ မာတ်ဆိုအ်လဝ် ပ္ဍဲဒၞာဲဇဳဒိုဟ်တုဲ ဓရတ်ပတေၚ်လဝ်ပရေၚ်ဂီုကၠီုတၟေၚ်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
တ္ၚဲယးဂျာန်နဝါရဳ ၁၁ မ္ဂး ကဝ်မယှေန်ပၞာန် သွက်ဂွံကၠောန်အာ ပေါဲရုဲမာဲသ္ကုတ် ၂ ပ္ဍဲကဵုပွိုၚ်ဍုၚ် ၜဳကလေၚ်၊ ပံၚ်၊ မုဟ်ဍုၚ်၊ ဇြပ်ဗုကဵု ရေဝ်တံ မဒှ်ရ။
ပ္ဍဲကဵုပွိုၚ်ဍုၚ် ဒၞာဲကၠောန်ပေါဲရုဲမာဲသ္ကုတ် ၂ ဏံ နူကဵု ဒပ်ကဝ်မယှေန်ပၞာန် စကာလဝ်ဇြဟတ် ဗွဲမဂၠိုၚ်တုဲ ဂေတ်ဝေၚ်ထ္ၜးဇြဟတ်ကီု၊ ဖျေံကင်ဒမၠုက်အော်မာ၊ ထပက်ကရောၚ်ပၞာန်၊ ပန်ခြော်လွဟ်ဇၞော်ကြာန်န်တံဂှ် ကၠောန်မံၚ် ပွဗီုဗီုတံဏံရ။
ပ္ဍဲကဵုဒၞာဲဇဳဒိုဟ် စကာလဝ် ဇြဟတ်ပရေၚ်ဂီုကၠီုဂၠိုၚ်ၚ်တုဲ ဗက်မာတ်ဆိုအ်စၟဳစၟတ်မံၚ် ဒၞာဲစုၚ်ၚ်ဂှ် သွက်ဂွံအာကၠုၚ် ဒှ်အခက်အခုဲကွေံရောၚ် ညးဒေသၜဳကလေၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ပ္ဍဲၜဳကလေၚ် ဒၞာဲပၞော်လုပ်တိတ်ဍုၚ်၊ ပ္ဍဲကွာန်ပလိုတ်ၜဳကလေၚ်၊ အခိၚ်ဗ္တံ အောပ်မာမံၚ်ကၚ်ဒမၠုက်နွံမံၚ်၊ ဒၞာဲဗွဲမဂၠိုၚ်တံဂှ် ထပေၚ်လဝ်ဇြဟတ်ပရေၚ်ဂီုကၠီုနွံမံၚ်။ ပြဟ်ဟ်ဏံ ရပ်ဏောၚ်စၟဳစၟတ်ဏောၚ်။ အခိၚ်ဒေါဝ်တ္ၚဲ ဟွံသင်ကာတှ်ေ ရပ်တုဲ ဒးနုက်ကဵုသြန်။ လၟုဟ်ဒးအာကၠုၚ်ဂှ် ဖေက်မံၚ်ကွေံကွေံ” သာ်ဝွံ သ္ဂးရ။
တုဲပၠန် ပ္ဍဲကဵုဒၞာဲစုၚ်ၚ်ဂှ် ဒပ်ကဝ်မယှေန်ပၞာန် စကာလဝ်ဇြဟတ်ပေၚ်ၚ် ပတေၚ်လဝ်ပရေၚ်ဂီုကၠီုတုဲ သွက်ပရေၚ်ဗုၚ်ဂၞဴ ဂွံဂၠာဲစ ဂွံတိတ်အာမ္ၚးဂှ် ဒးဖေက်မံၚ်၊ သၟတ်ဗွဲမဂၠိုၚ်တံ ဟွံဂံၚ်တိတ်မ္ၚးရပုဟ် ညးဆက်ဟီုရ။
ဒပ်ကဝ်မယှေန်ပၞာန် စကာလဝ်ဇြဟတ် ပရေၚ်ဂီုကၠီုဂၠိုၚ်ၚ် ဂေတ်ဂေၚ် အာကၠုၚ်မံၚ်တုဲ ညးလဵုမှဟွံဂံၚ်တိတ်မ္ၚး အပ္ဍဲဍုၚ်ဂှ် မၞိဟ်သောၚ်မံၚ်အိုတ်အစောန်ကွေံရောၚ် ညးဒေသဍုၚ်ရေဝ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပတေင်လဝ်ပရေၚ်ဂီုကၠီု။ ဒၞာဲဗွဲမဂၠိုၚ်ဂှ် ရဲဂီုကၠီုတံနွံမံၚ်။ ဇၟာပ်သွာၚ်ဂၠံၚ် နွံမံၚ်။ ဂေတ်မံၚ် ဟဂှ်ရ။ ကင်ဂေတ်လေဝ်နွံမံၚ်။ အဓိက ဖျာဟွံဂွံသွံ။ ရဲနူကွာန်တံ ဟွံတိုန်ဍုၚ်။ ညးမွဲမှဟွံကၠုၚ်ရာန်ဖျာ မၞိဟ်သောၚ်မံၚ်” သာ်ဝွံ သ္ဂးလဝ်ရ။
မွဲလပါ်ပၠန် သွက်ပရေၚ်ဂီုကၠီုပေါဲရုဲမာဲဂးတုဲ ဒပ်ပၞာန် ဒပ်ဗၠာဲသၟိၚ်၊ ဒပ်မၚ်ကွာန်၊ ဂကောံဂီုကၠီုညးဍုၚ်ကွာန်ကဵု ဗတိုက်သရိုဟ် ပကီုပရာတ်တံဂှ် ကဝ်မယှေန်ပၞာန်ပကောံလဝ်တုဲ ပတေၚ်စွံလဝ် ပရေၚ်ဂီုကၠီု မဒှ်ရ။
ဟိုတ်နူစကာသုၚ်စောဲလဝ် ဇြဟတ်ပရေၚ်ဂီုကၠီုဂၠိုၚ်ၚ် ပတေၚ်ဓရတ်လဝ်ပရေၚ်စၟဳစၟတ်တံကီု ဟွံထေၚ်ခယျလဝ်မွဲသာ် ညးဒေသတံ ဒးဒုၚ်ရပ်မာန်၊ အကြာဒပ်ပၞာန်ၜါလပါ် ဒှ်ပန်ညးသ္ကံမာန်တုဲ ဒးဒှ်မံၚ်ဒွိၚ်ကွေံကွေံရောၚ် ညးဒေသတံသ္ဂးရ။
ဒၞာဲသွက်ဂွံကၠောန်ပေါဲရုဲမာဲသ္ကုတ် ၂ ပ္ဍဲကဵုပွိုၚ်ဍုၚ်ၜဳလေၚ်ကဵု ရေဝ်တံဂှ် ပေါဲဗတိုက်လေဝ် ကလေၚ်ဒှ်မံၚ်၊ နူလပါ်ကဝ်မယှေန်ပၞာန် ပန်ခြော်မံၚ်ကဵုလွဟ်ဇၞော် ကြာန်န်ဂှ်ရ ညးဒေသတံဒးဝပ်ချိုတ်လေဝ် နွံမံၚ်ရ။
ပ္ဍဲတွဵုရးမန် ပွိုၚ်ဍုၚ်ကျာ်ထဝ်၊ သဓီု၊ မတ်မလီု၊ ၜါသွာၚ်ကဵုကျာ်မြဟ် တံဂှ် ကဝ်မယှေန်ပၞာန် ကၠောန်လဝ်ပေါဲရုဲမာဲသ္ကုတ် ၁ ပ္ဍဲကဵုဒဳဇြမ်ပါ ၂၈ ဂှ်တှ်ေ ဗော်ပျဳခိုၚ်ဖျိုဝ် ဇၞးလဝ်မာဲဂၠိုၚ်အိုတ် မဒှ်ရ။
ပရိုၚ်-သြၚ်လောန်တိုၚ်မ်
Photo – CJ