ဝါယှေန်တန်၊ ဂျာန်နဝါရဳ ၁၀
ပ္ဍဲကဵုဒၞာဲတိဍာ် ဒေသဂိုဏ်ဂဥုဲၜူမာဲဇၞော်ဇၞော်တံနွံမံၚ်ဂှ် ဗတိုက်အာနူဗလးတိရောၚ် ထရဟီုဏာလဝ် ပ္ဍဲဂျာန်နဝါရဳ ၉ ရ။
အခိၚ်ဗတိုက်မံၚ် ၜၚ်ဖ္ဍိုက်လဝ်ဂဥုဲၜူမာဲ ပ္ဍဲၜဳကာရေညဳယာန်ကဵု မှာသၟိတ်ပသိဖိတ်တံဂှ် ထရဟီုပတိတ်လဝ် ဗီုဏံရ။
ပ္ဍဲမက္ကသဳကို ဂိုဏ်ဂဥုဲၜူမာဲဂမၠိုၚ် အုပ်ဓလီုလဝ်ရောၚ် ထရ သ္ဂးရ။
ဟွံခယျလဝ်မွဲသာ် လုပ်ရပ်ကေတ်ဏာ သမ္မတဗၚ်နဳဇြဲဠာ နဳကိုလာတ်သ် ပ္ဍဲသတ္တဟတုဲကၠုၚ်ဏံတုဲ ထရ ဟီုပတိတ်လဝ် အတိုၚ်ဏံရ။
ၜၚ်ဖ္ဍိုက်နၚ်ဂဥဲၜူမာဲတံ စနူဂိတုသိပ်တမ်ပါတေံ အမေရိကာန် ဗတိုက်လဝ်ဂှ် မၞိဟ် ၁၀၀ ပြၚ် ချိုတ်အာတုဲ မဒှ်ရ။
ဒၞာဲၜၚ်တံဏံ လုပ်တိတ် သၞေဟ်ဗၚ်နဳဇြဲဠာတံဂှ် ဒပ်အမေရိကာန် ဗတိုက်လဝ်ပ္ဍဲဗလးတိတုဲယျ ထရဟီုရ။
ဆဂး ယဝ်ရဗတိုက် ဂိုဏ်ဂဥုဲၜူမာဲဇၞော်ဇၞော် ပ္ဍဲကဵုမက္ကသဳကိုတံမ္ဂး ပရေၚ်ချဳဒရာၚ်ပၞာန်အမေရိကာန် အသိၚ်သၠုၚ်ၚ် မံက်ကၠးထေၚ်လဵုတိုန်ရောၚ် မဒှ်ရ။
အလဵုအသဳယာယဳ နွံမံၚ်ကာရာကာတ်သ် ဒစေၚ်လပါ်ပုၚ်ဂှ် ဟိုတ်နူအမေရိကာန်တံ ဗတိုက်တုဲ စှ်ေအာဒၞာဲအန္တရာဲပရေၚ်ညိၚ်ဝပ်ဟၟဲရောၚ် ဟီုတုဲ ပျုတ်ဗဒေက်လဝ်ရ။
ပ္ဍဲအမေရိကာန် မုလေဝ်အခေါၚ်အဝဵုကၠောန်ဟၟဲပုဟ် သမ္မတမက္ကသဳကို ကလံက်ဒဳယာယှုၚ်ဗောန် ဟီုလဝ်ရ။
သွက်ဂွံဗတိုက် ဂိုဏ်ဂဥုဲၜူမာဲတံ ညံၚ်ဂွံဗလးအာဒပ်ပၞာန် ကဵုမံၚ်ဇြဟတ်ဟရိုဟ်ကု သမ္မတယှုၚ်ဗောန်ရောၚ် ထရ ဟီုရ။
အခိၚ်ကၠာတေံ ထရကေၚ်အာတ်မိက်လဝ်ဗီုဏံဂှ် သမ္မတမက္ကသဳကို တးပါဲစွံလဝ် မဒှ်ရ။
ဂဥုဲၜူမာဲဖာန်တနိုၚ်တံ လုပ်စိုပ်မံၚ် အမေရိကာန်ဂှ် ပြဿနာ ဒှ်မံၚ်အိုတ်တုဲ စပ်ကဵုပရေၚ်ကိစ္စဏံ ထရကဵုလဝ်သတိကဵု ကြုက်ကီုရ။
Ref:AFP