ဖာအၚ်၊ ဂျာန်နဝါရဳ ၁၅
ပ္ဍဲတွဵုရးကရေၚ် ကောန်ပၞာန်ဒပ်စဵုဒၞာညးဍုၚ်ကွာန် PDF ၅ တၠ သီုကဵုလွဟ်ကၠုၚ်ဖျေံလဝ်နွံရဂှ် လိက်ပရိုၚ်တြးဝါဒကဝ်မယှေန်ပၞာန် ချူထမံက်လဝ် ပ္ဍဲဂိတုဂျာန်နဝါရဳ ၁၄ ရ။
နူကဵုကြုၚ်ဒဵုဂှ် မွဲတၠ နူကဵုကွာန်ကျောန်ကလေဝ်၊ နိုဝ်ပဝ်ဟေဝ် ပန်တၠ ညးတြုံသီုဖအိုတ်ကၠုၚ်ဖျေံလွဟ် သ္ဂးရ။
ပ္ဍဲကဵုကောန်ပၞာန်ကၠုၚ်ဖျေံလွဟ်နူဒပ် PDF ၅တၠဂှ် သေနာတ် ပေတ်သတဝ် မွဲဇကိုအ်၊ M16 မွဲဇကိုအ်၊ လွဟ်ကာဗိုၚ်မွဲဇကိုအ်၊ ဗလံက်တဲ မွဲဇကိုအ်၊ သနိုက်ပါကၠောန်ကဵုတဲ မွဲဇကိုအ်ကေုာံ မခတိုဟ် ၈ မ ပါမံၚ်ရဂှ် ချူထမံက်လဝ်ရ။
ဟိုတ်နူကောန်သ္ဂံၚ် PDF ၅ တၠဏံ သီုကဵုလွဟ်မကမ်ကၠုၚ်ဖျေံလွဟ်ဂှ်ရ ပတိုန်ဏာစရာဲ သြန် ၁၅၄ ကိုတ်ရဂှ် နူကဵုလိက်ပရိုၚ်တြးဝါဒကဝ်မယှေန်ပၞာန် ချူထမံက်လဝ်ရ။
ရဲကၠုၚ်ဖျေံလွဟ်တံဏံဂှ် သ္ကိုပ်ဝန်ဇၞော်တွဵုရးကရေၚ် ဥူသဝ်မျေအ်ဥူ၊ ဒုသ္ကိုပ်ဌာန်ပၞာန်ရးအဂၞဲ သ္ကိုပ်ဗိုလ်ဇၞော် နေမျိုဝ်ကေုာံဂတးမုက် ညးတာလျိုၚ်ဌာနဆေင်စပ်နာနာတံဂှ် ထပက်စၟတ်တဲဒုၚ်ဝန်တုဲ ပလေၚ်ပအပ်ကဵုလဝ် မိမဆေင်စပ်တံဂှ်ရောၚ် တြးလဝ်ဝါဒရ။
နူကဵုဒပ်ပၠန်ဂတး ဖျေံသ္ဇိုၚ်ဒေသ တွဵုရးကရေၚ်တံဂှ် ကောန်သ္ဂံၚ်ညးတံအာဖျေံလွဟ် လပါ်ကဝ်မယှေန်ပၞာန်ဟၟဲတုဲ ကောန်ပၞာန်ဗမာတံရ ကၠုၚ်ဖျေံလဝ်လွဟ်ဇရေၚ် ဂကောံပၠန်ဂတးတံနွံမံၚ် ကလေၚ်ဟီုလဝ်ရ။
အတိုၚ်လိက်ဒုၚ်စဳရေၚ် “ဂကောံတိုၚ်ပကဴညးဍုၚ်ကွာန်” မ္ဂး ပ္ဍဲ ၂၀၂၅ သၞာံဏံ ကောန်ပၞာန်ဗမာ ဟွံအောန်နူကဵု ၂၅၀၀ ကၠုၚ်ဖျေံလဝ်လွဟ် နွံမံၚ်ရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – MOI