မတ်မလီု ၊ ဂျာန်နဝါရဳ ၁၅
သွက်ကၟိန်ဍုၚ် ညံၚ်ဂွံတန်ကြန်အာအဓာန်ဂတမာန်ဂှ် ညးဍုၚ်ကွာန် တံ သီုစိုတ်သီုစရိတ် ပံၚ်တောဲကဵုပရေၚ်ယိုက်ဂၠေၚ်ဝန်ပၞာန်ညိဂှ် သ္ကိုပ်ဝန်ဇၞော်တွဵုရးမန် ကဝ်မယှေန်ပၞာန် ဥူအံၚ်ကျဳတိၚ် ဟီုရ။
ပ္ဍဲဂိတုဂျာန်နဝါရဳ ၁၃ ပ္ဍဲညးအာဆဵုဂဗလဝ်ကဵု သၟတ်ဒးဒုၚ်ပကောံသွက်ယိုက်ဝန်ပၞာန် လၟေၚ် ၂၁ ပ္ဍဲကဵုဘာပၞာန်ဂှ် ဟီုလဝ်ရ။
လ္တူပရေၚ်ယိုက်ဂၠေၚ်ဝန်ပၞာန်ဂှ် ညးဍုၚ်ကွာန်တံပံၚ်တောဲပါလုပ်တုဲ စပ်ကဵုပရေၚ်ဂွိၚ်ဂွာဲမံၚ်ကဵု အရာယိုက်ဝန်ပၞာန်တံ ထေၚ်ဗၠေတ်မံၚ်ဂှ်ညံၚ်ဂွံကၠေံအာ ဗတိုက်ဖအောဝ်လဝ်ရ။
စပ်ကဵု လဟီုလဂး သ္ကိုပ်ဝန်ဇၞော်တွဵုရးမန် ဥူအံၚ်ကျဳတိၚ်ဏံဂှ် အကြာညးဍုၚ်ကွာန် ပါ်ပါဲဟီုဂးမံၚ်နွံတုဲ သွက်ဂုဏ်ဖဵုပရေၚ်ပိုန်ဒြပ် သ္ကိုပ်ပၞာန်တံရောၚ် သၟတ်တံဒးကဵုမံၚ်လမျီု ဒှ်မံၚ်ရောၚ်ဂှ် ကလေၚ်ပလန်ခၠေဝ် ဟီုဂးမံၚ်အိုတ်ရ။
သွက်ဂွံယိုက်ဝန်ပၞာန်ဂှ် လ္ပဟီုမံၚ်ကဵု ညးဍုၚ်ကွာန်တံပံၚ်တောဲညိ ကဵုရဲထံက်မံၚ်ဂလာန်ဂကောံပၞာန်တံဟေၚ် လုပ်ကၠောန်တှ်ေ ပဵုတုဲပြေပြံၚ်ရောၚ် ညးဒေသမန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“မုပဗက်ကော်မံၚ်သၟတ်တံရော ကော်ကေတ်ကောန်ဇာတ် ရဲထံက်ဂလာန်ဂကောံပၞာန်ဍေံတံတုဲ ကဵုလုပ်ယိုက်ဝန်ပၞာန်တှ်ေ ပဵုတုဲပြေပြံၚ်ဏောၚ်။ သၟတ်လ္ၚဵုတံ ပရေၚ်ကၟိန်သ္ၚိဌာန်ဟွံပြေပြံၚ်တုဲ ပါအာပၞာန် စိုပ်အာမုက်ပၞာန်တုဲ ချိုတ်အာလေဝ်နွံ။ ကွေံကွေံဂှ် ကောန်ဗော် ရဲထံက်ဂလာန်ဒပ်ပၞာန်တံဂှ် ကေတ်ထေက်။ မၞိဟ်မွဲမွဲ အတိုၚ်ပၟိက်စိုတ်ဍေံ ကဵုဍေံလုပ်အာပၞာန်ကေတ်တ်တှ်ေ မုလေဝ်အခက်အခုဲဟၟဲပုဟ်” သာ်ဝွံသ္ဂးရ။
တုဲပၠန် သၟတ်တိုန်မံၚ်ဘာပၞာန်လၟုဟ်ဂှ် ဟိုတ်နူဒးဒုၚ်ရပ်အဓ္ဓမတုဲ ဒးလုပ်ယိုက်ဂၠေၚ်ဝန်မဒှ်တုဲ သၟတ်မူစိတၠ စိုတ်နွံတုဲ ယိုက်ဂၠေၚ်မံၚ်ရောၚ်ဂှ် သၟာန်ကေတ်မာန်မံၚ် ညးသၟာန်လဝ်ရ။
လ္တူသၟတ်ကောန်ဇာတ်ရဲဝါတ်တ်တံဂှ် ရာန်လိၚ်ကေတ်ကဵုသြန်၊ အခိၚ်ဗ္တံသၟတ်တိတ်မ္ၚးတံဂှ် ရပ်ကော်ဏာ၊ ညးတြုံၜါတၠ ဍိုက်မွဲ ကွဳလိုန်ဓါတ်လေဝ်ရပ်တုဲ စုတ်ဏာကဵုပဝ်တာ ပ္ဍဲဗလးတိဂှ် ကဝ်မယှေန်ပၞာန်တံကၠောန်မံၚ်အိုတ်ရ။
သၟတ်ဒးဒုၚ်ပကောံကော်ဏာပၞာန် အဓ္ဓမအတေၚ်တံ တိုန်ဘာပၞာန်တုဲဗက်ဟွံဂတာပ် ပလံၚ်ဏာမုက်ပၞာန်ဂှ်တှ်ေ ဒးဝပ်ချိုတ်ဂၠိုၚ်နွံမံၚ်တုဲ လ္ၚဵုလုပ်ဖျေံလွဟ် ပ္ဍဲကဵုဒပ်ပၠန်ဂတးလေဝ် နွံရ။
အတိုၚ်ဌာန်ပရိုၚ်သြၚ်လောန်တိုၚ်မ် ပကောံဂွံလဝ်တၚ်နၚ်မ္ဂး ပ္ဍဲကဵုတွဵုရးမန် ကဝ်မယှေန်ပၞာန် ပံက်ကၠုၚ်လဝ်ဘာယိုက်ဝန်ပၞာန် နူကဵုလၟေၚ် ၁ ဒဵုကဵု လၟေၚ် ၂၀ ဂှ်တှ်ေ သၟတ်နူကဵုဒေသမန် ကြပ် ၄၀၀၀ ဒးဒုၚ်ပကောံလဝ်နဒဒှ်ကောန်ပၞာန်တၟိ မဒှ်ရ။
ပရိုၚ်-သြၚ်လောန်တိုၚ်မ်
Photo – MOI