ထဝါဲ၊ ဂျာန်နဝါရဳ ၁၅
ရးတနၚ်သဳ ပ္ဍဲအရာပ်လ္တူဍုၚ်ထဝါဲကဵု ဒၞာဲသၞေဟ်ကၚ်ဂိက်စၟဳစၟတ်တံဂှ် နူကဵုဒပ်ကဝ်မယှေန်ပၞာန် ဗက်ရပ်မံၚ် သၟတ်အဝဲလုပ်အဝေါၚ်ယိုက်ဝန်ပၞာန်တံနွံမံၚ် ညးဒေသတံဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိက်သၞေဟ်ကၚ်ဒဒန်ကမျဝ် ဆက်စၠောံလဝ် ဍုၚ်ထဝါဲကဵုဍုၚ်လံၚ်လုၚ်တံကီု ပ္ဍဲအရာပ်လ္တူဍုၚ်ထဝါဲတံဂှ် စနူကဵုအကြာမွဲၜါတ္ၚဲဏံတုဲ သၟတ်အဝဲလုပ်မံၚ်အဝေါၚ် ယိုက်ဝန်ပၞာန်တံဒးဒုၚ်ရပ်မံၚ်ဗွဲအဓ္ဓမရ။
ကၠာဟွံစိုပ်ပေါဲရုဲမာဲသ္ကုတ် ၂ မွဲၜါတ္ၚဲဂှ်ရ ဒပ်ကဝ်မယှေန်ပၞာန် ဗက်ကၟာတ်ဆိုအ် ဂၠာဲရပ်ကေတ်မံၚ်သၟတ်ဂမၠိုၚ် အကြာအရာပ် အကြာသ္ၚိကီုရဂှ် ညးဒေသထဝါဲတံ ဟီုရ။
ပ္ဍဲဒၞာဲသၟတ်တံအာဝေၚ်မံၚ် ဆေင်ဍာ်လက်ဖက် ဆေင်ဍာ်တာကဵု ပ္ဍဲအရာပ်တံဂေတ်ဂေၚ် ဂၠိုက်ဂၠာဲဗက်ရပ်ကေတ်မံၚ် သ္ဂးရ။
တုဲကၠုၚ်ဂျာန်နဝါရဳ ၁၀ တေံလေဝ် ပ္ဍဲကဵုဒၞာဲသၞေဟ်ကၚ်ဂိက် ဒဒန်ကမျဝ်ဂှ် နူကဵုဒပ်ကဝ်မယှေန်ပၞာန် ရပ်ကော်ဏာ သၟတ်ရဲအာတရဴ ဟွံအောန်နူကဵု ၆ တၠနွံမံၚ်ရောၚ် အတိုင်ညးဒေသတံဟီုတုဲ ဂွံတီရ။
တုဲပၠန် ပ္ဍဲကဵုဒၞာဲသၞေဟ်ကၚ်ဂိက်ဒဒန်ကမျဝ်ဂှ်လေဝ် ညးအာတရဴ သၟတ်တြုံလုပ်အဝေါၚ်ယိုက်ဝန်ပၞာန်တံ ဒးဒုၚ်ရပ်ဏာဗွဲအဓ္ဓမပၠန်တုဲ သွက်ဂွံတိုန်ဘာပၞာန်အာပလံၚ်ဗစိုပ်လဝ် ဒၞာဲတမ်ဒပ်ကလိၚ်အံၚ် တေံရ။
လောန်ကၠုၚ်ဂျာန်နဝါရဳ ၈-၉ တေံလေဝ် ပ္ဍဲအရာပ်ကျိတ်သာပျေၚ်ကဵုဝဲကျောန်တံဂှ် ဒပ်ကဝ်မယှေန် စကာလဝ်ဇြဟတ်ဒပ်ဗွဲမဂၠိုၚ်တုဲ ကၠုၚ်ရပ်လဝ်သၟတ်တြုံ အဝဲလုပ်အဝေါၚ်ယိုက်ဝန်ပၞာန် ကြပ် ၈၀ တၠနွံမံၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – CJ