ဘေဂျေန်၊ ဖေဖဝ်ဝါရဳ ၂၈။
ဂိုဏ်ရာဇဝတ်ဇၞော်ဇၞော်ၜါဂိုဏ် မနွံဒၟံၚ်ပ္ဍဲဍုၚ်ဗမာ မဆက်စပ်ဒၟံၚ်ကဵု ပရေၚ်လီသြန်အန်လာၚ် လတူပယျဵုတအ်ဂှ် ပွမစဳရေၚ်ဖျေံသၞောဝ်အမိၚ်ဂစိုတ် သီုမၞိဟ် ၁၆ တၠတံကီု သီုကဵုဗတိုက်သရိုဟ်ပတုဲထောံလဝ်ရောၚ် ရုၚ်သၞောဝ်ဓဝ်သၠုၚ်အိုတ် ဍုၚ်ကြုက် ဟီုလဝ် ပ္ဍဲဂိတုဖေဖဝ်ဝါရဳ ၂၆ ဂှ်ရ။
နူကဵုဂကောံသ္ၚိကၟိန်ပန်ဂကောံ မထိၚ်ချုပ်လဝ် ဇာဖိုၚ်ပရေၚ်ဒမၠလီသြန်အန်လာၚ် ပ္ဍဲဒေသသၟဝ်ကျာဍုၚ်ဗမာတံ အမှုမဆက်စပ်မံၚ်ကဵု ဂကောံသ္ၚိကၟိန် မျဳ ကေုာံ ပေဝ် ၜါဂကောံဂှ် စၟဳစၟတ် စဳရေၚ်ဖျေံအမှု တုဲဒှ်ယျရောၚ် ရုၚ်သၞောဝ်ဓဝ်ညးဍုၚ်ကၟိန်ဍုၚ်ကြုက် ဟီုလဝ်ရ။
အပ္ဍဲကဵုမၞိဟ်ဒးဒုၚ်စဳရေၚ်ဖျေံသၞောဝ်အမိၚ်ဂစိုတ် ၁၆ တၠဂှ်မ္ဂး မၞိဟ် ၃၉ တၠဂှ် ဒးဒုၚ်ဖျေံအမိၚ် ထံၚ်မွဲအယုက် ကေုာံ သၞောဝ်ဒဏ်မသကာတ်မြဟ်ဂမၠိုၚ်ရောၚ် ညးအခေါၚ်ဟီုဂးနွံဍုၚ်ကြုက် သောၚ်ကလးကဵုလဝ်လိက်ပရိုၚ်တံရ။
ဂိုဏ်ရာဇဝတ်ရပ်လွဟ် လတူပယျဵု ၜါဂိုဏ်ဂှ် ဗတိုက်သရိုဟ်ပလေအ်ထောံ သီုဖအိုတ်တုဲအာယျရောၚ် ညးဟီုလဝ်ရ။
မၞိဟ်အဆံၚ်ဇၞော်ဇၞော် ကောန်ဂကောံသ္ၚိကၟိန် မျဳ ကဵု ပေဝ် မဒးဒုၚ်စဳရေၚ်ဖျေံလဝ်သၞောဝ်အမိၚ်ဂစိုတ်တအ်ဂှ် ပ္ဍဲဂိတုဂျာန်နဝါရဳ ၂၉ ကဵု ဖေဖဝ်ဝါရဳ ၂ ဂှ် ဂစိုတ်ထောံအတိုၚ်သၞောဝ်တုဲယျရောၚ် ညးတာလျိုၚ်ကြုက်တအ် ဟီုရ။
စဵုကဵုအိုတ်သၞာံ ၂၀၂၅ တုဲကၠုၚ်ဏံ ရုၚ်သၞောဝ်ဓဝ်အလုံဍုၚ်ကြုက်ဂှ် အမှုမဆက်စပ်ကဵု ပရေၚ်လီသြန်အန်လာၚ် ဒေသသၟဝ်ကျာဍုၚ်ဗမာ သီုဖအိုတ် ၂၇၀၀၀ ဂှ် စၟဳစၟတ်တုဲအာလဝ်ရ။
ပ္ဍဲအမှုတအ်ဏအ်ဂှ် မၞိဟ်မဒးဒုၚ်ပလံၚ်ဏာဍုၚ်ကြုက် ၄၁၀၀၀ ပြၚ်ဂှ်လေဝ် စဳရေၚ်ဖျေံအမှု တုဲဒှ်ယျရောၚ် ရုၚ်သၞောဝ်ဓဝ်ဂှ်ဟီုရ။
ဗွဲတၟေၚ် ပ္ဍဲဒေသပယျဵု ဗမာ ကေုာံ ခမေန် သီုအလုံအာယှအဂၞဲ ဂိုဏ်လီဠာန်အန်လာၚ်နွံမံၚ်တအ်ဂှ် ကြုက်ဗတိုက်သရိုဟ်ဒၟံၚ်တုဲ ပွမစဳရေၚ်ဖျေံအမှုလၟုဟ်ဂှ် ဒှ်အလန်လက်ကရဴအိုတ်ရ။
မၞိဟ်လ္ၚဵုတံဂှ် နကဵုပၟိက်စိုတ်ဇကု လုပ်ကၠောန်ဒၟံၚ် ပ္ဍဲကမၠောန်လီဠာန်တအ်ဏအ်ကီုလေဝ် ကောန်ဍုၚ်မ္ၚးဗွဲမဂၠိုၚ်ဂှ် ဒးဒုၚ်တံၚ်မၞိဟ်အာတ်သြန်တုဲ ဒးဒုၚ်ဘပဠ ရပ်ဓရတ် ကဵုကၠောန်ကမၠောန်ဗွဲအဓ္ဓမအိုတ်ရ။
ၜိုန်ရဗတိုက်သရိုဟ်ပလေအ်ဒၟံၚ် နကဵုဒြဟတ်ဗွဲမဇၞော်ကီုလေဝ် ဂိုဏ်လီဠာန်အန်လာၚ် ပ္ဍဲဒေသဏအ်ဂှ် ဆက်တုဲ ဇၞော်မံၚ်ဏီရောၚ် ညးအခေါၚ်ဟီုနွံ ရုၚ်သၞောဝ်ဓဝ်ကြုက်ဂှ် ဟီုပတိတ်လဝ်ရ။
Ref:CAN