တဳဟဳရာန်၊ မာတ် ၁။
ဒပ်ပၞာန်အမေရိကာန် ကေုာံ အေဿရေတံ အတိုင်မရန်တၟအ်စွံလဝ်ပွန် ဒၞာဲအပ္ဍဲဍုၚ်အဳရာန်ဂှ် နကဵုလဝေၚ်ပၞာန်ကျာ ကေုာံ မကမ်ဒုမ်မိဿာၚ်တံ ပံၚ်ကောံဗတိုက်ဏာလဝ်ရ။
စနူအခိၚ်ဂယး ဖေဖဝ်ဝါရဳ ၂၈ ဂှ် ပ္ဍဲဍုၚ်ဇၞော်တဳဟဳရာန်ကဵု ဍုၚ်လ္ၚဵုတံဂှ် ဂွံမိၚ်ရမ္သာၚ်ဗုမ်ခတိုဟ် ကေုာံ ဂွံဆဵုကေတ်ယက်တံ ဇွောဝ်ဟဳမံၚ်ရောၚ် ညးမဆဵုနကဵုမတ်တံ ဟီုဂးမံၚ်ရ။
သမတအမေရိကာန် ဒဝ်နေဝ်ထရ ဟီုဂလာန်ဗီဒဳယဵုမွဲကဆံၚ် “လဝေၚ်ပၞာန်ဇၞော်အိုတ်” ဂှ် စကၠောန်ဏာယျရောၚ် လလောၚ်တြးလဝ်တုဲ ရန်လဝ်သွက်ဂွံပလီုသရိုဟ်ထောံ ဒြဟတ်မကမ်ဒုမ် ကေုာံ ဒြဟတ်ပၞာန်ဍုၚ်အဳရာန်တံရောၚ် ဟီုလဝ်ရ။
“လတူဍုၚ်အဳရာန်ဂှ် ဒပ်ပၞာန်အမေရိကာန် စတုဲဗတိုက်ဏာ ဇၞော်ကဵုဇြဟတ်ယျ” လေဝ် ထရ ဟီုလဝ်ရ။
ဒးဒုၚ်ဗတိုက်တုဲ ခြာဟွံလံဂှ် လပါ်အဳရာန်လေဝ် နကဵုဒရုၚ် ကေုာံ မိဿာၚ်တံ ကလေၚ်ဗတိုက်လဝ်ရောၚ် လပါ်အေဿရေတံ ပတိတ်လဝ်ပရိုၚ်ရ။
ပ္ဍဲဒေသသၟဝ်ကျာဍုၚ်အေဿရေတံဂှ် ရမ္သာၚ်ကဵုသတိဘဲပၞာန်ကျာတံ မံက်တိတ်ကၠုၚ်တုဲ သွက်ညးဍုၚ်ကွာန်တံ ညံၚ်ဂွံလုပ်ဒၞာဲစဵုဒၞာ (ဂအာၚ်ဂီုကၠီု) ဂှ် ပတိတ်လဝ်အမိၚ်ရ။
တုဲပၠန် ပ္ဍဲဒေသဇိုၚ်ၜဳ ဒၞာဲဒပ်ပၞာန်အမေရိကာန်မၞုံတံ ပ္ဍဲဍုၚ်ပါရုၚ်၊ အဘူဒါဘဳ ကေုာံ ဍုၚ်ဒိုဟာတံဂှ်လေဝ် မိၚ်မံၚ်ရမ္သာၚ်ခတိုဟ်ထကးတံရောၚ် ပရိုၚ်တိတ်မံၚ်ရ။ ပ္ဍဲဍုၚ်အဳရတ် လပါ်သၟဝ်ကျာလေဝ် ဒပ်ပၞာန်မဆက်စပ်ကဵု ဂကောံ ဟာတ်အေဝ်ယှာဗဳဂှ်လေဝ် စွံပွန်တုဲ ဒးဒုၚ်ဗတိုက်ကီုရောၚ် ပ္ဍဲလိက်စဳရေၚ်လ္ၚဵုတံ ထမံက်ထ္ၜးလဝ်ရ။
စဵုကဵုပြဟ်ဟ်ဏအ် လၟိဟ်မၞိဟ်ဒးလဝ်ဘဲဝပ် ကေုာံ မၞိဟ်ချိုတ်တံဂှ် ဟွံတီချိုတ်တ်ပၠိုတ်တ်ဏီကီုလေဝ် ပရေၚ်ပၞာန်သကာတ်မြဟ် ပ္ဍဲဒေသဂှ် ပဵုသၠုၚ်တိုန်မာန်ရောၚ် ခါတ်မံၚ်အကာဲအိုတ်ရ။
Ref:CNA