ၜဳကလေၚ်၊ မာတ် ၁။
ပ္ဍဲတွဵုရးဍုၚ်မန် ပွိုၚ်ဍုၚ်ၜဳကလေၚ် ကွာန်မုဟ်ဒဵု ကေုာံဂၠံၚ်ကွာန်တ္ကအ်သတ်တဵုဂှ် အပ္ဍဲၜါတ္ၚဲဏအ် ညးဒေသမၞိဟ်တြုံ ၈ တၠ ထပ်ဒးဒုၚ်ရပ်ဏာပၠန်ရောၚ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်မ် ရ။
ဒပ်ဗၠာဲသၟိၚ်ကဝ်မယှေန်ပၞာန် ကေုာံ ဒပ်မင်ကွာန်တအ် ပ္ဍဲဖေဖဝ်ဝါရဳ ၂၆ တေံ ဒၞာဲဂၠံၚ်ၜဳကလေၚ် – မုဟ်ဒဵု ဗဒါဲကွာန်တ္ကအ်သတ်တဵုဂှ် ကၟာတ်ဆိုအ်စၟဳစၟတ်တုဲ ရပ်ဏာညးတြုံ ၂ တၠ မၞုံပ္ဍဲကွာန်မုတေင် ရ။
ပ္ဍဲဂိတုဖေဖဝ်ဝါရဳ ၂၇ အခိၚ်ဗ္တံ ၇ နာဍဳဂှ်လေဝ် ပ္ဍဲဂၠံၚ်အာသၞေဟ်ကွဳပၟတ် မုဟ်ဒဵုဂှ် ညးတြုံ ၆ တၠ မၞုံအာယုက်အကြာ ၂၀ သၞာံ ကဵု ၄၀ သၞာံတအ် ဒးဒုၚ်ထပ်ရပ်ဏာ မဒှ်ရ။
ညးဒေသမၞိဟ်တြုံ ၈ တၠ ဒးဒုၚ်ရပ်ဏာတအ်ဂှ် ချုက်လဝ်ပ္ဍဲရုၚ်ဗၠာဲသၟိၚ်ၜဳကလေၚ်တုဲ အပ္ဍဲဂှ် သၟတ်မွဲတၠ မံၚ်ဒၟံၚ်ကဵုမိနော် မတ်ကၠက်က် ပ္ဍဲကွာန်မုတေင်ဂှ် ဂွံအရီုအဗၚ်ဥက္ကဋ္ဌကွာန်တုဲ ဒးနုက်ကဵုသြန် ၂ ကိုတ်တုဲ ဗၠးတိတ်အာရောၚ် ဂွံတီကေတ်ရ။
ပ္ဍဲဂိတုဖေဖဝ်ဝါရဳ ၂၂ တေံလေဝ် ပ္ဍဲဂၠံၚ် နှေဟ်ဗလ-ၜဳကလေၚ်ဂှ် သၟတ်ကလေၚ်စဴနူကမၠောန် ၅ တၠ ဒးဒုၚ်ရပ်တုဲ ပလံၚ်ဏာလဝ် ဘာတန်ဗတောန်ကွတ်ပၞာန် လၟေၚ် ၉ ပ္ဍဲဍုၚ်သဓီုရ။
ပ္ဍဲပွိုၚ်ဍုၚ်ၜဳကလေၚ် ဒပ်ဗၠာဲသၟိၚ်ကဝ်မယှေန်ပၞာန် ကေုာံ ဒပ်မင်ကွာန်တအ်ဝွံ ရပ်ဒၟံၚ်သၟတ်တအ် ဇၟာပ်ဇၟာပ်တ္ၚဲတုဲ ပကောံမံၚ်ကောန်ပၞာန်တၟိ သွက်ယိုက်ဝန်ပၞာန်တအ်ဂှ် ကၠောန်ဒၟံၚ်မဒှ်ရ။
ပရိုၚ် – ဌာန်ပရိုၚ်သြၚ်လောန်တိုၚ်မ်
Photo – Social Media