ဗြဝတဳ၊ မာတ် ၁။
ပ္ဍဲတွဵုရးကရေၚ် ပွိုၚ်ဍုၚ်ဗြဝတဳ ဗဒါဲကွာန်မေတ္တာလေၚ်မျာင်ဂှ် ကောန်ဍုၚ်မ္ၚး ဟွံလုပ်သၞောဝ် ၁၅၆ တၠ ကၠောန်ဒၟံၚ် ပရေၚ်လီသြန် အန်လာၚ်ကေုာံ ဝေင်ဇျှၚ်လံၚ်သြန်တအ်ဂှ် ဂၠိုက်ဂၠာဲရပ်ချုက် ထိၚ်ဒဝ်လဝ်မာန်ယျရောၚ် ကဝ်မယှေန်ပၞာန် ပတိတ်လဝ်ပရိုၚ်ရ။
ပ္ဍဲဂိတုဖေဖဝ်ဝါရဳ ၂၆ တေံ ဗဒါဲကွာန် မေတ္တာလေၚ်မျာင်ဂှ် ကောန်ဍုၚ်ကြုက် ၁၄၈ တၠ၊ ကောန်ဍုၚ်သေံ ၃ တၠ၊ ကောန်ဍုၚ် ဖိလေတ်ပိုၚ် ၃ တၠ၊ ကောန်ဍုၚ်ခမေန် ၁ တၠ ကေုာံ ကောန်ဍုၚ် ရတ်ယှာ ၁ တၠ သီုဖအိုတ် ၁၅၆ တၠတအ် ကၠောန်ဒၟံၚ် ပရေၚ်လီသြန် အန်လာၚ်ကေုာံ ဝေင်ဇျှၚ်လံၚ်သြန် ပ္ဍဲစမြိုင် RC ၅ ထပ်မွဲမဂှ် ဂၠိုက်ဂၠာဲရပ်ချုက်ထိၚ်ဒဝ်ဂွံလဝ်ရ။
ပ္ဍဲအရာ ကၠောန်ပရေၚ်လီသြန်ကေုာံ ဝေင်ဇျှၚ်လံၚ်သြန်တအ်ဂှ် ကောန်ပျူတာ All in One ၁၁၀ မ၊ ဖုၚ်မဝ်ဗာၚ် ၂၂၀ မ ကေုာံ စၟဳစၟတ်ဂွံဆဵုညာတ်လဝ် ကပေါတ်စကာကမၠောန်တအ်ဂှ် ရပ်ကေတ် ဏာလဝ်တုဲ ပရေၚ်ဗက်ဂၠိုက်ဂၠာဲပသောင်မံၚ်တအ်ဂှ် ဆက်ကၠောန်အာမံၚ်ရောၚ် ပ္ဍဲလိက်လလောၚ်တြး ကဝ်မယှေန်ပၞာန် ဗၟံက်ထ္ၜးလဝ်ရ။
ကောန်ဍုၚ်မ္ၚး ဒးဒုၚ်ရပ်ထိၚ်လဝ်တအ်ဂှ် ချုက်စွံလဝ် ပ္ဍဲရုၚ်ဗၠာဲသၟိၚ် ဗြဝတဳတုဲ နကဵုဂကောံပံၚ်ကောံဌာန နာနာတအ် စပ်ကဵုတင်နင်ပူဂဵု ကေုာံ ပရေၚ်ကံက်စရၚ်တအ်ဂှ် ကၠောန်ဒၟံၚ်ရောၚ် ကဝ်မယှေန်ပၞာန် သ္ဂးရ။
ကောန်ဍုၚ်မ္ၚး မပါလုပ်ဒၟံၚ် ပ္ဍဲပရေၚ်ဝေင်ဇျှၚ်လံၚ်သြန်၊ လီသြန်အန်လာၚ်ကေုာံ ကမၠောန်ဒုစရိုက်တအ်ဂှ် သွက်ဂွံ ကလေၚ်ပလံၚ်ဗစိုပ်ကဵု ဇရေၚ်ဍုၚ်မဆေင်စပ်တံ ဗွဲမပြဟ်မာန်ဂှ် ဆက်ကၠောန်အာရောၚ် ဟီုလဝ်ရ။
ကပေါတ်ရပ်ဂွံလဝ် သွက်ဂွံကၠောန်ပရေၚ်လီသြန် ကေုာံ ဝေင်ဇျှၚ်လံၚ်သြန်တအ်ဂှ်လေဝ် ညံၚ်ဟွံဂွံကလေၚ်စကာမာန်ပၠန်ဂှ် အတိုၚ်ဗဗွဲသၞောဝ်ကၠောန်အာရောၚ် ကဝ်မယှေန်ပၞာန် ပတိတ်လဝ် ပရိုၚ်ရ။
ကွာန်မေတ္တာလေၚ်မျာင် ပွိုၚ်ဍုၚ်ဗြဝတဳဝွံ ဒှ်ဒၞာဲဒပ်မၚ်ပယျဵု BGF သ္ကိုပ်ဒေသပၞာန် လၟေၚ် ၄ ဒုသ္ကိုပ်ပၞာန် သဝ်မုက်တုၚ် ထိၚ်ချုပ်လဝ်တုဲ ပရေၚ်လီသြန်အန်လာၚ် သဝ်မုက်တုၚ်တအ်ဂှ် သှ်ေမံၚ် ဗွဲမဂၠိုၚ်ဏီ ရောၚ် အတိုၚ်ညးဒေသဗြဝတဳတအ် ဟီုလဴဂှ် ဂွံတီကေတ်ရ။
ပရိုၚ် – ဌာန်ပရိုၚ်သြၚ်လောန်တိုၚ်မ်’
Photo – MOI