မတ်မလီု၊ မာတ် ၁။
အလဵုအသဳညဳသၟဟ်ကောန်ဂကူ NUG ကေုာံ ဒပ်ပံၚ်ကောံမဟာမိတ် ပၠန်ဂတးတမ်ကညၚ် SRA တံ ဆဵုဂဗသဳကၠဳ ကိစ္စပၞာန် ကေုာံ ပရေၚ်ဍုၚ်ကွာန် နကဵုအန်လာၚ်ဂှ် သွက်ပၠန်ဂတးတမ်ကညၚ် ဒှ်တၠုၚ်လအာ အပြံၚ်အလှာဲခိုဟ်မွဲရောၚ် ညးသ္ၚဳဂၠိပ်တံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
ပ္ဍဲဂိတုဖေဖဝ်ဝါရဳ ၂၇ ဂှ် ဌာနဝန်ဇၞော်နာနာတံကီု သီုကဵုဌာန ပရေၚ်စဵုဒၞာကေုာံ ဌာနပရေၚ်ဍုၚ်သအာၚ် နူ NUG ကေုာံ သ္ကိုပ်က္ဍိုက်က္ဍိုပ် နူဒပ်ပံၚ်ကောံတမ်က္ညၚ် SRA တံ ဆဵုဂဗသဳကၠဳလဝ် နကဵု Zoom Platform ရောၚ် ဂကောံၜါလပါ်တံ ထမံက်ထ္ၜးလဝ် ပ္ဍဲလိက်လလောၚ်တြးရ။
ပရေၚ်ဏံဂှ် ဒပ်ပံၚ်ကောံမဟာမိတ် ပၠန်ဂတးတမ်ကညၚ် ၁၉ ဂကောံတံ ဒက်ပ္တန်လဝ် SRA ပ္ဍဲကၞောတ်သၞာံတုဲကၠုၚ်တေံတုဲ ဒှ်ပွမဆဵုဂဗအလန်ပထမ လုပ်ဗဗွဲသၞောဝ်အလန်ကၠာအိုတ် ဆဵုဗဂလဝ်ကဵု NUG ရောၚ် ကၠိုဟ်လဝ်ရ။
ပွမသဳကၠဳၜါလပါ်ဂှ် ကလိဂွံလဝ် သွဟ်ခိုဟ်တံနွံတုဲ သွက်ဂွံကၠောန်အာပ္ဍဲဗလးတိဍာ်တံဂှ် ဒးဆက်သဳကၠဳအာ ဗွဲမချိုတ်ပၠိုတ်ဏီရောၚ် ညးအခေါၚ်ဟီုဂးနွံ ဒပ်ပံၚ်ကောံတမ်က္ညၚ် SRA နာဲမေန်ဟာန်ထက် ဟီုလဝ်ရ ။
ကောန်ဂကောံ SRA သ္ကိုပ်က္ဍိုက်က္ဍိုပ် ဒပ်ပၞာန်ဗၟာဗၠးၜးညးဍုၚ်ကွာန် BPLA မိုၚ်သံၚ်ခ ဂှ်လေဝ် ပါဲနူကိစ္စ NUG ကဵု SRA တုဲ ကိစ္စပရေၚ် ဒပ်ပၞာန် နာနာတံဂှ် သဳကၠဳဂွံလဝ်ချိုတ်တ်ပၠိုတ်တ်ရောၚ် ချူထ္ၜးလဝ် နူအကံက် Facebook ညးရ။
သွက်ဒပ်ပၞာန်ဟွံမၞုံသၟဝ် NUG တံဂှ်လေဝ် သၟာန်စၟဳစၟတ်လဝ် ပၟိက်ဆန္ဒ NUG တုဲ သွက်ဂွံဒက်ပ္တန်အာ ပရေၚ်ညဳသၟဟ်မွဲစွံကေုာံ ယဝ်ရပဋိပက္ခကတဵုဒှ် အကြာမဟာမိတ်မ္ဂး သွက်ဂွံပ္ညဳပ္ညပ်သဳကၠဳအာ နကဵုနဲကဲသဳကၠဳ ဂှ်ရောၚ် တုပ်လဝ်စိုတ်အိုတ်ရ။
အတိုၚ်လိက်လလောၚ်တြးမ္ဂး ပ္ဍဲကောံဓရီု ဝန်ဇၞော်ဌာနပရေၚ်စဵုဒၞာ ဥူယဳမန် သောၚ်ကလးလဝ် မူဝါဒဆေၚ်စပ်ကဵု ဒပ်စဵုဒၞာဒေသ (PDF/LDF) နူကဵုဌာနစဵုဒၞာ MOD အလဵုအသဳ NUG ရ။
တုဲပၠန် သဳကၠဳလဝ်မူဝါဒ ပရေၚ်ဝေၚ်ပၞာန်၊ ပရေၚ်ထံၚ်ပရိုၚ်၊ ဆေၚ်စပ်ကဵု ပၠတရဴပရေၚ်ဍုၚ်ကွာန်တံတုဲ ဖျေံလဝ်ပရေၚ်ကမၠောန် အဓါန်ဂတတေံဂှ် သွက်ဂွံဆက်ဆဵုဂဗအာကဵု MOD ရောၚ် သ္ဂးရ။
NUG မၞုံကဵုပရေၚ်ပံၚ်ကောံ ပရေၚ်ဍုၚ်ကွာန်ကဵုပရေၚ်ပၞာန်ခိုဟ် ကေုာံ SRA သၟတ်မၞုံကဵုပရေၚ်ဆဵုဂဗ လုပ်ပေါဲဗတိုက်တံပံၚ်ပစပ်တုဲ ပရေၚ်ဝေၚ်ပၞာန် စှ်ေသၞောတ်ဗျူဟာခိုဟ်ဟ်တံ ကတဵုဒှ်ကၠုၚ် မာန်ရောၚ် ဗိုလ်ဇၞော် CDM ဇြေန်ယဝ် သ္ၚဳဂၠိပ်လဝ်ရ။
“ညံင်ရဴပံၚ်ပစပ်လဝေၚ်ပၞာန် (Join Operations) တံ ကတဵုဒှ်ကၠုၚ်မာန်၊ ၜိုန်ရဟွံလုပ်သၟဝ် COC (သၞောတ်က္ဍိုက်က္ဍိုပ်) NUG ကီုလေဝ် ပွမပံၚ်စပ်ဒၟံၚ် ဗွဲသကဲဂှ် ဂွံဆဵုကေတ်ရ၊ တုဲပၠန် ပေါဲဗတိုက်သီတိဍာ် ကေုာံ ပရေၚ်ကြတ်ဗတိုက်တံ ကတဵုဒှ်မံၚ်ကီုလေဝ် ပွမသဳကၠဳအကြာဂကောံ မၞုံကဵုပရေၚ်ဆဵုဂဗလုပ်ပေါဲဗတိုက် ပံၚ်ကောံလဝ်တံဏံ ပရေၚ်ပၞာန် ၁၀၂၇ တုဲဗွဲကြဴမ္ဂး ပရေၚ်ဝေၚ်ပၞာန်စှ်ေဗျူဟာတံ ကလေၚ်ဆဵုကေတ်မာန်ရောၚ် အဲသ္ၚဳဂၠိပ်ညာဏ်ကေတ်ရ” သာ်ဝွံ သ္ဂးရ။
ကြဴနူပၞာန်သီအဝဵုတုဲ သွက်ဂွံဗတိုက်သရိုဟ်အာ သၠောတ်တၠအဝဵုပၞာန် အခိၚ်ညးဂမၠိုၚ် ဗ္တိုက်ဖ္အောဝ်မံၚ်ဂှ် ဒပ်ပံၚ်ကောံ SRA ဏံ အလန်ပထမကၠာအိုတ် ဒက်ပ္တန်လဝ် မဒှ်ရ။
အပ္ဍဲဂှ်မ္ဂး ဒပ်စဵုဒၞာကောန်ဂကူကရေၚ်ဍာဲ KNDF၊ ကောဒေံချေၚ် CB၊ ဒပ်ဗၠးၜးညးဍုၚ်ကွာန်ဓနု DPLF၊ ဒပ်ပၠန်ဂတးဍုၚ်မန် MSRF ကေုာံ ဒပ်စဵုဒၞာညးဍုၚ်ပအိုဝ် (ခမ်းဒေါမ်) တံ ပါလုပ်ဒၟံၚ်ရ။
နူဒပ်ပၠန်ဂတးဂကူဗၟာတံမ္ဂး ဒပ်ဗၟာဗၠးၜးညးဍုၚ်ကွာန် BPLA၊ ဒပ်ဗၟာ BA ကေုာံ ဒပ်ပၠတရဴသၠးပွးဗမာ BLDF တံလေဝ် ပါလုပ်ရ။
ပါဲနူဂှ်ပၠန် ဒပ်ဗၠးၜးညးဍုၚ် PIA၊ ဒပ် GZA ကေုာံ ဒပ်ဗၠးၜးကောန်ဂကူ NLA မၞုံကဵုပရေၚ်ဆက်စပ်ကြပ်ပ်ကဵု KIA, AA, TNLA တံလေဝ် ပါလုပ်ဒၟံၚ်ရ။
ဒပ်နူဒေသအညာတံမ္ဂး PDF မဂွေ, PDF သဂိုၚ်, ဒပ်ပၠန်ဂတးကလေး KRF, ဒပ်ယဝ် YA, ဒပ်စဵုဒၞာယဝ် YDF, ကောန်ပၞာန် PDF 96, FFD ကေုာံ ဒပ်ကွးဘာ SAF တံလေဝ် ပါလုပ်ဒၟံၚ် ပ္ဍဲဒပ်ပံၚ်ကောံတမ်က္ညၚ် SRA ဂှ်ရ။
ဂကောံရပ်လွဟ်တံဏအ် ချဳဒရာၚ်မံၚ်ပ္ဍဲဒေသနာနာတုဲ ပ္ဍဲအရာဆက်စပ် ကၠောန်ကမၠောန်တံမ္ဂး သွက် SRA ဇြဟတ်ဂၠိုၚ်တိုန်မာန်ရောၚ်ဂှ် ကောန်ဒပ်ကေုာံ ညးသ္ၚဳဂၠိပ်ပၞာန်တံထံက်ထ္ၜးလဝ်ရ။
SRA ကဵု NUG သဳကၠဳဂှ် ဒှ်ဂၠံၚ်တရဴပရေၚ်ညဳသၟဟ်တုဲ သွက်ပရေၚ်ပၞာန် ဇၟာပ်ဒၞာဲအလုံသီုဖအိုတ်မ္ဂး ဒှ်လဂါံဇိုၚ်ကၠာအိုတ်ရောၚ် အကြာပ်ဇၞော် CDM ဇြေယျာ သ္ၚဳဂၠိပ်ဟီုလဝ်ရ။
“သွက်ဂွံထပက်ပၞာန်နာနာ အလုံဒေသသီုဖအိုတ်တံဂှ် ဒှ်လဂါံဇိုၚ်ကၠာအိုတ်တုဲ အံၚ်ဇၞးအာယျ၊ ယဝ်ရကလေၚ်ဒက်ပ္တန်တုဲ ကၠောန်အာချိုတ်တ်ပၠိုတ်တ်မ္ဂး သၞာံဏအ်ဟွံမာန်ကီုလေဝ် သၞာံဂတမ္ဂး ဗတိုက်မာန်ရောၚ်၊ ၜိုန်ရထပက်ပၞာန်အလုံဖအိုတ်ဟွံမာန်ဏီကီုလေဝ် ဟိုတ်နူဒက်ဂွံလဝ် မဟာမိတ်ခိုဟ်ဟ်တံ ဆက်စပ်တုဲ ကလေၚ်ဗတိုက်မာန်ရ၊ ဒပ်ပၞာန်ဗမာတံဂှ် ပ္ဍဲဒေသလ္ၚဵုတံ ကလေၚ်ဗတိုက်မာန်ဒၟံၚ်ရ” သာ်ဝွံ သ္ဂးရ။
နကဵု SRA ဂှ် ဒက်ပ္တန်လဝ် ကမ္မတဳမၞုံကဵုညးစၞးနာနာမွဲတုဲ နူဂှ်မွဲကဆံၚ်သွက်ဂွံပၠတရဴပရေၚ်ဍုၚ်ကွာန် ကေုာံပရေၚ်ဝေၚ်ပၞာန်တံဂှ် ကၠောန်အာဗျူဟာစှ်ေစှ်ေရောၚ် ဟီုလဝ်ရ။
သွက်ဂွံပံၚ်ကောံ ဂကောံဇြဟတ်ပၠန်ဂတးသီုဖအိုတ်တုဲ ညံၚ်ဂွံပၠတရဴ မာန်ဂှ် NUG သဳကၠဳမံၚ်ရောၚ် ဥူနေဖုၚ်လာတ် ညးအခေါင်ဟီုဂးနွံ ရုင်သ္ကိုပ်ဝန်ဇၞော် (NUG) ဟီုလဝ် နူကဵု PVTV ပ္ဍဲဖေဖဝ်ဝါရဳ ၁၀ ရ။
သွက်ပၠန်ဂတးဂွံအံၚ်ဇၞးအာဂှ် ဗီုလဵုဂွံကၠောန်အာရော အကြာ NUG, KNU, KNPP, CNF ကေုာံ KIO တံ သဳကၠဳလဝ်နကဵုအန်လာၚ်ရောၚ် သ္ကိုပ်ပၞာန်ဇၞော် ဂေါန်မဝ် ဒုက္ကဌ ၁ (KIO) ချူကဵုလဝ်သမ္တီကီုရ။
ပရေၚ်ဏံဂှ် ဒှ်အပြံၚ်အလှာဲပရေၚ်ပၠန်ဂတးမွဲ သွက်ဂွံဗတိုက်သရိုဟ်အာသၠေတ်တၠအဝဵုပၞာန် အကြာ NUG ကေုာံ ဂကောံရပ်လွဟ်ကောန်ဍုၚ်အရၚ် K3C တံရောၚ်။
မွဲလပါ်မ္ဂး ဒပ်ပၞာန်ဗမာသီအဝဵုတံဂှ် သွက်ဂွံဂွံဗဗွဲဓဝ်ပရေၚ်ဍုၚ်ကွာန် ဂးတုဲ ကၠောန်ဗဒှ်လဝ်ပေါဲရုဲမာဲဂှ် ပ္ဍဲဂိတုမာတ်သတ္တဟတတိယဏံမ္ဂး သွက်ဂွံကော်အာ ကောံဓရီုစၠတ်ဓဝ်ဂှ် စဳဇန်ပလေဝ်စမံၚ်ရ။
နူဂှ်မွဲကဆံၚ် ပ္ဍဲဂိတုဨပြဳမ္ဂး သွက်ဂွံရုဲပတိုန်သမတ ကေုာံ ဒက်ပ္တန်အလဵုအသဳတုဲ သွက်ဂွံပအပ်တာလျိုၚ်ကၟိန်ဍုၚ်ဂှ် ကဝ်မယှေန်ပၞာန် ဟီုဂးလဝ်တုဲ ဂကောံဇြဟတ်ပၠန်ဂတးတံ ဒးဇီုကပိုက်ကဵု တၠုၚ်လအာတၟိ မဒှ်ရောၚ်။
ပရိုၚ် – သြၚ်လောန်တိုၚ်မ်
Photo – SRA